មន្ត្រីអនុរក្សពន្ធនាគារព្រៃសបានបំពាក់កាមេរ៉ាសុវត្ថិភាពនៅក្នុងបន្ទប់ឃុំឃាំងរបស់មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា។ មន្ត្រីនាំពាក្យពន្ធនាគារថ្លែងថា ករណីនេះមិនខុសច្បាប់នោះទេ ព្រោះលោក មាជ សុវណ្ណារ៉ា បានរំលោភបទបញ្ជាផ្ទៃក្នុងពន្ធនាគារ ប៉ុន្តែខាងមន្ត្រីសិទ្ធិមនុស្សវិញអះអាងថា ការធ្វើដូច្នេះវាជាការរំលោភសិទ្ធិអ្នកជាប់ឃុំធ្ងន់ធ្ងរ។
ប្រភពស្និទ្ធនឹងលោក អ៊ំ សំអាន អះអាងប្រាប់អាស៊ីសេរីក្នុងលក្ខខណ្ឌមិនបញ្ចេញឈ្មោះថា បន្ទប់ឃុំឃាំងរបស់លោក អ៊ំ សំអាន ដែលនៅរួមគ្នាជាមួយលោក មាជ សុវណ្ណារ៉ា មន្ត្រីជាន់ខ្ពស់របស់គណបក្សសង្គ្រោះជាតិនោះ ត្រូវបានមន្ត្រីអនុរក្សពន្ធនាគារបំពាក់កាមេរ៉ាសុវត្ថិភាពនៅក្នុងនោះ កាលពីប៉ុន្មានថ្ងៃមុននេះ គឺក្រោយពេលលោកនាយករដ្ឋមន្ត្រី បានបញ្ជាឱ្យមន្ត្រីអនុរក្សពន្ធនាគារព្រៃស ដកហូតយកទូរស័ព្ទរបស់លោក មាជ សុវណ្ណារ៉ា ដែលលោកអះអាងថា បានប្រើប្រាស់ទូរស័ព្ទធ្វើនយោបាយចេញពីក្នុងពន្ធនាគារ។
ប្រភពដដែលអះអាងទៀតថា កាលពីថ្ងៃទី២៧ មីនា ភ្លាមៗបន្ទាប់ពីមានបញ្ជារបស់លោក ហ៊ុន សែន សមត្ថកិច្ចមួយក្រុមពីក្រសួងមហាផ្ទៃ បានចុះទៅឆែកឆេរបន្ទប់ឃុំឃាំងរបស់លោក អ៊ំ សំអាន និងបានដកហូតលុយរបស់លោកចំនួន ៤០០ ដុល្លារ និងលុយរបស់អ្នកជាប់ឃុំផ្សេងទៀតនៅក្នុងបន្ទប់នោះចំនួន ១៥ ម៉ឺនរៀលបន្ថែមទៀត ហើយរហូតមកទល់នឹងពេលនេះ សមត្ថកិច្ចមិនទាន់ប្រគល់លុយទាំងនោះឱ្យលោក អ៊ំ សំអាន និងអ្នកជាប់ឃុំទាំងនោះឡើយ។
ប្រភពដដែលបញ្ជាក់ថា លោក អ៊ំ សំអាន បានចាត់ទុកការបំពាក់កាមេរ៉ានៅក្នុងបន្ទប់ឃុំឃាំងរបស់លោកនោះថា ជាការរំលោភសិទ្ធិអ្នកជាប់ឃុំយ៉ាងធ្ងន់ធ្ងរទៅ និងបានចាត់ទុកសកម្មភាពរបស់មន្ត្រីសមត្ថកិច្ចដែលដកហូតលុយរបស់លោកនោះ ថាជាអំពើចោរកម្ម។
ឆ្លើយតបរឿងនេះ មន្ត្រីនាំពាក្យអគ្គនាយកដ្ឋានពន្ធនាគារក្រសួងមហាផ្ទៃ លោក នុត សវនា ថ្លែងថា លោកមិនទាន់ទទួលបានដំណឹងអំពីការដាក់កាមេរ៉ាសុវត្ថិភាពនៅក្នុងបន្ទប់ឃុំឃាំងរបស់លោក អ៊ំ សំអាន និងលោក មាជ សុវណ្ណារ៉ានោះនៅឡើយទេ ក៏ប៉ុន្តែប្រសិនបើមានមែននោះ លោកថាក៏មិនខុសដែរ ព្រោះលោក មាជ សុវណ្ណារ៉ា បានប្រព្រឹត្តល្មើសបទបញ្ជាផ្ទៃក្នុងពន្ធនាគារ៖ «ការដាក់នេះប្រហែលជាខាងសន្តិសុខគេបារម្ភអំពីសកម្មភាពរបស់គាត់ (លោក មាជ សុវណ្ណារ៉ា) អ៊ីចឹងគេត្រូវដាក់ដើម្បីគ្រប់គ្រងសភាពការណ៍ និងសន្តិសុខ រង់ចាំមើលថាតើមានការប្រែប្រួលយ៉ាងម៉េច។ វិធានការនេះមិនខុសទេ បើយើងផ្អែកលើហេតុផលសន្តិសុខ។ នេះក្នុងករណីដែលគេដាក់ (កាមេរ៉ា)»។
ទាក់ទងនឹងការដកហូតលុយវិញ លោក នុត សវនា ថ្លែងថា លោក អ៊ំ សំអាន និងអ្នកជាប់ឃុំដទៃទៀត មានសិទ្ធិប្តឹងរឿងនេះទៅមន្ត្រីអនុរក្សពន្ធនាគារឱ្យជួយរកដំណោះស្រាយ ហើយបើនៅតែមិនមានដំណោះស្រាយទេនោះ ពួកគាត់អាចប្តឹងករណីនេះទៅអគ្គនាយកដ្ឋានពន្ធនាគារតែម្ដង។ លោកអះអាងថា ទាំងគោលការណ៍ច្បាប់ និងក្រសួងមហាផ្ទៃមិនអនុញ្ញាតឱ្យមន្ត្រីណាម្នាក់ទៅដកហូតយកលុយអ្នកជាប់ឃុំយកមកធ្វើជារបស់ខ្លួនឯងនោះទេ គឺត្រូវដកហូតធ្វើកំណត់ហេតុ រួចទុកនៅមណ្ឌលកែប្រែជារបស់ម្ចាស់ដើមនោះដដែល។
ប្រធានគ្រប់គ្រងការិយាល័យសិទ្ធិមនុស្សអង្គការលីកាដូ (Licadho)លោក អំ សំអាត ថ្លែងថា ការដាក់កាមេរ៉ាសុវត្ថិភាពនៅក្នុងបន្ទប់ឃុំឃាំងនោះ គឺជាការរំលោភបំពានធ្ងន់ធ្ងរទៅលើសិទ្ធិឯកជនរបស់អ្នកជាប់ឃុំ។ លោកបន្តថា ទោះក្នុងកាលៈទេសៈណាក៏ដោយ ក៏អ្នកជាប់ឃុំត្រូវទទួលបាននូវសិទ្ធិឯកជនរបស់ខ្លួនដែរ៖ «ជាការប៉ះពាល់ធ្ងន់ធ្ងរដល់សិទ្ធិសេរីភាពរបស់ពួកគាត់ ព្រោះក្នុងបន្ទប់ពន្ធនាគាររបស់គាត់នោះ វាជាជីវិតឯកជន គាត់ត្រូវការជីវិតឯកជន កាលណាដាក់កាមេរ៉ា វាអាចប៉ះពាល់ទៅដល់អារម្មណ៍ និងសុវត្ថិភាពរបស់ពួកគាត់ បានន័យថា គាត់ធ្វើអ្វីជាលក្ខណៈឯកជនអត់បាន»។
លោកបន្តថា បញ្ហាដែលអ្នកជាប់ឃុំអាចប្រើប្រាស់បាននៅក្នុងពន្ធនាគារនោះ មិនអាចបន្ទោសតែលើពួកគេបាននោះទេ ព្រោះនៅតាមបន្ទប់ឃុំឃាំងនីមួយៗសុទ្ធតែមានអនុរក្សត្រួតពិនិត្យ និងទទួលខុសត្រូវរៀងៗខ្លួន ដូច្នេះវាជាការធ្វេសប្រហែសរបស់អនុរក្សពន្ធនាគារ ដែលបណ្ដែតបណ្ដោយឱ្យអ្នកទោសអាចប្រើប្រាស់ទូរស័ព្ទបាន៖ «តាមបន្ទប់នីមួយៗក៏មានមេបន្ទប់ដែរ គួរតែពិនិត្យឱ្យបានជាក់លាក់។ រឿងនេះប្រសិនបើនាយករដ្ឋមន្ត្រីមិនលើកឡើងទេ ប្រហែលជាករណីនេះនៅបន្តហើយ ដល់ពេលមានប្រសាសន៍របស់នាយករដ្ឋមន្ត្រី គាត់ប្រុងប្រយ័ត្ន គាត់ធ្វើកំណែទម្រង់ ឬឆែកឆេរទៅ ជួនកាលវាលើស វាប៉ះពាល់ដល់សិទ្ធិរបស់ជនជាប់ចោទដទៃទៀត»។
ទាក់ទងនឹងការដកហូតយកលុយរបស់អ្នកជាប់ឃុំវិញ លោក អំ សំអាត ថ្លែងថា សមត្ថកិច្ចត្រូវធ្វើយ៉ាងណាឱ្យអ្នកជាប់ឃុំអាចប្រើប្រាស់លុយនោះបាន ប្រសិនបើដកហូតទុកខ្លួនឯង នោះជាការរំលោភសិទ្ធិមួយផ្សេងទៀតរបស់អ្នកជាប់ឃុំ។
តំណាងរាស្ត្រជាប់ឆ្នោតគណបក្សសង្គ្រោះជាតិ លោក អ៊ំ សំអាន បានជាប់ពន្ធនាគារអស់រយៈពេលប្រមាណពីរឆ្នាំហើយ ពាក់ព័ន្ធនឹងការផ្សព្វផ្សាយឯកសារផែនទីព្រំដែនកម្ពុជា-វៀតណាម។ ចំណែកមន្ត្រីជាន់ខ្ពស់គណបក្សសង្គ្រោះជាតិលោក មាជ សុវណ្ណរ៉ា វិញ បានជាប់ពន្ធនាគារអស់រយៈពេលជាង ៣ឆ្នាំមកហើយ ពាក់ព័ន្ធនឹងករណីហិង្សាលើស្ពាននាគក្បែរទីលានប្រជាធិបតេយ្យ កាលពីពាក់កណ្តាលខែកក្កដា ឆ្នាំ ២០១៤ កន្លងទៅ៕
