Clik here to view.
អង្គការសមាគមអភិរក្សសត្វព្រៃ (WCS) និងអាជ្ញាធរខេត្តព្រះវិហារ បានបញ្ចប់ការបោះបង្គោលកំណត់ព្រំប្រទល់តំបន់បេតិកភណ្ឌធម្មជាតិភ្នំត្បែង។ ការបោះបង្គោលកំណត់ព្រំប្រទល់ ដែលទើបបញ្ចប់នេះ គឺជាភាពជោគជ័យមួយ ព្រោះបង្គោលទាំងនេះ នឹងបង្កភាពងាយស្រួលសម្រាប់មន្ត្រីឧទ្យានុរក្សចុះបំពេញការងារដើរល្បាតព្រៃនៅក្នុងតំបន់បេតិកភណ្ឌធម្មជាតិភ្នំត្បែងនេះ និងងាយស្រួលសម្រាប់ពង្រឹងការងារអនុវត្តន៍ច្បាប់ ការពារព្រៃឈើ និងសត្វព្រៃ។
បង្គោលព្រំធ្វើអំពីស៊ីម៉ង់ចំនួន ៤០ដើម ត្រូវបានបោះនៅទីតាំងសំខាន់ៗ មួយចំនួន ស្ថិតនៅតាមព្រំប្រទល់តំបន់ការពារនៃបេតិកភណ្ឌធម្មជាតិភ្នំត្បែងនេះ ដោយមានការចូលរួមដោយមន្ត្រីរដ្ឋបាលថ្នាក់ក្រោមជាតិ ខេត្តព្រះវិហារ មន្ទីរបរិស្ថាន ប្រជាសហគមន៍ សហការជាមួយនាយកដ្ឋានបេតិកភណ្ឌ នៃអគ្គសហគមន៍មូលដ្ឋានរបស់ក្រសួងបរិស្ថាន និងអង្គការសមាគមអភិរក្សសត្វព្រៃ (WCS)។
មន្ត្រីអង្គការសមាគមអភិរក្សសត្វព្រៃ លោក អេង ម៉េងអ៊ី ឱ្យអាស៊ីសេរីដឹងកាលពីថ្ងៃទី២២ ខែកុម្ភៈថា ការបោះបង្គោលព្រំប្រទល់ច្បាស់លាស់ គឺអាចជួយដោះស្រាយបញ្ហាជាច្រើនដែលអាចបង្កអោយមានការខូចខាតនានា មកលើតំបន់បេតិកភណ្ឌធម្មជាតិមួយនេះ៖ «ការបង្កើតជាតំបន់ការពារមួយ ជាទូទៅវាមានបញ្ហាព្រំប្រទល់ វាជាប់ទៅនឹងស្រែចម្ការអ្នកភូមិ វត្តអារាម ជាដើម។ ការបោះបង្គោល គោលបំណងសំខាន់ទីមួយគឺ កាត់បន្ថយការកាប់បំផ្លាញព្រៃឈើ ជាពិសេសការកាប់ទន្ទ្រានព្រៃយកជាកម្មសិទ្ធិ បើសិនគ្មានបង្គោលអីច្បាស់លាស់ទេ ពេលគាត់ចូលមកយើងពិបាកពន្យល់ ឬប្រាប់គាត់ថាកន្លែងហ្នឹងជាតំបន់អភិរក្ស។ មួយទៀតសម្រាប់មន្ត្រីឧទ្យានុរក្ស ក៏គាត់ជួបប្រទះការលំបាកដែរបើគ្មានបង្គោលច្បាស់លាស់ នៅពេលពួកគាត់ដើរល្បាត»។
តំបន់បេតិកភណ្ឌធម្មជាតិភ្នំត្បែង គឺជាទីកន្លែងវប្បធម៌ប្រវត្តិសាស្ត្រ ដែលពលរដ្ឋខេត្តព្រះវិហារ និងក្នុងទូទាំងប្រទេស ចាត់ទុកជាទីសក្ការបូជាផង និងជាកន្លែងមានសក្ដានុពល សម្រាប់វិស័យទេសចរណ៍ធម្មជាតិផង ដែលជារៀងរាល់ឆ្នាំ មានពលរដ្ឋជាច្រើននាក់ ឡើងទៅលើភ្នំត្បែងនេះ ដើម្បីគោរពបួងសួង និងកម្សាន្ត។ ការបោះបង្គោលព្រំនេះ នឹងជួយឲ្យប្រជាជនសហគមន៍បានដឹងអំពីទីតាំងព្រំប្រទល់តំបន់ការពារ និងជាមូលដ្ឋានសម្រាប់ការរៀបចំផែនការដើរល្បាតរបស់មន្ត្រីឧទ្យានុរក្ស។
ទីប្រឹក្សាបច្ចេកទេសអង្គការ WCS ប្រចាំតំបន់ខ្ពង់រាបភាគខាងជើងខេត្តព្រះវិហារ លោក គ្រីស ហាំលី (Chris Hamley) ថ្លែងថា ខ្ពង់រាប និងព្រៃឈើនៃតំបន់បេតិកភណ្ឌធម្មជាតិភ្នំត្បែង គឺជាអាងស្តុកទឹក ដែលដើរតួនាទីយ៉ាងសំខាន់ក្នុងការការពារទីជម្រាល និងទប់ស្កាត់គ្រោះធម្មជាតិ ដូចជាការបាក់ដីជាដើម។ ការធានាការគ្រប់គ្រងបានរយៈពេលយូរអង្វែងនៃតំបន់បេតិកភណ្ឌធម្មជាតិភ្នំត្បែង និងជីវចម្រុះក្នុងតំបន់នេះ នឹងផ្ដល់តម្លៃផ្នែកសង្គម និងសេដ្ឋកិច្ចសម្រាប់ប្រជាសហគមន៍ និងមនុស្សជំនាន់ក្រោយៗ ទៀត។
តំបន់បេតិកភណ្ឌធម្មជាតិភ្នំត្បែង គ្របដណ្ដប់លើទំហំផ្ទៃដីជាង ២ម៉ឺន ៥ពាន់ (២៥.២៦៩) ហិកតារ និងមានរយៈកម្ពស់រហូតដល់ ៤០០ម៉ែត្រ។ ភ្នំត្បែង ត្រូវបានដាក់ជាតំបន់ការពារធម្មជាតិនៅក្នុងឆ្នាំ ២០១៦ និងជាផ្នែកដ៏សំខាន់មួយនៃអាងស្តុកទឹកប៉ែកខាងលើដងស្ទឹងសែន ដែល ជាដៃបឹងទន្លេសាប៕
