អតីតអភិបាលខេត្តតាកែវលោក ឡាយ វណ្ណៈ ត្រូវបានសមត្ថកិច្ចឃាត់ខ្លួនតាមបញ្ជារបស់ព្រះរាជអាជ្ញារងនៃសាលាដំបូងរាជធានីភ្នំពេញ នៅថ្ងៃទី១ ខែមេសា។ ការឃាត់ខ្លួននេះ ដើម្បីនាំមកសួរនាំ ពាក់ព័ន្ធនឹងសំណុំរឿងឃាតកម្មលើស្រីស្នេហ៍របស់ខ្លួន កាលពីដើមឆ្នាំ២០១៨។
ព្រះរាជអាជ្ញារងនៃសាលាដំបូងរាជធានីភ្នំពេញ លោក សៀង សុខ បានចេញដីកាបញ្ជាឲ្យសមត្ថកិច្ចនាំខ្លួនលោក ឡាយ វណ្ណៈ អតីតអភិបាលខេត្តតាកែវ ទៅកាន់នាយកដ្ឋាននគរបាលព្រហ្មទណ្ឌ នៃអគ្គស្នងការនគរបាលជាតិ អោយបានមុនថ្ងៃទី២០ ខែមេសា។
ក្នុងដីកានោះ លោក សៀង សុខ បញ្ជាក់ថា នឹងសួរនាំលោក ឡាយ វណ្ណៈ អំពីដំណើររឿងឃាតកម្ម កាលពីថ្ងៃទី២៦ ខែមករា ឆ្នាំ២០១៨ នៅចំណុចផ្ទះជួលក្នុងសង្កាត់រកាក្នុង ក្រុងដូនកែវ ខេត្តតាកែវ។
អ្នកនាំពាក្យក្រសួងមហាផ្ទៃ លោកខៀវ សុភ័គ មានប្រសាសន៍ថា លោក ឡាយ វណ្ណៈ ត្រូវបានសមត្ថកិច្ចចាប់ខ្លួននៅរសៀលថ្ងៃអាទិត្យនេះ នៅមុខវិទ្យាល័យ ជា ស៊ីម ស្ថិតក្នុងសង្កាត់រកាក្នុង ក្រុងដូនកែវ បន្ទាប់ពីលោកចូលរួមពិធីផ្ទេរមុខតំណែងប្រធានគណបក្សប្រជាជនកម្ពុជាខេត្តតាកែវ ទៅឲ្យអភិបាលខេត្តតាកែវថ្មី។
លោក ខៀវ សុភ័គ បន្តថា ការឃាត់ខ្លួននេះ បន្ទាប់ពីសមត្ថកិច្ចបានធ្វើការស៊ើបអង្កេតមួយរយៈ និងទទួលបានចម្លើយពីជនសង្ស័យ៥នាក់ទៀតថា លោក ឡាយ វណ្ណៈ ជាជនសង្ស័យម្នាក់ទៀត ដែល បានលាក់បាំងសំណុំ រឿងឃាតកម្មទៅលើស្រីស្នេហ៍របស់ខ្លួនទៅជាសំណុំរឿអត្តឃាតវិញ។
លោកបន្តថា សមត្ថកិច្ចនឹងបញ្ជូនលោក ឡាយ វណ្ណៈ ព្រមទាំងឯកសារដាក់បន្ទុកផ្សេងៗទៀត ជូនតុលាការ ប៉ុន្តែមិនទាន់កំណត់ពេលទេ។