ក្រុមមេធាវីបានដាក់សំណើទៅអយ្យការអមសាលាដំបូងរាជធានីភ្នំពេញ ដើម្បីឱ្យលោក កឹម សុខា ប្រធានគណបក្សសង្គ្រោះជាតិ បានទៅសម្រាកព្យាបាលជំងឺនៅប្រទេសសិង្ហបុរី។ អ្នកស្រីមេធាវី ម៉េង សុភារី បានឱ្យអាស៊ីសេរីថា កាលពីសប្ដាហ៍មុន ក្រុមមេធាវីបានស្នើសុំឱ្យលោក កឹម សុខា អាចទៅព្យាបាលជំងឺ បើទោះបីជាតុលាការកំពូលបានបន្តឃុំខ្លួនលោក កឹម សុខា ក៏ដោយ។ អ្នកស្រីសង្ឃឹមថា ព្រះរាជអាជ្ញាក្រុងភ្នំពេញនឹងសម្រេចអនុញ្ញាតតាមសំណើនេះ។
អ្នកស្រី ម៉េង សុភារី ក៏បានឱ្យដឹងដែរថា ការសម្រេចបន្តឃុំខ្លួនលោក កឹម សុខា នេះ ហាក់បីដូចជាដាក់ទណ្ឌកម្មបន្ថែមមួយទៀតទៅលើរូបលោក ដោយហេតុថា បច្ចុប្បន្ននេះលោកពិបាករស់នៅក្នុងពន្ធនាគារ ដោយសារតែជំងឺកំពុងយាយីលោកយ៉ាងធ្ងន់ធ្ងរ។ «»
លោក កឹម សុខា ត្រូវបានតុលាការកំពូលបន្តឃុំខ្លួនកាលពីថ្ងៃទី០៩ ខែមីនា។ លោកត្រូវបានសមត្ថកិច្ចក្រុងភ្នំពេញចាប់ឃុំខ្លួនដោយចោទប្រកាន់ពីបទក្បត់ជាតិ។ លោកត្រូវបានឃុំខ្លួនបណ្ដោះអាសន្ននៅពន្ធនាគារត្រពាំងផ្លុង។ មកទល់នឹងថ្ងៃសុក្រ ទី១៥ ខែមីនានេះ មានរយៈពេលជាង៦ខែហើយ ដែលលោកស្ថិតក្នុងមន្ទីរឃុំឃាំង។
ក្រុមមេធាវីគ្រោងនឹងប្ដឹងសុំឱ្យតុលាការក្រុងភ្នំពេញ ទម្លាក់ចោលបទប្រកាន់លើរូបលោកនៅពេលឆាប់ៗខាងមុខនេះ ដោយសារតែលោកពួកគេយល់ថា តុលាការគ្មានភស្តុតាងណាមួយដាក់បន្ទុកលើរូបលោក កឹម សុខា ទេ ហើយលោកក៏មិនបានប្រព្រឹត្តបទល្មើសព្រហ្មទណ្ឌណាដូចការចោទប្រកាន់ទាំងបំពានច្បាប់ពីរបបក្រុងភ្នំពេញឡើយ៕