ពលរដ្ឋដែលមានវិវាទដីធ្លីជាមួយក្រុមហ៊ុនសម្បទានសេដ្ឋកិច្ចវៀតណាម រស់នៅឃុំពីរធ្នូ ស្រុកស្នួល ខែត្រក្រចេះ ឲ្យដឹងនៅថ្ងៃទៅ ១១ មីនា ថា រហូតមកទល់ពេលនេះសមត្ថកិច្ចខេត្តក្រចេះ នៅតែ ពង្រាយកម្លាំងប្រដាប់អាវុធយាមការយ៉ាងតឹងរ៉ឹង ក្នុងទីតាំងដីមានជម្លោះរវាងពលរដ្ឋរាប់រយគ្រួសារ និង ក្រុមហ៊ុនសម្បទានសេដ្ឋកិច្ច របស់វៀតណាម។
ពលរដ្ឋដែលប្រទះឃើញព្រឹត្តិការណ៍ ប៉ះទង្គិចគ្នានោះ ពុំហានចេញមុខប្រាប់អ្នកកាសែត និងអង្គការសង្គមស៊ីវិល នោះទេ ព្រោះបារម្ភខ្លាចអាជ្ញាធរចាប់ខ្លួន។
ពលរដ្ឋម្នាក់ក្នុងចំណោមពលរដ្ឋជាច្រើនរស់នៅភូមិជើងឃ្លេ ឃុំពីរធ្នូ ថ្លែងក្នុងលក្ខខណ្ឌមិនបញ្ចេញឈ្មោះ កាលពីថ្ងៃទី៨ មីនា ថា លោកបាន ប្រទះឃើញពលរដ្ឋពីរនាក់ ត្រូវគ្រាប់កាំភ្លើងចំពោះ ធ្លាយដល់ខ្នង ហើយម្នាក់ទៀតត្រូវគ្រាប់កាំភ្លើង ចំគល់ដោះ ធ្លាយដល់ខ្នងដែរ បណ្ដាលឲ្យស្លាប់ភ្លាមៗនៅហ្នឹងកន្លែង។
ចំណែកអ្នកតវ៉ាមិនហានចូលជួយនោះទេ ព្រោះបារម្ភពីសុវត្ថិភាព និងបានរត់គេចរៀងៗខ្លួន។ ទោះជាយ៉ាងណាក៏ដោយ មនុស្ស៦នាក់ផ្សេងទៀត បានស្លាប់នៅគ្រាដែលបញ្ជូនទៅ មន្ទីរពេទ្យ។ «»
បុរសដដែលបន្ថែមថា មួលហេតុដែលនាំឲ្យផ្ទុះការតវ៉ា ដោយសារ អាជ្ញាធរខេត្តក្រចេះ បាននាំគ្នាចុះដុះផ្ទះរបស់ពួកគាត់អស់ជាច្រើនខ្នង ហើយកម្ទេចផលដំណាំរបស់ពួកគាត់ដែលខំបង្កបង្កើនផល។ លោកបន្តថា ជាការឆ្លើយឲ្យពលរដ្ឋខឹងសម្បារ ដោយនាំគ្នាតវ៉ាបិទផ្លូវ ដើម្បីទាមទារឲ្យមានដំណោះស្រាយ។
លោកថា ពលរដ្ឋដែលឃើញ ព្រឹត្តិការណ៍ប៉ះទង្គិចនោះ ត្រូវអាជ្ញាធរឃ្លាំមើលគ្រប់ពេល បណ្តាលឲ្យពួកគាត់មួយចំនួនភ័យខ្លាចមិនហានផ្ដល់ព័ត៌មាន។ «»
អាស៊ីសេរីបានព្យាយាមទាក់ទង មេឃុំពីរធ្នូ លោក ប៉ឹង វិន ជាច្រើនដង ដើម្បីបំភ្លឺជុំវិញរឿងនេះ តែទូរស័ព្ទរបស់លោក មិនអាចទាក់ទងបាន។
សាលាខែត្រក្រចេះ កាលពីថ្ងៃទី០៨ មីនា បានសេចក្ដីប្រកាសព័ត៌មាន បដិសេធ ភ្លាមៗ ចំពោះការចុះផ្សាយរបស់សារព័ត៌មានមួយចំនួន អំពីការបាញ់សម្លាប់អ្នកភូមិក្នុងពេលតវ៉ាករណីដីធ្លី នៅស្រុកស្នួល ជាមួយក្រុមហ៊ុនចម្ការកៅស៊ូមេមត់នោះថាជារឿងមិនពិត។ ប៉ុន្តែផ្ទុយទៅវិញ អាជ្ញាធរបញ្ជាក់ថា ហេតុការណ៍ប៉ះទង្គិចក្នុងខេត្តក្រចេះនោះ មានតែមនុស្ស ៩នាក់ ប៉ុណ្ណោះ របួស ក្នុងនោះ៧នាក់ជាសមត្ថកិច្ច។
ព្រះរាជអាជ្ញាអមតុលាការខេត្តក្រចេះ កាលពីថ្ងៃសៅរ៍ ក៏បានចេញសេចក្ដីថ្លែងការណ៍ថា ហេតុការណ៍បាញ់រះទៅលើពលរដ្ឋ ក្នុងករណីតវ៉ាបញ្ហាដីធ្លីក្នុងខេត្តនេះ ពុំមានការស្លាប់និងរបួសនោះទេ។ ហើយថាការចុះផ្សាយរបស់សារព័ត៌មានមួយចំនួនបំផ្លើសពីការពិត។
ក្រុមយុវជន ដែលតាមដានព្រឹត្តិការណ៍នៅស្រុកស្នួល ខេត្តក្រចេះ បានចាត់ទុក ការចេញសេចក្តីប្រកាសព័ត៌មានរបស់តំណាងអយ្យការ អមសាលាដំបូងខេត្តនេះ ថាមានចេតនាបិទបាំងការពិត និងមានភាពលម្អៀង ហើយមិនបានបើកការស៊ើបអង្កេតករណីកងទ័ព ប្រើកាំភ្លើង បាញ់រះមនុស្សឲ្យរបួសជាច្រើននាក់នោះទេ។
យុវជនរស់នៅរាជធានីភ្នំពេញ កញ្ញា ខាត់ ឆវី ដែលតែងតាមដានព្រឹត្តិការណ៍នេះ យល់ថា កញ្ញាពុំមានជំនឿលើប្រព័ន្ធយុត្តិធម៌នៅកម្ពុជាទេ ហើយថា ការប៉ះទង្គិច គ្នារវាងពលរដ្ឋ និងអាជ្ញាធរកំពុងឋិតក្នុងភាពអាថ៌កំបាំង និងមន្ទិលសង្ស័យនៅឡើយ។ តែយ៉ាងណាកញ្ញាគាំទ្រឲ្យមានការបើកទូលាយ លើកិច្ចសហការស៊ើបអង្កេតរឿងនេះដោយ ឯករាជ្យ ពីភាគីពាក់ព័ន្ធ រួមមាន សង្គមស៊ីវិល អាជ្ញាធរ ពលរដ្ឋ និងតុលាការ។ «»
ប្រធានក្រុមអ្នកវិភាគវ័យក្មេង លោក ហង្ស វិទូ យល់ថាការស៊ើបអង្កេត ឲ្យបានត្រឹមត្រូវលើសំណុំរឿងនេះ ដើម្បីផ្ដល់យុត្តិធម៌ដល់ពលរដ្ឋ គឺជាយន្តការត្រឹមត្រូវតាមច្បាប់ ប្រសើរជាងដាក់បន្ទុកតែ លើប្រព័ន្ធផ្សព្វផ្សាយមួយចំនួន ដែលលោកចាត់ទុកថា អាជ្ញាធរអនុវត្តច្បាប់ផ្អែកតាមអារម្មណ៍។ លោកថាការបង្ក្រាបដោយហិង្សា និងបង្កការបំភិតបំភ័យដល់ពលរដ្ឋ ដោយកងកម្លាំងប្រដាប់អាវុធ នឹងបង្កឲ្យមហាជនរិះគន់ និងថ្កោលទោស។ «»
ចំណែកក្រុមពលរដ្ឋដែលតវ៉ាក្នុងរឿងជម្លោះដីធ្លីជាមួយក្រុមសម្បទានសេដ្ឋកិច្ចវៀតណាមនៅខេត្តក្រចេះនោះ បានចាត់ទុកសេចក្ដីជូនដំណឹង របស់អាជ្ញាធរថា ជាការបំផ្លើសពីការពិត។ ពលរដ្ឋអះអាងថា សមត្ថកិច្ច បានដកហូតទូរស័ព្ទពួកគេដែលថតបានអ្នកស្លាប់ក្នុងហេតុការណ៍នោះ និងដឹកសាកសពទៅលាក់ទុកដើម្បីបំបាត់ភស្តុតាង និងគេចវេះពីការទទួលខុសត្រូវ៕