Clik here to view.
កំណើនជនជាតិចិនសម្រុកមករស់នៅក្រុងប៉ោយប៉ែត ខេត្តបន្ទាយមានជ័យ កាន់តែច្រើន ខណៈដែលពលរដ្ឋខ្មែររាប់លាននាក់នាំគ្នាធ្វើចំណាកស្រុកទៅស្វែងរកការងារនៅក្រៅប្រទេស។ ប្រជាពលរដ្ឋ និងមន្ត្រីសង្គមស៊ីវិលនៅខេត្តបន្ទាយមានជ័យលើកឡើងស្រដៀងគ្នាថា កំណើនរបស់ជនជាតិចិននេះ គឺបង្កផលប៉ះពាល់ដល់របររកស៊ីរបស់ពលរដ្ឋនៅក្រុងប៉ោយប៉ែតបណ្ដើរៗហើយ។ ប៉ុន្តែប៉ូលិសក្រុងប៉ោយប៉ែតអះអាងថា ជនជាតិចិនទាំងនោះមករស់នៅដោយស្របច្បាប់។
មន្ត្រីអង្គការសង្គមស៊ីវិល និងប្រជាពលរដ្ឋនៅក្រុងប៉ោយប៉ែតមួយចំនួន ព្រួយបារម្ភថា កំណើនរបស់ជនជាតិចិនដ៏ច្រើនសន្ធឹកសន្ធាប់នេះ គឺមិនផ្ដល់សេចក្ដីសុខសប្បាយដល់ពលរដ្ឋ និងសង្គមជាតិទេ តែអាចបង្កផលប៉ះពាល់ដល់ការរស់នៅរបស់ពលរដ្ឋខ្មែរកាន់តែខ្លាំងនៅថ្ងៃអនាគត។
ប្រជាពលរដ្ឋម្នាក់នៅរស់នៅក្រុងប៉ោយប៉ែត លោក ផុន ប្រុសឲ្យដឹងនៅថ្ងៃទី១៨ មីនាថា លោកមិនសប្បាយចិត្ត ចំពោះជនជាតិចិនដែលមករស់នៅក្រុងប៉ោយប៉ែតដ៏ច្រើនសន្ធឹកសន្ធាប់នោះទេ ព្រោះពួកគេបានមកដណ្ដើមការងាររបស់ពលរដ្ឋខ្មែរ ហើយម្យ៉ាងធ្វើឲ្យបន្ទប់ស្នាក់ឡើងថ្លៃជាងពេលដែលជនជាតិចិនមិនទាន់មករស់នៅច្រើនដូចសព្វថ្ងៃ៖ «ព្រោះប្រជាពលរដ្ឋខ្មែរដែលប្រកបមុខរបររកស៊ីពីមុនបានប៉ុនណាគាត់ចេះតែរស់បាន ប៉ុន្តែជនជាតិគាត់ជះទឹកលុយសម្បើមពេក ហាក់បីដូចជាមកចាយលុយរបៀបណាទេ ព្រោះពលរដ្ឋខ្មែរយើងមិនអាចមានលទ្ធភាពធ្វើដូចគាត់បាន។ដូច្នេះមុខរបរដែលរកស៊ីប្រចាំថ្ងៃប៉ះពាល់ជាមួយនឹងជនជាតិនឹង គឺអីចឹងគាត់ដណ្ដើមអស់ហើយបាទ»។
ចំណែកឯពលរដ្ឋនៅក្រុងប៉ោយប៉ែតម្នាក់ទៀត លោក កែវ ចាន់ រៀបរាប់ថា ផ្ទះសំណាក់នឹងអាគារពាណិជ្ជកម្មធំនៅក្រុងប៉ោយប៉ែតត្រូវបានជនជាតិចិនជួលសម្រាប់ស្នាក់នៅ និងបើកធ្វើអាជីវកម្មស្ទើរអស់ទៅហើយ។ ពលរដ្ឋរូបនេះអះអាងទៀតថា បើទោះបីជាចិនដីគោកមកជួលអាគារច្រើនយ៉ាងនេះក្ដី ក៏ប៉ុន្តែហាក់មិនបានផ្ដល់ប្រយោជន៍ដល់ប្រជាពលរដ្ឋក្រីក្រនោះទេ៖ «អូអារឿងនឹងមិនបាច់និយាយទេ វាកុម្មុយនិស្តតែម្ដង បើថាយប់ឡើងពួកគាត់ដើរទាំងហ្វូងពេញផ្លូវហើយ ចំណែកសមត្ថកិច្ចដូចអត់មានចាត់វិធានការណ៍ទេ យ៉ាប់ណាស់។ វាមកនៅស្រុកខ្មែរយើងនឹងអ្នកមានសិទ្ធិឡានដាក់ស្លាកលេខខេមរៈភូមិទៀតផង»។
អធិការរងនគរបាលក្រុងប៉ោយប៉ែត លោក អេង លីហួ មានប្រសាសន៍ថា ប្រមាណ៣ឆ្នាំចុងក្រោយនេះ មានចំនួនកើនឡើងខ្លាំង ក៏ប៉ុន្តែលោកអះអាងថា ពួកគេមករស់នៅដោយស្របច្បាប់ ហើយម្យ៉ាងទៀត ក៏មិនទាន់បង្កបញ្ហាធំដុំដល់សង្គម និងប្រជាពលរដ្ឋនៅក្រុងប៉ោយប៉ែតនៅឡើយទេ៖ «បាទកើនឡើងច្រើនក្នុងអំឡុងពេលការរីកចម្រើនមួយរយៈក្រោយនេះ រហូតធ្វើឲ្យប្រជាពលរដ្ឋនៅក្រុងប៉ោយប៉ែតមិនសប្បាយចិត្ត។ ក្នុងនោះមានអាជីវកម្មខ្លះក៏គាត់ទិញខ្លះក៏គាត់ជួលដែរ ហើយសូម្បីតែអ្នកលក់សាច់គោអាំងក៏មានដែរ មានលក់បង្កងអាំ ជាភោជនីយដ្ឋាន លក់ចាបហួយ ជាកាស៊ីណូ ដូច្នេះគាត់មានគ្រប់តែមុខនឹង»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា លើកឡើងថា កំណើនជនជាតិចិនមករស់នៅក្រុងប៉ោយប៉ែតមួយរយៈចុងក្រោយនេះ មានចំនួនកាន់តែច្រើនគួរឲ្យព្រួយបារម្ភ ព្រោះពួកគេភាគច្រើនមកប្រកបរបររកប្រាក់តាមប្រព័ន្ធអ៊ីនធឺណិត (Internet) និងបើកល្បែងស៊ីសង ដែលអាចបង្កជាបញ្ហាផ្សេងៗដល់សង្គមជាតិបាន៖ «យើងអត់គាំទ្រទៅលើជនជាតិចិនទាំងអស់នោះទេ ហើយសូមអោយរដ្ឋាភិបាលគួរតែរកការងារគួរតែរកទីផ្សារ គួរធ្វើអ្វីខ្មែរមានផលប្រយោជន៍ច្រើនជាង ប្រសើរជាងអនុញ្ញាតឲ្យជនបរទេសមកច្រើនអ៊ីចឹង ខ្ញុំគិតថាប្រទេសយើងក្រហើយបែរជាអ្នកដែលមកមានជំនាញខ្ពស់ជាងយើងទៀត មិនមែនមកក្លាយទៅជាកូនចៅរបស់ម្ចាស់ប្រទេសទេក្លាយទៅជាថៅកែរបស់ម្ចាស់ប្រទេសនឹង»។
របាយការណ៍ប៉ូលិសក្រុងប៉ោយប៉ែតឲ្យដឹងថា សព្វថ្ងៃនៅក្រុងប៉ោយប៉ែតមានជនជាតិចិនរស់នៅប្រហែលជាង ១ពាន់នាក់ ហើយភាគច្រើនពួកគេរស់នៅតាមអាគារខ្ពស់ៗនៅជាប់ព្រំដែនកម្ពុជា-ថៃ។ ប៉ុន្តែលោក ស៊ុំ ច័ន្ទគា និងប្រជាពលរដ្ឋអះអាងថា ជនជាតិចិនមករស់នៅក្រុងមួយនេះមានចន្លោះពី ៤ពាន់ ទៅជិតមួយម៉ឺននាក់ ហើយពីមួយថ្ងៃទៅមួយថ្ងៃលំហូរជនជាតិចិនចូលមករស់នៅតំបន់ព្រំដែនមួយនេះ កាន់តែច្រើនឡើងជាលំដាប់។ ចំណែកឯតម្លៃដីធ្លីនិងផ្ទះសម្បែងវិញ ក៏កាន់តែឡើងថ្លៃ ហើយបានប៉ះពាល់ដល់ជីវភាពរស់របស់ពលរដ្ឋក្រីក្រដូចជាអ្នករត់ម៉ូតូឌុប កម្មករសំណង់និងបុគ្គលិកកាស៊ីណូជាដើម គឺពួកគេមិនមានលទ្ធភាពជួលផ្ទះដើម្បីស្នាក់នៅធ្វើការងាររកប្រាក់កម្រៃដោះស្រាយជីវភាពនោះឡើយ៕