តុលាការកំពូល នៅព្រឹកថ្ងៃទី៧ ខែកុម្ភៈ បានបើកសវនាការ និងប្រកាសសម្រេចតម្កល់សាលដីការបស់សាលាឧទ្ធរណ៍ ដោយផ្ដន្ទាទោសអ្នកស្រី ទេព វន្នី តំណាងសហគមន៍បឹងកក់ ជាប់ពន្ធនាគារ ២ឆ្នាំកន្លះដដែល ទាក់ទិននឹងករណីបង្ករបួសស្នាមនៅក្បែរវិមានឯករាជ្យ ជិតផ្ទះនាយករដ្ឋមន្ត្រី កាលពីខែមីនា ឆ្នាំ២០១៣។ ពលរដ្ឋបឹងកក់ និងសង្គមស៊ីវិលចាត់ទុកការសម្រេចនេះថាជារឿងអយុត្តិធម៌។
សវនាការ និងសេចក្ដីសម្រេចរបស់តុលាការកំពូលលើសំណុំរឿងតំណាងសហគមន៍បឹងកក់ អ្នកស្រី ទេព វន្នី គឺពុំមានអ្វីប្រែប្រួលពីការសម្រេចរបស់សាលាដំបូង និងសាលាឧទ្ធរណ៍ឡើយ ដោយតុលាការកំពូល សម្រេចរក្សាបទចោទ និងតម្កល់សាលដីកាតុលាការថ្នាក់ក្រោមឲ្យនៅដដែល។ នេះមានន័យថា អ្នកស្រី ទេព វន្នី នឹងនៅបន្តជាប់ពន្ធនាគារយូរតទៅទៀត។
មេធាវីការពារក្ដីនៃអង្គការសិទ្ធិមនុស្សលីកាដូ (LICADHO) អ្នកស្រី សាម សុគន្ធា បានហៅសាលដីកាតុលាការកំពូល នៅថ្ងៃនេះថា ធ្វើឡើងដោយមានភាពអយុត្តិធម៌ដល់កូនក្ដីរបស់អ្នកស្រី ព្រោះថាសំណុំរឿងនេះមិនមានភស្តុតាងជាក់លាក់នោះទេ ដោយសារគ្មានវត្តមានដើមបណ្ដឹងចូលតតាំងក្តីនៅក្នុងសវនាការ និងម្យ៉ាងទៀត តុលាការយោងទៅតាមតែកំណត់ហេតុរបស់មន្ត្រីនគរបាលដែលមានភាពមិនច្បាស់លាស់ ហើយសរសេរតែរបៀបដាក់បន្ទុកប៉ុណ្ណោះ។
អ្នកស្រី ទេព វន្នី ត្រូវបានអាជ្ញាធរចោទថា បានបង្ករបួសស្នាមទៅលើសន្តិសុខខណ្ឌដូនពេញ ២នាក់។ អ្នកស្រីជាប់ពន្ធនាគារ ៥៤១ថ្ងៃហើយ គិតត្រឹមថ្ងៃទី៧ ខែកុម្ភៈ។ អាជ្ញាធរបានចាប់ និងឃុំខ្លួនអ្នកស្រីតាំងពីខែសីហា ឆ្នាំ២០១៦ មកម្ល៉េះ គឺចាប់ខ្លួនពេលអ្នកស្រីកំពុងធ្វើយុទ្ធនាការថ្ងៃចន្ទពណ៌ខ្មៅ ទាមទារឲ្យដោះលែងមន្ត្រីអាដហុក (ADHOC) ៤រូប និងមន្ត្រី គ.ជ.ប ១រូប រួមទាំងជំរុញឲ្យរដ្ឋាភិបាលវែកមុខរកអ្នកនៅពីក្រោយការបាញ់សម្លាប់លោកបណ្ឌិត កែម ឡី។ មន្ត្រីអាដហុក ៤រូប និងមន្ត្រី គ.ជ.ប ១រូបនោះ ត្រូវបានតុលាការដោះលែងកាលពីខែកក្កដា ឆ្នាំ២០១៧ ហើយ នៅឡើយតែអ្នកស្រី ទេព វន្នី។
សាលាដំបូងកាត់ក្ដីឲ្យអ្នកស្រីជាប់ពន្ធនាគារចំនួន ២ឆ្នាំកន្លះ ពីបទ "ប្រើហិង្សាដោយចេតនាមានស្ថានទម្ងន់ទោស" ដែលប្រព្រឹត្តទៅនៅខាងកើតវិមានឯករាជ្យក្បែរផ្ទះនាយករដ្ឋមន្ត្រី ហ៊ុន សែន កាលពីខែមីនា ឆ្នាំ២០១៣។
ដោយឡែកអ្នកស្រី ទេព វន្នី បានប្រាប់តុលាការម្ដងហើយម្ដងទៀតថា គាត់មិនបានប្រព្រឹត្តដូចការចោទប្រកាន់ទេ។ ពួកគាត់ទៅទាមទារតវ៉ាមានគ្នាប្រមាណ ៣០នាក់ និងមានត្រឹមបដា និងផ្កាឈូកប៉ុណ្ណោះ គ្មានដុំថ្ម ហើយក៏មិនបានប្រើហិង្សាលើក្រុមសន្តិសុខនោះឡើយ។ ផ្ទុយទៅវិញ មានតែក្រុមសន្តិសុខទៅវិញទេ ដែលប្រព្រឹត្តហិង្សាមកលើពួកគាត់រហូតធ្វើឲ្យបាតុករបាក់ដៃ បាក់ធ្មេញ និងរបួសច្រើនទៀតនៅក្នុងហេតុការណ៍នោះ។
អ្នកស្រី ទេព វន្នី អះអាងថា ការសុំឲ្យមានការដោះលែងអ្នកស្រី ក៏ដោយសារមូលហេតុថា កូនស្រីអាយុ ១៤ឆ្នាំរបស់អ្នកស្រី មានបញ្ហារលាកខួរក្បាល សន្លប់ញឹកញាប់ ឯម្តាយវះភ្នែកទាំងសងខាង គ្មានអ្នកស្រីនៅក្បែរដើម្បីបាននៅជួយមើលថែ។
នៅក្រៅតុលាការកំពូល មានអ្នកគាំទ្រអ្នកស្រី ទេព វន្នី ប្រមាណ ២០នាក់។ ពួកគាត់ស្រែកទាមទារឲ្យដោះលែងអ្នកស្រី ទេព វន្នី វិញ។
អង្គការសង្គមស៊ីវិលចំនួន ៣៤ ចេញសេចក្ដីថ្លែងការណ៍រួមគ្នាមួយ ជំទាស់ទៅនឹងសេចក្ដីសម្រេចបន្តដាក់ពន្ធនាគារអ្នកស្រី ទេព វន្នី បែបនេះ។ អង្គការសង្គមស៊ីវិលដែលរួមមានមជ្ឈមណ្ឌលសិទ្ធិមនុស្សកម្ពុជា ក្រុមអ្នកច្បាប់ការពារសិទ្ធិកម្ពុជា អង្គការសីលការ និង សមាគមអាដហុក ផងដែរនោះ បានចេញសេចក្ដីថ្លែងការណ៍រួមគ្នាមួយក្នុងថ្ងៃជាមួយគ្នានឹងសេចក្ដីសម្រេចរបស់តុលាការកំពូលនេះ ដោយសម្ដែងការសោកស្ដាយចំពោះសេចក្ដីសម្រេចរបស់តុលាការកំពូល ក្នុងការតម្កល់ការផ្ដន្ទាទោសអ្នកស្រី ទេព វន្នី ដែលគ្រាន់តែចូលរួមតវ៉ាដោយសន្តិវិធី និងមិនគួរណាជាប់ឃុំក្នុងពន្ធនាគារ ដោយសារតែការពារសិទ្ធិទទួលបានលំនៅឋានសមស្របរបស់សហគមន៍អ្នកស្រី និងអនុវត្តសិទ្ធិជាមូលដ្ឋានក្នុងការបញ្ចេញមតិ សិទ្ធិខាងសមាគម និងសិទ្ធិជួបប្រជុំនោះសោះ។ អង្គការសង្គមស៊ីវិលទាំង ៣៤ នេះ អំពាវនាវឲ្យអាជ្ញាធរពាក់ព័ន្ធពិនិត្យសំណុំរឿងនេះឡើងវិញ ដើម្បីរកយុត្តិធម៌ជូនអ្នកស្រី ទេព វន្នី និងត្រូវដោះលែងអ្នកស្រីឲ្យមានសេរីភាពវិញ។
ប្រធានគ្រប់គ្រងផ្នែកអង្កេតអង្គការលីកាដូ លោក អំ សំអាត សម្ដែងការសោកស្ដាយចំពោះសាលដីការបស់តុលាការកំពូល ព្រោះថា សាលាដំបូង និងសាលាឧទ្ធរណ៍គ្មានភស្តុតាងច្បាស់លាស់សម្រាប់ដាក់បន្ទុកលើអ្នកស្រី ទេព វន្នី នោះទេ៖ «...អ្នកស្រី ទេព វន្នី មាឌតូចមួយ អាចទៅវាយសន្តិសុខសុទ្ធតែមាឌធំៗកើតទេ?...»។
លោក អំ សំអាត យល់ថា ការសម្រេចផ្ដន្ទាទោសលើអ្នកស្រី ទេព វន្នី របស់តុលាការទាំងបីជាន់ថ្នាក់នេះ ដោយសារតែអ្នកស្រី ទេព វន្នី គឺជាសកម្មជនដីធ្លីដ៏សកម្មនៅក្នុងតំបន់បឹងកក់ និងតែងតែចេញតវ៉ាទាមទារដំណោះស្រាយដីធ្លីដោយសន្តិវិធី ម្ល៉ោះហើយទើបអ្នកស្រីត្រូវបានគេចាប់ដាក់ពន្ធនាគារម្ដងហើយម្ដងទៀតដូច្នេះ៕