ក្រុមប្រជាពលរដ្ឋខ្មែរនៅអូស្ត្រាលី ប្រកាសថា ពួកគាត់នឹងកាន់តែនាំគ្នាធ្វើរូបទីងមោងលោក ហ៊ុន សែន និងដុតរូបទីងមោងលោកនាយករដ្ឋមន្ត្រី ហ៊ុន សែន ក្នុងឱកាសដែលលោកនាយករដ្ឋមន្ត្រីមកចូលរួមកិច្ចប្រជុំកំពូលអាស៊ាន នៅនៅទីក្រុងស៊ីដនី ប្រទេសអូស្ត្រាលី នាពាក់កណ្ដាលខែមីនា ខាងមុខ។
ការប្រកាសបែបនេះ ជាការឆ្លើយតបភ្លាមៗ ទៅលោក ហ៊ុន សែន ដែលប្រកាសព្រមានពលរដ្ឋខ្មែរនៅអូស្ត្រាលី នៅក្នុងពិធីជួបជុំកម្មករនៅព្រឹកថ្ងៃទី២១ ខែកុម្ភៈ ថា លោកនឹងតាមវាយដល់ផ្ទះចំពោះអ្នកណាហើយធ្វើរូបលោកជាទីងមោងហើយដុតចោលនោះ។
តំណាងរាស្ត្រអូស្ត្រាលី ដើមកំណើតខ្មែរ លោក ហុង លីម ថ្លែងចំអកទៅលោក ហ៊ុន សែន វិញថា លោក ហ៊ុន សែន គួរតែស្វែងយល់ច្បាប់អូស្ត្រាលី ឲ្យបានច្បាស់ មុននឹងលោកសម្រេចចិត្តមកចូលរួមកិច្ចប្រជុំកំពូលអាស៊ាន-អូស្ត្រាលី។ លោកបញ្ជាក់ថា អូស្ត្រាលីមិនមែនជាប្រទេសផ្ដាច់ការដូចរបបក្រុងភ្នំពេញ ដែលលោក ហ៊ុន សែន ចង់ធ្វើអ្វីស្រេចតែចិត្តនោះទេ។ លោកអះអាងថា ការប្រកាសរបស់លោក ហ៊ុន សែន បែបនេះ នឹងធ្វើអោយក្រុមបាតុករកាន់តែមានចិត្តចង់ធ្វើរូបទីងមោងលោក ហ៊ុន សែន កាន់តែធំ កាន់តែច្រើន ដើម្បីដុតស្វាគមន៍លោក ហ៊ុន សែន៖ «ខ្ញុំមិនដឹងថាត្រូវសើច ឬត្រូវយំ ឬភ័យខ្លាច រន្ធត់នូវការគំរាមកំហែង ភេរវកម្ម ចង់មកវាយកាប់សម្លាប់បងប្អូនខ្មែរនៅអូស្ត្រាលី ដល់ផ្ទះគេហ្នឹង។ នេះជាពាក្យថា ភេរវកម្ម ជាឧក្រិដ្ឋកម្មហើយ។ ខ្ញុំឮប្រតិកម្មពីបងប្អូនខ្មែរយើងច្រើនណាស់ថា គេនឹងធ្វើទីងមោងឲ្យច្រើនបំផុតដើម្បីយកទៅដុត ដើម្បីឲ្យគាត់តាមវ៉ៃគេទៅ...»។
លោក ហ៊ុន សែន បានព្រមានពលរដ្ឋខ្មែរអូស្ត្រាលីថា លោកក៏មានអ្នកគាំទ្រលោកនៅក្រៅប្រទេសដែរ ដូច្នេះអ្នកដែលធ្វើបាតុកម្មប្រឆាំងរួបលោកត្រូវប្រយ័ត្នខ្លួន ឲ្យតែហ៊ានយករូបលោកធ្វើជាទីងមោងហើយដុតចោលនោះ លោកនឹងមិនលើកលែងឲ្យជាដាច់ខាត៖ «អ្នកធ្វើបាតុកម្ម ស្រែកឡូឡានៅខាងក្រៅវាតិច តែអ្នកដែលមកជួបស្វាគមន៍ ហើយសុំសែលហ្វី វាច្រើនជាង។ ធ្វើទៅ! ស្រែកទៅ! ប៉ុន្តែសូមផ្ដាំ កុំដុតរូបអោយសោះ! ដុតរូបអញតាមដល់ផ្ទះ ប្រាប់អោយហើយ។ ជំនាន់ធ្វើបាតុកម្ម ២០១៣ អត់ហ៊ានដែរ សម្ដេចក្រឡាហោម ប្រាប់ទៅទូតអាមេរិកាំងថា ឯកឧត្ដម ប្រាប់ពួកអ្នកធ្វើបាតុកម្ម ស្រុកខ្មែរអប្បិយជំនឿ បើហ៊ានតែធ្វើរូប ហើយដុតរូប ច្បាស់ជាមានរឿងហើយ ហើយខ្ញុំប្ដូរផ្ដាច់ពេលហ្នឹង បើហ៊ានតែធ្វើរូបទីងមោង រូបខ្ញុំយកទៅដុត អញតាមវ៉ៃដល់ផ្ទះអ្ហែង ប្រាប់អោយហើយ! បើអ្នកឯងមានសិទ្ធិដុតគេ គេមានសិទ្ធិវ៉ៃអ្នកឯង មានទាស់ខុសអី?...»។
ក្រៅពីលោក ហ៊ុន សែន ព្រមានតាមវាយអ្នកប្រឆាំងលោកដល់ផ្ទះនេះ កាលពីពេលថ្មីៗនេះ ក៏មានបុរសម្នាក់ឈ្មោះ គង ប៊ុនទូ ដែលជាក្រុមសេនានាគរបស់លោក ហ៊ុន សែន ក៏ព្រមានតាមបាញ់សម្លាប់ពលករខ្មែរនៅប្រទេសកូរ៉េ រហ័សនាមក្នុងគណនីហ្វេសប៊ុក ឈ្មោះ "សង្ហា" ដែរ។ សង្ហា គឺជាសកម្មជនដ៏សកម្មនៅក្នុងបណ្ដាញសង្គម ប្រឆាំងដាច់ខាតរបបផ្ដាច់ការរបស់លោក ហ៊ុន សែន ដែលបំផ្លាញលទ្ធិប្រជាធិបតេយ្យនៅកម្ពុជា និងរំលាយគណបក្សសង្គ្រោះជាតិនោះ។ ក្រុមសេនានាគរបស់លោក ហ៊ុន សែន នេះ ធ្លាប់បានប្រើអំពើហិង្សាលើតំណាងរាស្ត្រគណបក្សសង្គ្រោះជាតិ ពីររួប គឺលោក គង់ សុភា និង ញ៉យ ចំរើន។ ការប្រើអំពើហិង្សានេះ នៅបន្ទាប់ពីលោក ហ៊ុន សែន ប្រកាសបើកភ្លើងខៀវដែរ។
ដោយហៅអំពើលោក ហ៊ុន សែន ថាអាក្រក់ជាងសត្វតិរច្ឆានទៅទៀតនោះ លោក ហុង លីម មានប្រសាសន៍ថា គោលបំណងនៃកិច្ចប្រជុំកំពូលអាស៊ាន-អូស្ត្រាលីនេះ គឺដើម្បីរួមគ្នាកម្ចាត់អំពើភេរវកម្មនៅតំបន់អាស៊ី តែលោកថា វាស្រាប់តែមេប្រតិភូនៃប្រទេសមួយមកចូលរួមក្នុងកិច្ចប្រជុំនេះទើបតែប្រកាសអំពីបំណងទៅធ្វើភេរវកម្មក្នុងទឹកដីអូស្ត្រាលី ទៅវិញ៖ «គួរអោយអស់សំណើចបំផុតនោះគឺថា លោក ហ៊ុន សែន មកពិធីហ្នឹងដើម្បីជំនុំធ្វើសហប្រតិបត្តិការជាមួយប្រទេសអូស្ត្រាលី ព្រោះប្រទេសអូស្ត្រាលី កំពុងថ្នាក់ថ្នមជាមួយប្រទេសអាស៊ីអាគ្នេយ៍ដើម្បីប្រឆាំងនឹងភេរវកម្ម ព្រោះភ័យខ្លាចណាស់ ភេរវកម្មពីឥណ្ឌូនេស៊ី ឥឡូវនេះគឺខ្មែរហ្នឹងតែម្ដងមកធ្វើភេរវកម្មលើទឹកដីរបស់ខ្លួន ក្នុងប្រទេសអូស្ត្រាលី ហ្នឹង មករកវ៉ៃ រកកាប់សម្លាប់គេអ៊ីចឹង ខ្ញុំហួសចិត្ត...»។
សមាជិកព្រឹទ្ធសភាខាងគណបក្សពលករដែលជាគណបក្សប្រឆាំងក្នុងប្រទេសអូស្ត្រាលី ជំរុញឲ្យរដ្ឋាភិបាលនៃប្រទេសមួយនេះបង្ហាញការគាំទ្រយ៉ាងខ្លាំងរបស់ខ្លួនទៅលើលទ្ធិប្រជាធិបតេយ្យនៅកម្ពុជា និងការគោរពសិទ្ធិមនុស្សនៅចំពោះមុខលោក ហ៊ុន សែន នៅពេលលោកមកចូលរួមកិច្ចប្រជុំកំពូលអូស្ត្រាលី-អាស៊ាន នៅខែក្រោយនេះ។
តាមរយៈសេចក្ដីប្រកាសព័ត៌មានមួយរបស់សមាជិកព្រឹទ្ធសភា និងជារដ្ឋមន្ត្រីក្រសួងការបរទេសស្រមោលរបស់ប្រទេសអូស្ត្រាលី អ្នកស្រី ភែន នីវ៉ុង (Penny Wong) ដែលចេញផ្សាយកាលពីថ្ងៃទី១៥ ខែកុម្ភៈ កន្លងទៅនេះ ក៏បានអំពាវនាវឲ្យរដ្ឋាភិបាលកម្ពុជា ស្តារលទ្ធិប្រជាធិបតេយ្យ សេរីភាពសារព័ត៌មាន ដោះលែងលោក កឹម សុខា និងលុបចោលការរំលាយគណបក្សសង្គ្រោះជាតិ។ អ្នកស្រីក៏បានជំរុញឲ្យមានការបោះឆ្នោតនៅពេលខាងមុខធ្វើឡើងដោយសេរី ត្រឹមត្រូវ និងយុត្តិធម៌ និងអនុញ្ញាតឲ្យពលរដ្ឋខ្មែរសម្ដែងឆន្ទៈក្នុងការជ្រើសរើសមេដឹកនាំរបស់ពួកគេដោយសំឡេងស្របច្បាប់ ឬដោយគ្មានការភ័យខ្លាច។
រីឯលោក តាក់ ម៉េងហៀង ដែលទើបជាប់ឆ្នោតជាបេក្ខជនតំណាងរាស្ត្រថ្មីនោះ មានប្រសាសន៍ដែរថា លោកហួសចិត្តចំពោះប្រសាសន៍លោកនាយករដ្ឋមន្ត្រី ហ៊ុន សែន គំរាមតាមវាយបាតុករដុតទីងមោងដល់ផ្ទះនេះ។ លោក តាក់ ម៉េងហៀង ដែលមានវិជ្ជាជីវៈជាមេធាវីផងនោះ មានប្រសាសន៍ស្រដៀងនឹងលោក ហុង លីម ដែរថា ការប្រកាសរបស់លោក ហ៊ុន សែន នេះ អាចជាការពន្យុះអោយបាតុករកាន់តែមានចិត្តចង់ដុតរូបទីងមោង លោក ហ៊ុន សែន កាន់តែខ្លាំង។
សូមអញ្ជើញលោកអ្នកនាងស្ដាប់បទសម្ភាសន៍មួយជាមួយលោក តាក់ ម៉េងហៀង អំពីរឿងនេះ៖