រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន បានចេញលិខិតស្ដីបន្ទោសដល់មន្ត្រីក្រោមឱវាទរបស់ខ្លួនចំនួន ២៤រូប ថា ខ្ជីខ្ជាមិនចេះតាមដានការងាររបស់លោក រ៉ុង ឈុន និងបុគ្គលិកដទៃទៀត។ លិខិតនោះចុះហត្ថលេខា កាលពីថ្ងៃទី៣០ ខែមករា ឆ្នាំ២០១៨ ប៉ុន្តែទើបបានចេញផ្សព្វផ្សាយជាផ្លូវការ នៅថ្ងៃទី៦ ខែកុម្ភៈ។
លោក ហង់ ជួនណារ៉ុន បានលើកឡើងក្នុងសេចក្ដីប្រកាសនោះ ដោយដាក់បន្ទុកទៅលើមន្ត្រីនៅនាយកដ្ឋានស្រាវជ្រាវវិទ្យាសាស្ត្ររួមមាន៖ ប្រធាននាយកដ្ឋាន ប្រធានការិយាល័យរដ្ឋបាល ប្រធានការិយាល័យស្រាវជ្រាវ ប្រធានការិយាល័យផែនការ និងមន្ត្រីនៅនាយកដ្ឋាន អនុវត្តការងាររបស់ខ្លួនថាធ្វើការងារមិនបានពេញលេញ។
រដ្ឋមន្ត្រីរូបនេះបន្តថា ប្រធាននាយកដ្ឋានចំនួន ៤រូប នៃនាយកដ្ឋានស្រាវជ្រាវវិទ្យាសាស្ត្រនេះ មិនបានគ្រប់គ្រងបុគ្គលិកក្រោមឱវាទបានត្រឹមត្រូវ ស្របតាមអនុក្រឹត្យស្ដីពីការគ្រប់គ្រងវត្តមានមន្ត្រីរាជការស៊ីវិល និងមន្ត្រីជាប់កិច្ចសន្យា។ ជាមួយគ្នានោះដែរ លោក ហង់ ជួនណារ៉ុន ក៏បានបន្ទោសដល់មន្ត្រីចំនួន ២០រូបផ្សេងទៀត ដែលខកខានមិនបានមកបំពេញកាតព្វកិច្ចការងារជាប់លាប់ ចាប់ពីថ្ងៃទី៤ មករា ដល់ថ្ងៃទី៣០ ខែមករា កន្លងមកនេះផងដែរ។
ទាក់ទងករណីនេះ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ យល់ថា ផ្អែកលើទិដ្ឋភាពរដ្ឋបាលសាធារណៈ ឬភាពអសកម្មខ្លះនៃការបំពេញការងារនៅក្នុងស្ថាប័នរដ្ឋ គឺជៀសមិនផុតពីភាពខ្វះចន្លោះ ក្នុងការបំពេញការងារ។ លោកថា ករណីនេះនៅមានច្រើនណាស់។ ដូច្នេះសង្គមស៊ីវិលរូបនេះ យល់ថា លោក រ៉ុង ឈុន និង លោក ហង់ ជួនណារ៉ុន រដ្ឋមន្ត្រីក្រសួងអប់រំ គួររកពេលសមរម្យមួយជួបជជែកគ្នាដោយការយោគយល់ ដើម្បីដោះស្រាយបញ្ហា ព្រោះថា ទាំងលោក រ៉ុង ឈុន និងលោក ហង់ ជួនណារ៉ុន សុទ្ធតែតួអង្គជួយសង្គម៖ «ជជែកគ្នា និយាយគ្នាពីគុណតម្លៃនៃសង្គមដែលពួកគាត់បានបំពេញព្រោះអីខ្ញុំយល់ថា ឯកឧត្ដមរដ្ឋមន្ត្រីក្រសួងអប់រំ និងលោក រ៉ុង ឈុន សុទ្ធតែជាតួអង្គដែលបានចូលរួមចំណែកសម្រាប់គុណតម្លៃនៅក្នុងសង្គម និងជាគំរូសម្រាប់អ្នកជំនាន់ថ្មីដូចគ្នា»។
លោក រ៉ុង ឈុន អតីតសមាជិកគ.ជ.ប និងជាទីប្រឹក្សាសមាគមគ្រូបង្រៀនកម្ពុជាឯករាជ្យ ត្រូវរដ្ឋមន្ត្រីក្រសួងអប់រំ លោក ហង់ ជួនណារ៉ុន លុបឈ្មោះ ចេញពីនាយកដ្ឋានស្រាវជ្រាវវិទ្យាសាស្ត្រ នៃក្រសួងអប់រំ ចាប់ពីថ្ងៃទី១ ខែកុម្ភៈ ឆ្នាំ២០១៨។
លោក រ៉ុង ឈុន ថា លោកមិនទទួលស្គាល់ការសម្រេចរបស់ក្រសួងអប់រំ ចំពោះករណីបញ្ឈប់លោកពីការងារឡើយ។ លោកចាត់ទុកការសម្រេចនេះ គឺជារឿងគួរឲ្យអស់សំណើចនិងពាក់ព័ន្ធទៅនឹងរឿងនយោបាយ ព្រោះការលុបឈ្មោះលោកធ្វើឡើងបន្ទាប់ពីលោកលាឈប់ពីសមាជិកនៃគណៈកម្មាធិការជាតិរៀបចំការបោះឆ្នោតគ.ជ.ប ព្រោះលោកយល់ថា ស្ថាប័ននេះបាត់បង់ឯករាជ្យរបស់ខ្លួនហើយ។ ការលាឈប់ពីគ.ជ.ប របស់លោក រ៉ុង ឈុន ធ្វើឡើងក្រោយពេលតុលាការកំពូលចេញសាលដីការម្លាយបក្សសង្គ្រោះជាតិ តាមបញ្ជារបស់លោកនាយករដ្ឋមន្ត្រី ហ៊ុន សែន៕