ប្រជាកសិករខេត្តប៉ៃលិនកំពុងព្រួយបារម្ភខ្លាចមិនអាចលក់ផ្លែស្វាយគ្រប់សងជំពាក់ស្ថាប័នមីក្រូហិរញ្ញវត្ថុដែលបានខ្ចីគេយកមកធ្វើដើមទុកបាន។
កសិករម្នាក់រស់នៅភូមិស្រះពីរតាឈាន ឃុំ អូរអណ្ដូង ស្រុកសាលាក្រៅ លោកស្រី ជន ហ៊ាន រៀបរាប់ឲ្យដឹងនៅថ្ងៃទី១១មីនាថា តម្លៃផ្លែស្វាយកែវរមៀតឆ្នាំនេះ ចុះថោកជាងឆ្នាំមុនៗ ឆ្ងាយ គឺផ្លែស្វាយមួយគីឡូក្រាមតម្លៃចន្លោះពី ២៥០ទៅ ៣០០រៀលប៉ុណ្ណោះ ដែលកាលពីឆ្នាំកន្លងទៅផ្លែស្វាយតម្លៃពី ៩០០ទៅជាង ១ពាន់រៀលក្នុងមួយគីឡូក្រាម។ លោកស្រីបន្ថែមទៀតថា តម្លៃផ្លែស្វាយនេះ គឺពួកគាត់លក់មិនបានប្រាក់កម្រៃនោះទេ ហើយម្យ៉ាងទៀត ក៏មិនអាចរកប្រាក់ដើម្បីសងជំពាក់ស្ថាប័នមីក្រូហិរញ្ញវត្ថុ ដែលបានខ្ចីគេយកមកធ្វើដើមបានដែរ។
សំឡេង៖ «បើនិយាយទៅស្វាយនៅពេញដើមមិនហ៊ានបេះទេ ហើយបើទុកបានរយៈពេលប្រហែលកន្លះខែទៀត បើទុកយូរជាងនេះវានឹងខូចហើយ ព្រោះស្វាយចាស់ល្មមបេះហើយ។ខ្ញុំទុកស្វាយទ្រឹងចាំមើលក្រែងតម្លៃឡើងបាន៥០០រៀលអីទើបប្រមូលផល ព្រោះចំណាយអស់ដើមទុនច្រើន»។
កសិកររូបនេះអះអាងទៀតថា លោកស្រីដាំស្វាយកែវរមៀតប្រមាណ ១០ហិកតារ គឺចំណាយអស់ដើមទុកក្នុងការថែទាំប្រមាណ ១ម៉ឺន (១០,០០០) ដុល្លារអាមេរិកក្នុងមួយឆ្នាំ។ ដូច្នេះ ប្រសិនបើតម្លៃផ្លែស្វាយត្រឹមតែ ២៥០រៀលក្នុងមួយគីឡូក្រាមដូចបច្ចុប្បន្ន គឺពួកគាត់ច្បាស់ជាជំពាក់បំណុលគេវ័ណ្ឌករជាពុំខាន។
ប្រធានមន្ទីរកសិកម្មរុក្ខាប្រមាញ់ និងនេសាទ ខេត្តប៉ៃលិន លោក សាយ សុផាត មានប្រសាសន៍ថា ផ្លែស្វាយរបស់កសិករខេត្តប៉ៃលិន គឺនាំចេញទៅលក់នៅប្រទេសថៃ។ លោកអះអាងថា តម្លៃផ្លែស្វាយចុះថោក ដោយសាររដូវនេះជារដូវដែលកសិករប្រមូលផលស្វាយច្រើនធ្វើឲ្យទិន្នផលស្វាយមានចំនួនច្រើនជាងតម្រូវការ។ លោកបន្ថែមទៀតថា កន្លងមកមន្ត្រីជំនាញពាក់ព័ន្ធបានទាក់ទងទៅខាងភាគីថៃ ដើម្បីឲ្យមកជួយទិញស្វាយពីកសិកររួចមកហើយដែរ ប៉ុន្តែមិនទាន់បានល្អប្រសើរទាំងស្រុងនៅឡើយ។
សំឡេង៖ «ការដោះស្រាយរបស់យើងធ្លាប់បានធ្វើជាបណ្ដើរៗហើយ ដូចជាទាក់ទងទៅប្រទេសថៃដើម្បីឲ្យគេអនុញ្ញាតឲ្យយើងយកទៅលក់នៅប្រទេសគេ ហើយយើងទាក់ទងតាមក្រុមមួយចំនួន ប៉ុន្តែវាមិនទាន់ឆ្លើយតបបានទាំងស្រុង។ ម្យ៉ាងទៀត ក៏មានឈ្មួញខ្លះក៏គាត់នាំទៅលក់នៅប្រទេសវៀតណាមដែរ ដោយសារតែគាត់មានម៉ូយល្អដែលគេត្រូវការបញ្ជាទិញ»។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន កត់សំគាល់ថា នៅពេលដល់រដូវប្រមូលផលម្ដងៗ គឺដំណាំកសិផលរបស់ប្រជាកសិករគ្រប់ប្រភេទ តែងតែជួបបញ្ហារឿងតម្លៃចុះថោកជារៀងរាល់ឆ្នាំ។ លោកអះអាងទៀតថា មូលហេតុតម្លៃកសិផលចុះថោកមិនឈប់ឈរនេះ គឺដោយសារប្រព័ន្ធរៀបចំដំណោះស្រាយនៅថ្នាក់ជាតិមិនទាន់បានដំណើរល្អប្រសើរ សម្រាប់ជួយដល់កសិករ។
សំឡេង៖ «ហើយមួយវិញទៀតការកែច្នៃស្វាយនិងផលិតកសិផលកសិកម្មនឹង គឺប្រទេសយើងមានតិចតួចណាស់ ជាពិសេសកសិករគាត់មិនមានរោងចក្រក៏ដូចជាមិនមានថវិកាគ្រប់គ្រាន់ទិញឧបករណ៍សម្រាប់ធ្វើឧបករណ៍កែច្នៃកសិផលទុករយៈពេលវែង។ ដូច្នេះ កសិករត្រូវបង្ខំចិត្តលក់ក្នុងតម្លៃថោក ដើម្បីប្រមូលបានធនធាន និងថវិកាខ្លះៗ សម្រាប់ដោះបំណុលដែលពួកគាត់បានខ្ចីគេ»។
តម្លៃផ្លែស្វាយបានចុះថោកខ្លាំងចាប់ពីចុងខែកុម្ភៈមក។ កសិករអះអាងថាតម្លៃដែលពួកគាត់លក់ផ្លែស្វាយបានប្រាក់កម្រៃខ្លះ គឺចាប់ពី ៨០០រៀលក្នុងមួយគីឡូក្រាមឡើងទៅ។ របាយការណ៍មន្ទីរកសិកម្ម រុក្ខាប្រមាញ់ខេត្តសៀមរាប ឲ្យដឹងថា ដំណាំស្វាយនៅខេត្តមួយនេះ មានប្រមាណ ៣.៥០០ហិកតារ ហើយភាគច្រើនជាស្វាយកែវរមៀត ក្នុងនោះស្វាយដែលកំពុងហុចផលមានជាង ២,០០០ហិកតារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។