សកម្មជនគណបក្សកាន់អំណាចបានផ្អាកសកម្មភាពផ្តិតមេដៃធ្វើញត្តិទម្លាក់អភិបាលស្រុកគីរីសាគរ ខេត្តកោះកុង ក្រោយពីមានបម្រាមពីថ្នាក់ដឹកនាំរបស់ខ្លួន ដោយសារបារម្ភពីការខូចកេរ្តិ៍ឈ្មោះគណបក្សប្រជាជនកម្ពុជា ខណៈការបោះឆ្នោតខិតជិតចូលមកដល់។
មន្ត្រីសង្គមស៊ីវិលយល់ថា ប្រសិនបើគណបក្សប្រជាជនកម្ពុជា ពិតជាធ្វើកំណែទម្រង់រដ្ឋបាលអាជ្ញាធរថ្នាក់ក្រោមជាតិ ឲ្យមានប្រសិទ្ធភាពនោះ មិនគួរបង្អាក់ដំណើរការតវ៉ា ឬសម្តែងមតិរបស់សកម្មជនថ្នាក់ក្រោមឡើយ។
សកម្មជនគណបក្សប្រជាជនកម្ពុជា និងប្រជាពលរដ្ឋចំនួន ៣ឃុំ នៃស្រុកគីរីសាគរ បានសម្តែងការខកចិត្តចំពោះថ្នាក់ដឹកនាំគណបក្សប្រជាជនកម្ពុជា ដែលបានហាមឃាត់មិនឲ្យពួកគាត់ធ្វើញត្តិទម្លាក់អភិបាលស្រុកគីរីសាគរ ឈ្មោះ ឃឹម ច័ន្ទឌី ចេញពីតំណែង។
សកម្មជនគណបក្សប្រជាជនកម្ពុជា ម្នាក់សុំមិនបញ្ចេញឈ្មោះរៀបរាប់ថា សកម្មជន និងប្រជាពលរដ្ឋក្នុងស្រុកគីរីសាគរ ស្ទើរតែទាំងអស់ សុទ្ធតែបានចូលរួមផ្ដិតមេដៃទាមទារទម្លាក់អភិបាលស្រុកគីរីសាគរ ប៉ុន្តែថ្នាក់ដឹកនាំគណបក្សប្រជាជនកម្ពុជា នៅខេត្តកោះកុង បានរារាំងដោយសារខ្លាចខូចកេរ្តិ៍ឈ្មោះបក្ស ខណៈដែលការបោះឆ្នោតកាន់តែខិតជិតចូលមកដល់៖ «គេបានហៅមេឃុំចាស់ទៅប្រជុំនៅទីរួមខេត្តកោះកុង ហើយគេបានអោយផ្អាក់ផ្ដិតមេដៃទម្លាក់ចៅហ្វាយស្រុក ដោយសារគេយោងថា មួយរយៈនេះកំពុងរញ៉េរញ៉ៃរឿងរំលាយគណបក្សសង្គ្រោះជាតិ ហើយនិងបង្កើតគណបក្សថ្មីចំនួន៤ ដើម្បីចូលរួមបោះឆ្នោត ដូច្នេះគេកំពុងរៀបចំគណបក្សអោយរលូន មិនអោយរញ៉េរញ៉ៃព្រោះវាអត់សម»។
ក្នុងញត្តិដែលសកម្មជនគណបក្សប្រជាជនកម្ពុជា ផ្តិតមេដៃទាមទារទម្លាក់អភិបាលស្រុកគីរីសាគរ លោក ឃឹម ច័ន្ទឌី នោះ បង្ហាញថា ដោយសាលោក ឃឹម ច័ន្ទឌី គ្មានសមត្ថភាពដឹកនាំសមាជិកាគណបក្សប្រជាជនធ្វើឲ្យបែកបាក់សាមគ្គីផ្ទៃក្នុង និងមិនបានបម្រើផលប្រយោជន៍ជូនប្រជាពលរដ្ឋ។លើសពីនេះ លោក ឃឹម ច័ន្ទឌី បានយកដីរដ្ឋ និងដីបម្រុងទុកសម្រាប់ចែកប្រជាពលរដ្ឋ ដែលទទួលបានពីការដោះស្រាយរបស់ក្រុមការងារអន្តរក្រសួងទៅលក់អោយឈ្មួញអស់ចំនួន ៤០ហិកតារ និងបានយកដីរបស់រដ្ឋ និងដីវត្តធ្វើអាជីវកម្ម និងកម្មសិទ្ធិផ្ទាល់ខ្លួន។ ក្រោយធ្វើញត្តិនេះ គឺពួកគេមានបំណងផ្ញើជូនលោកនាយករដ្ឋមន្ត្រី ហ៊ុន សែន ដែលជាប្រធានគណបក្សកាន់អំណាចឲ្យជួយដោះស្រាយតាមសំណូមពរ។
ជុំវិញករណីនេះ អភិបាលស្រុកគីរីសាគរ លោក ឃឹម ច័ន្ទឌី តែងតែបដិសេធមិនឆ្លើយតបជាមួយអាស៊ីសេរី តាមទូរស័ព្ទឡើយ។
អភិបាលខេត្តកោះកុង អ្នកស្រី មិថុនា ភូថង បញ្ជាក់យ៉ាងខ្លីថា គណបក្សប្រជាជនកម្ពុជា មិនមានគោលការណ៍ទម្លាក់មន្ត្រីរបស់ខ្លួនតាមរយៈការផ្ដិតមេដៃធ្វើញត្តិនោះទេ៖ «នេះគឺជារឿងផ្ទៃក្នុងគណបក្ស ហើយយើងបានដឹង តែការងារឥឡូវនេះគឺអត់មានគោលការណ៍ឃុំត្រូវរំលង ដែលផ្ដិតមេដៃអ៊ីចឹងទេ គឺត្រូវមានគោលការណ៍ប្រជុំផ្សេង»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ថា លោកមិនបានដឹងករណីនេះទេ ប៉ុន្តែប្រសិនបើករណីនេះជាការពិត គឺសកម្មជន និងប្រជាពលរដ្ឋ បានធ្វើខុសនីតិវិធី ព្រោះការតែងតាំងអភិបាលស្រុកនោះ មិនមែនធ្វើតាមរយៈបាតុកម្មឡើយ ដូច្នេះការដកតំណែងក៏មិនអាចធ្វើតាមរយៈបាតុកម្មដែរ៖ «បើសិនជាសាមីជនមានពិរុទ្ធភាពបទល្មើសអីណាមួយ អាហ្នឹងយើងត្រូវដាក់ពាក្យទៅតុលាការដើម្បីអោយតុលាការត្រួតពិនិត្យ ឬអង្គភាពប្រឆាំងអំពើពុករលួយ អាហ្នឹងបានវាត្រឹមត្រូវ មិនមែនបាតុកម្មតែងតាំងមន្ត្រី ឬមួយបាតុកម្មទម្លាក់ឋានៈមន្ត្រីទេ។ គាត់ធ្វើនេះខុសបែបបទហើយ អ៊ីចឹងការណ៍ដែលគេមិនអោយគាត់ធ្វើនេះ គឺត្រឹមត្រូវហើយ»។
លោកបញ្ជាក់ថា រដ្ឋាភិបាលមិនគាំទ្រចំពោះមន្ត្រីណាដែលមិនបម្រើប្រជាពលរដ្ឋនោះទេ ព្រោះរដ្ឋាភិបាលតែងតែណែនាំឲ្យមន្ត្រីទាំងអស់បម្រើសេវាជូនប្រជាពលរដ្ឋ ហើយបើអ្នកណាធ្វើខុសគឺត្រូវទទួលខុសត្រូវចំពោះមុខច្បាប់។
អ្នកសម្របសម្រួលអង្គការសិទ្ធិមនុស្សលីកាដូ (LICADHO) ខេត្តកោះកុង លោក អ៊ិន គង់ជិត មានប្រសាសន៍ថា ការលើកហេតុផលរបស់ថ្នាក់ដឹកនាំគណបក្សប្រជាជនកម្ពុជា គឺសមហេតុផល ព្រោះថា វាអាចជាបទបញ្ជាផ្ទៃក្នុងរបស់គណបក្ស និងយោងទៅតាមលក្ខន្តិកៈរបស់មន្ត្រីរាជការស៊ីវិល។ ទោះយ៉ាងណាក្តី លោកថា ប្រសិនបើគណបក្សកាន់អំណាចពិតជារៀបចំធ្វើកំណែទម្រង់រដ្ឋបាលអាជ្ញាធរថ្នាក់ក្រោមជាតិឲ្យមានប្រសិទ្ធភាពនោះ គួរតែទទួលយកសំណូមពររបស់សកម្មជនថ្នាក់ក្រោមដែលបានដឹងរឿងច្បាស់អំពីឥរិយាបថរបស់មន្ត្រីទាំងនោះ។
លោក អ៊ិន គង់ជិត៖ «មិនត្រូវបង្អាក់ដំណើរដែលសមាជិកក្នុងជួរបក្សគាត់ដែលមើលឃើញភាពខ្វះចន្លោះនោះទេ គឺត្រូវតែលើកទឹកចិត្តគាត់ ដើម្បីឲ្យ្ពួកគាត់បានសម្តែងក្តីកង្វល់ ហើយបង្ហាញទៅថ្នាក់លើនូវអ្វីដែលគាត់មិនពេញចិត្តការតែងតាំងមន្ត្រីកន្លងមក ដែលបានដឹកនាំពុំសូវបានផ្ដល់ផលប្រយោជន៍ដល់ទាំងអាជ្ញាធរនៅមូលដ្ឋាន និងប្រជាពលរដ្ឋ។ គណបក្សប្រជាជនគួរតែបើកទូលាយនៅក្នុងរឿងនេះ ព្រោះមុខដឹកនាំបក្សរបស់គាត់ តែងណែនាំមន្ត្រីរបស់គាត់ឆ្លុះកញ្ចក់និងមុជទឹកដុសក្អែលខ្លួនឯង»។
ស្រុកគីរីសាគរ មានឃុំចំនួន៣ គឺឃុំកោះស្តេច ឃុំព្រែកខ្សាច់ និងឃុំភ្ញីមាស ហើយពលរដ្ឋក្នុងស្រុកនេះភាគច្រើនកំពុងមានជម្លោះដីធ្លីរ៉ាំរ៉ៃជាមួយក្រុមហ៊ុនចិន មួយចំនួន។ ប្រជាពលរដ្ឋអះអាងថា ពួកគាត់ពុំទទួលបានភាពកក់ក្ដៅពីអាជ្ញាធរដែលជាអ្នកបម្រើសេវាជូនពួកគាត់ម្ដងណាឡើយ។ សកម្មជនគណបក្សប្រជាជនកម្ពុជា និងប្រជាពលរដ្ឋលើកឡើងថា ប្រសិនបើគណបក្សប្រជាជនកម្ពុជា បន្តរក្សាការពារមន្ត្រីខិលខូច ឬពុករលួយទៀតនោះ នឹងធ្វើឲ្យគណបក្សកាន់អំណាចកាន់តែបាត់បង់សំឡេងឆ្នោតគាំទ្រពីប្រជាពលរដ្ឋជាងអាណត្តិមុនៗទៀត៕