Clik here to view.
អគ្គព្រះរាជអាជ្ញាសាលាឧទ្ធរណ៍ បានចេញដីកាកោះឲ្យនាំខ្លួនលោក កឹម សុខា ពីពន្ធនាគារត្រពាំងផ្លុង (ម៣) មកកាន់សាលាឧទ្ធរណ៍ នៅថ្ងៃទី២៧ ខែមីនា ឆ្នាំ២០១៨ខាងមុខនេះ ដើម្បីបន្ដបើកសវនាការ ពីបទសន្ទិដ្ឋិភាពជាមួយបរទេស។
ដីកាកោះរបស់ព្រះរាជអាជ្ញា អ៊ឹម សុផាន ផ្ញើជូនអគ្គនាយក នៃអគ្គនាយកដ្ឋានពន្ធនាគារ កាលពីរសៀលថ្ងៃទី១៨ ខែមីនា បញ្ជាក់ថា នៅពេលចប់សវនាការហើយ សមត្ថកិច្ចពន្ធនាគារត្រូវនាំខ្លួនលោក កឹម សុខា ត្រឡប់ទៅពន្ធនាគារវិញ ដើម្បីបន្តអនុវត្តសេចក្ដីសម្រេចរបស់តុលាការពីមុនមក ប្រសិនបើគ្មានសេចក្ដីសម្រេចថ្មីទៀតនោះ។
សមត្ថកិច្ចបានសម្រុកចូលចាប់ខ្លួនលោក កឹម សុខា ដល់ក្នុងផ្ទះទាំងកណ្ដាលយប់ កាលពីដើមខែកញ្ញា ឆ្នាំ២០១៧ ដោយចោទប្រកាន់ពីបទ ក្បត់ជាតិ។ ក្រោយចាប់ខ្លួនភ្លាម សមត្ថកិច្ចបានបញ្ជូនលោក កឹម សុខា ទៅឃុំបណ្តោះអាសន្ននៅពន្ធនាគារត្រពាំងផ្លុង ខេត្តត្បូងឃ្មុំ។
ក្រុមមេធាវីគ្រោងនឹងប្តឹងសុំឱ្យតុលាការក្រុងភ្នំពេញ ទម្លាក់ចោលបទប្រកាន់លើរូបលោកនៅពេលឆាប់ៗខាងមុខនេះ ដោយសារតែពួកគេយល់ថា តុលាការគ្មានភស្តុតាងណាមួយដាក់បន្ទុកលើរូបលោក កឹម សុខា ទេ ហើយលោកក៏មិនបានប្រព្រឹត្ត បទល្មើសព្រហ្មទណ្ឌ ដូចការចោទប្រកាន់ទាំងបំពានច្បាប់ពីរបបក្រុងភ្នំពេញនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
