សាលាដំបូងខេត្តបន្ទាយមានជ័យ ប្រកាសបន្តឃុំខ្លួនបេក្ខជនជាប់ឆ្នោត ជាចៅសង្កាត់ប៉ោយប៉ែតមកពីគណបក្សសង្គ្រោះជាតិ គឺលោកចៅ វាសនា ពាក់ព័ន្ធនឹងសំណុំរឿងកម្មករអូសរទេះ តវ៉ាហិង្សានៅមុខទីស្នាក់ការគយ និងរដ្ឋាករក្រុងប៉ោយប៉ែត កាលពីខែឧសភា ឆ្នាំ២០១៥ កន្លងទៅ។ គ្រួសារ និងមន្ត្រីសិទ្ធិមនុស្ស ចាត់ទុកសេចក្ដីសម្រេចរបស់តុលាការ គឺជារឿងអយុត្តិធម៌ ព្រោះសំណុំរឿងនេះ ពាក់ព័ន្ធនឹងបញ្ហានយោបាយ។
អ្នកសម្របសម្រួលផ្នែកឃ្លាំមើលការរំលោភសិទ្ធិមនុស្សនៃអង្គការលីកាដូ (Licadho) ប្រចាំខេត្តបន្ទាយមានជ័យ លោក អ៊ិន គង់ជិត មានប្រសាសន៍ថា នៅពេលធ្វើសវនាការ ទោះបីមេធាវី និងលោក ចៅ វាសនា ព្យាយាមពន្យល់ថា លោកមានទីលំនៅច្បាស់លាស់ និងចង់ចេញក្រៅឃុំដើម្បីព្យាបាលសុខភាព ព្រមទាំងប្រកបរបរចិញ្ចឹមគ្រួសារក្ដី ក៏ខាងព្រះរាជអាជ្ញាធរនៃសាលាដំបូងខេត្តបន្ទាយ បដិសេធដែរ។ «»
អាស៊ីសេរី បានព្យាយាមទាក់ទងទៅមេធាវីការពារក្ដីលោក ចៅ វាសនា គឺលោក ជួង ជូងី ជាច្រើនលើក តែលោកពុំទទួលទូរស័ព្ទ។ ចៅក្រមស៊ើបសួរនៃសាលាដំបូងខេត្តបន្ទាយមានជ័យ បានសម្រេចឃុំខ្លួនលោក ចៅ វាសនា នៅពន្ធនាគារខេត្តបន្ទាយមានជ័យ កាលពីថ្ងៃទី១៦ ខែកុម្ភៈ ២០១៧ គឺនៅមុនការបោះឆ្នោតឃុំ-សង្កាត់កាលពីថ្ងៃទី៤ ខែមិថុនា ឆ្នាំ២០១៧ ដោយចោទប្រកាន់ចំនួនបីបទល្មើស គឺទី១ ពីបទញុះញង់ឲ្យប្រព្រឹត្តបទឧក្រិដ្ឋ ទី២ បទសមគំនិត ចូលរួមបំផ្លិចបំផ្លាញទ្រព្យ សម្បត្តិសាធារណៈ ទី៣ ពីបទបំផ្លិចបំផ្លាញទ្រព្យសម្បត្តិសាធារណ ដែលប្រព្រឹត្តនៅមុខទីស្នាក់ការគយ និងរដ្ឋាករក្រុងប៉ោយប៉ែត កាលពីខែឧសភា ឆ្នាំ២០១៥។
កាលពីថ្ងៃទី២៥ ខែឧសភា ឆ្នាំ២០១៥ ក្រុមកម្មករអូសរទេះប្រមាណ ១៥០នាក់ ធ្វើបាតុកម្មទាមទារឲ្យមន្ត្រីគយប្រចាំច្រកទ្វាព្រំដែនអន្តរជាតិប៉ោយប៉ែត បញ្ឈប់យកពន្ធខ្ពស់ហួសហេតុលើការដឹកទំនិញចេញចូលតាមរទេះរុញបន្តទៀត។ ការតវ៉ានេះ បង្កឲ្យមានការប៉ះទង្គិចគ្នាដោយហិង្សារវាងក្រុមកម្មករអូសរទេះ និងកម្លាំងសមត្ថកិច្ច បណ្ដាលឲ្យខូចរថយន្តរបស់គយ និងរដ្ឋាករក្រុងប៉ោយប៉ែត ចំនួន ៧គ្រឿង ព្រមទាំងកញ្ចក់ របង ទ្វា បង្អួចនៃទីស្នាក់ការគយខូចខាតមួយចំនួនទៀត។ ការតវ៉ាបង្កហិង្សាដាក់គ្នានេះ ដោយសារពួកគេឃើញសមត្ថកិច្ចចាប់តំណាងក្រុមអ្នកតវ៉ាម្នាក់វាយធ្វើទារុណកម្ម ហើយពួកគាត់ខឹង ក៏ផ្ទុះហិង្សាដាក់គ្នាតែម្ដង។
លោក អ៊ិន គង់ជិត ឲ្យដឹងថា នៅក្នុងសវនាការ កាលពីថ្ងៃទី១២ ខែមីនា លោកមេធាវី ជូង ជូងី បាន អះអាងថា កូនក្ដីរបស់លោក មិនបានប្រព្រឹត្តដូចការចោទនោះទេ ព្រោះតុលាការ គ្មានភស្តុតាង ណាមួយបញ្ជាក់ថា កូនក្ដីរបស់លោក បានប្រើភាសាញុះញង់ ផ្ដល់មធ្យោបាយដល់អ្នកតវ៉ា និងបាន ចូលរួមប្រព្រឹត្តហិង្សាបំផ្លិចបំផ្លាញអ្វីនោះទេ។ លោកមេធាវី និងលោក ចៅ វាសនា ស្នើសុំឲ្យតុលាការ ទម្លាក់ចោទការចោទប្រកាន់នេះ។ មន្ត្រីសិទ្ធិមនុស្សរូបនេះ យល់ថា តុលាការគួរតែពិនិត្យទៅភស្តុតាងឲ្យល្អិនល្អន់ដើម្បីផ្ដល់យុត្តិធម៌ ដល់លោក ចៅ វាសនា។ «»
លោក ចៅ វាសនា ជាបេក្ខជនចៅសង្កាត់ប៉ោយប៉ែត ដើមកំណើតខ្មែរក្រោម។ លោកត្រូវបានគណបក្សសង្គ្រោះជាតិ ដាក់ឲ្យឈរឈ្មោះជាបេក្ខជនលេខរៀងទី១ នៅសង្កាត់ប៉ោយប៉ែត ក្នុងការចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ កាលពីថ្ងៃទី៤ មិថុនា កន្លងទៅ។ ទោះបីជាលោកនៅក្នុងពន្ធនាគារក្ដី ប៉ុន្តែលទ្ធផលឆ្នោត លោក ចៅ វាសនា ឈ្នះឆ្នោតជាចៅសង្កាត់ប៉ោយប៉ែត។
កូនប្រសាលោក ចៅ វាសនា គឺលោក សឿង សុភឿន មានប្រសាសន៍ថា ប្រសិនបើឪពុកក្មេករបស់ លោកមិនមែនជាសកម្មជនបក្សប្រឆាំងដ៏ល្បីទេនោះ គឺតុលាការប្រាកដជាអនុញ្ញាតឲ្យគាត់បាននៅ ក្រៅឃុំ ព្រោះថាគាត់មិនបានប្រព្រឹត្តកំហុសធ្ងន់ធ្ងរដូចការចោទប្រកាន់។ «»
អ្នកជាប់បណ្ដឹងក្នុងសំណុំរឿងនេះ រួមមានក្រុមកម្មករអូសរទេះចំនួន ១៥នាក់ លោក ចៅ វាសនា ចៅសង្កាត់ប៉ោយប៉ែត និងលោក ឌិន ពុទ្ធី ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា ប៉ុន្តែ មានតែលោកចៅ វាសនាម្នាក់ទេ ដែលជាប់ពន្ធនាគារ។
អ្នកឃ្លាំមើលការបោះឆ្នោតខែត្របន្ទាយមានជ័យ ធ្លាប់លើកឡើងថា ការចោទប្រកាន់ និងចាប់លោក ចៅ វាសនា ដាក់ពន្ធនាគារនេះ ដោយសារតែលោកជាមនុស្សមានប្រជាប្រិយភាព ហើយការចាប់ចងនេះអាចជាចេតនានយោបាយច្រើនជាង៕