ក្រុមស្ត្រីរងគ្រោះដីធ្លីជិត ១០០នាក់ នៅស្រុកស្រែអំបិល ខេត្តកោះកុង នាំគ្នាប្រារព្ធទិវាសិទ្ធិនារីអន្តរជាតិ ថ្ងៃទី៨ ខែមីនា នៅខាងមុខក្រុមហ៊ុនស្ករអំពៅ ដែលជាក្រុមហ៊ុន បានរំលោភយកដីធ្លី និងរំលោភសិទ្ធិរបស់ពួកគាត់ជាង ១០ឆ្នាំកន្លងមក។ អាជ្ញាធរខេត្ត ចាត់ទុកថា ការជួបជុំរបស់ក្រុមស្ត្រីសហគមន៍ទាំងនោះ គឺជាការប្រមូលផ្ដុំតវ៉ារឿងដីធ្លីដាច់ដោយឡែក មិនមែនពាក់ព័ន្ធនឹងទិវាសិទ្ធិនារីឡើយ។
តំណាងសហគមន៍រងគ្រោះដីធ្លីស្រុកស្រែអំបិល លោកស្រី ផាវ ញ៉ឺង ឲ្យដឹងថា ការដែលពួកគាត់នាំ គ្នាប្រារព្ធទិវាសិទ្ធិនារីអន្តរជាតិ ៨មីនា នៅខាងមុខរោងចក្រស្ករអំពៅនេះ ដើម្បីបង្ហាញសារទៅក្រុមហ៊ុន និងរដ្ឋាភិបាលថា ពួកគាត់ បានបាត់បង់សិទ្ធិស្ទើរគ្រប់បែបយ៉ាង ដោយសារតែទំនាស់ដីធ្លីរ៉ាំរ៉ៃរវាងពលរដ្ឋ ១៧៥គ្រួសារ ជាមួយនឹងក្រុមហ៊ុនស្ករអំពៅ ចាប់តាំងពីឆ្នាំ២០០៦មក។
លោកស្រី ផាវ ញ៉ឺង បន្តថា បន្ទាប់ពីក្រុមហ៊ុនស្ករអំពៅរំលោភយកដីធ្លីពួកគាត់នោះ គឺស្ត្រីក្នុងតំបន់ របស់គាត់ជួបប្រទះបញ្ហាជាច្រើនរួមមានធ្លាក់ខ្លួនក្រីក្រ គ្មានទីលំនៅ គ្មានដីធ្លីធ្វើស្រែចម្ការ ជំពាក់ បំណុលវ័ណ្ឌក ហើយបង្កទៅជាអំពើហិង្សាក្នុងគ្រួសារ គ្មានពេលមើលថែខ្លួន និងកូនៗ រហូតដល់ កូនៗរបស់ពួកគេ បាត់បង់ការសិក្សាទៀតផង។ លើសពីនេះ នៅពេលពួកគាត់ជាស្ត្រី នាំគ្នាចេញ តវ៉ារកដំណោះស្រាយដីធ្លីម្តងៗ ត្រូវបានខាងក្រុមហ៊ុន និងអាជ្ញាធរ រើសអើង រុញច្រាន ជេរប្រមាថ គំរាមកំហែងចាប់ខ្លួន រហូតដល់ប្រើហិង្សា មានរបួសស្នាមធ្លាក់ខ្លួនឈឺ និងមិនដែលទទូលបានយុត្តិធម៌ជាដើម។ លោកស្រី បន្ថែមថា ការផ្ដល់ដំណោះស្រាយដីធ្លី គឺជាការចូលរួមគោរពសិទ្ធិស្ត្រីនៅក្នុងតំបន់គាត់។
ទំនាស់ដីធ្លីរ៉ាំរ៉ៃដែលបានអូសបន្លាយពេលជាង ១០ឆ្នាំនេះ គឺមានវិវាទរវាងពលរដ្ឋ១៧៥គ្រួសារ ក្នុងភូមិចំនួន៦ ស្ថិតក្នុងឃុំចំនួន៣ គឺឃុំជីខក្រោម ឃុំជីខលើ និងឃុំដងពែង ស្រុកស្រែអំបិល ជាមួយ នឹងជាមួយភាគីក្រុមហ៊ុនលោកឧកញ៉ា ហ៊ុយ ហេង និងក្រុមហ៊ុនឈ្មោះកោះកុង ស៊ូហ្គើ (Kohkong Sugar) និងក្រុមហ៊ុន កោះកុង ផ្លេនថេសិន (Kohkong Plantation) របស់អ្នកវិនិយោគទុនថៃ ដែល បានទិញភាគហ៊ុនពីលោកឧកញ៉ា លី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា។
កន្លងមក ក្រសួងរៀបចំដែនដី នគរូបនីយកម្ម និងសំណង់ បានព្រមព្រៀងដោះស្រាយជាមួយពលរដ្ឋ ថា នឹងផ្ដល់សំណងជំងឺចិត្តក្នុងមួយគ្រួសារជាដី ៣ហិកតារ និងថវិកា ២.៥០០ដុល្លារ តែមកដល់ ពេលនេះ គឺកំពុងមានសភាពស្ងប់ស្ងាត់ ពុំមានដំណោះស្រាយអ្វីតាមការសន្យានោះទេ។ កាលពី ថ្ងៃទី៧ ខែមីនា អភិបាលរងខេត្តកោះកុង លោក អ៊ន ភារៈ សន្យាថា នឹងចុះដោះស្រាយជូនពលរដ្ឋ នៅថ្ងៃអង្គារទី១៣ សប្ដាហ៍ក្រោយ។
ចំពោះទិវាសិទ្ធិនារី ៨មីនានេះ លោកស្រី ផាវ ញ៉ឺង ក៏បានសម្ដែងការខកចិត្តចំពោះអភិបាលខេត្តកោះ កុង អ្នកស្រី មិថុនា ភូថង និងប្រធានមន្ទីរកិច្ចការនារីខេត្តកោះកុង អ្នកស្រី សុខ សុធារី ដែលមិនបានចូលរួម និងបង្ហាញការយកចិត្តទុកដាក់ចំពោះក្រុមស្ត្រីរងគ្រោះដីធ្លីដូចពួកគាត់។ ផ្ទុយទៅវិញបែរជា ថ្នាក់ដឹកនាំខេត្ត ទៅចូលរួមលើកកម្ពស់សិទ្ធិនារីនៅឯមជ្ឈមណ្ឌលកោះពេជ្រ ក្រុងភ្នំពេញ ដែលស្ត្រីទាំងនោះ សុទ្ធតែស្លៀកពាក់ខោអាវហូលប៉ាក់ផាមួង និងពាក់គ្រឿងអលង្កាថ្លៃៗ និងសុទ្ធតែទទួលបានសិទ្ធិពេញលេញទៅហើយ។ «»
ប្រធានមន្ទីរកិច្ចការនារីខេត្តកោះកុង អ្នកស្រី សុខ សុធារី លើកឡើងថា ក្នុងឱកាសទិវាសិទ្ធិនារីអន្តរជាតិលើកទី១០៧នេះ គឺកាលពីថ្ងៃទី៦ ខែមីនា អ្នកស្រីបានប្រារព្ធមិទ្ទិញអបអរដល់ស្ត្រី ជាមន្ត្រីរាជការក្នុងខេត្តកោះកុង តាមឋានានុក្រម ចាប់តាំងពីថ្នាក់ខេត្តដល់ថ្នាក់ឃុំ និងបានចែកអំណោយខ្លះ ដល់ស្ត្រីចាស់ជរាជានិមិត្តរូប នៃទិវាសិទ្ធិនារី។ ដោយឡែកនៅថ្ងៃទី៨ មីនានេះ អ្នកស្រី បានអញ្ជើញ ស្ត្រីដែលជាអភិបាលរងស្រុក ក្រុងនិងខេត្ត ចូលរួមពិធីធំនៅមជ្ឈមណ្ឌលកោះពេជ្រ។ អ្នកស្រីបន្ថែម ថា ចំពោះការប្រមូលផ្ដុំរបស់ក្រុមស្ត្រីរងគ្រោះដីធ្លីទាំងនោះ គឺមិនពាក់ព័ន្ធនឹងទិវាសិទ្ធិនារីឡើយ ហើយពួកគេ ក៏មិនបានរងគ្រោះដោយការវាយដុំ ឬរំលោភបំពានអ្វីដែរកន្លងមក ពោលគឺពួកគាត់ តែងតែប្រមូលផ្ដុំដើម្បីតែទាមទាររឿងដីធ្លីរបស់ពួកគាត់ប៉ុណ្ណោះ។ «»
អ្នកសម្របសម្រួលផ្នែកឃ្លាំមើលការរំលោភសិទ្ធិមនុស្សនៃអង្គការលីកាដូ (Licadho) លោក អ៊ិន គង់ជិត ដែល ធ្លាប់តាមដានករណីស្ត្រីរងគ្រោះដីធ្លី មានប្រសាសន៍ថា រយៈពេលជាង ១០ឆ្នាំនេះ ស្ត្រីទាំងនោះ តែងតែដើរស្រែកទាមទាររកដំណោះស្រាយដីធ្លីជាបន្តបន្ទាប់ ហើយត្រូវប្រឈមនឹងអំពើហិង្សាពីខាង អាជ្ញាធរជាញឹកញយដែរ ដូច្នេះ ប្រសិនបើថ្នាក់ដឹកនាំខេត្តកោះកុង បានតាមដានករណីពួកគាត់នោះ ប្រាកដជាយល់ថា ពួកគាត់រងគ្រោះធ្ងន់ធ្ងរបំផុត។ លោកសង្ឃឹមថា លោកជំទាវអភិបាលខេត្ត និងអ្នកស្រីប្រធានមន្ទីរជួយជំរុញរឿងដីធ្លីរបស់ស្ត្រីរងគ្រោះនៅស្រុកស្រែអំបិលនោះ ឲ្យបានឆាប់ចប់ ដើម្បីចូលរួមលើកកម្ពស់សិទ្ធិរបស់ពួកគាត់ឡើងវិញ។ «»
មិនមែនតែស្ត្រីដែលក្នុងស្រុកស្រែអំបិល ខេត្តកោះកុងទេ ដែលរងគ្រោះដីធ្លី និងត្រូវបានគេរំលោភ បំពានសិទ្ធិនោះ គឺមានស្ត្រីជាច្រើនទៀតនៅតាមបណ្ដាខេត្តនានា។ កន្លងមក ក៏មានសកម្មជនដីធ្លី មួយចំនួន ត្រូវអាជ្ញាធររដ្ឋាភិបាលចាបដាក់ពន្ធនាគារ ដោយសារតវ៉ាទាមទារលំនៅឋាន និងដីធ្លីរបស់ខ្លួន ក្នុងនោះមានសកម្មជនដីធ្លីតំបន់បឹងកក់ដ៏ល្បីម្នាក់ គឺអ្នកស្រី ទេព វន្នី មិនទាន់ត្រូវបានដោះលែងនៅឡើយ។
ស្ត្រីរងគ្រោះនៅសហគមន៍ដីធ្លីនានា ក៏បានស្នើដល់ប្រមុខដឹកនាំរដ្ឋាភិបាល និងស្ថាប័នរដ្ឋពាក់ព័ន្ធ ឲ្យពិចារណាដោះលែងសកម្មជនសិទ្ធិមនុស្ស និងសកម្មជនដីធ្លីរួមមានអ្នកស្រី ទេព វន្នី ជាដើមដែល កំពុងជាប់ពន្ធនាគារនៅទូទាំងប្រទេស ដើម្បីធានាឲ្យស្ត្រីអាចមានសិទ្ធិស្មើភាពគ្នាជាមួយបុរស។ ជាងនេះទៀត ត្រូវជួយលើកស្ទួយ ឬផ្ដល់តួនាទីឲ្យស្ត្រីអាចមានឱកាសចូលរួមកិច្ចការងារអភិវឌ្ឍសង្គមនៅតាមស្ថាប័នរដ្ឋឲ្យបានច្រើនដូចបុរសដែរ៕