Clik here to view.
កម្មវិធីជាតិប្រយុទ្ធនឹងជំងឺគ្រុនឈាមនៃក្រសួងសុខាភិបាល លើកឡើងថានៅឆ្នាំ ២០១៨ ជំងឺគ្រុនឈាមនឹងរាតត្បាតធំជាថ្មីទៀត។ គេហទំព័រហ្វេសប៊ុក (Facebook) របស់នាយកដ្ឋានប្រយុទ្ធនឹងជំងឺឆ្លងផ្សព្វផ្សាយកាលពីថ្ងៃទី២ កុម្ភៈ ។ កម្មវិធីជាតិប្រយុទ្ធនឹងជំងឺគ្រុនឈាមនៃក្រសួងសុខាភិបាល ឱ្យដឹងថា ជំងឺនេះបង្កឡើងដោយវីរុសដាំង (DEN) ដែលមានបួនប្រភេទ ហើយ ចំលងទៅមនុស្សតាមរយៈមូសខ្លាញីខាំ។
កម្មវិធីជាតិប្រយុទ្ធនឹងជំងឺគ្រុនឈាមនៃក្រសួងសុខាភិបាលបញ្ជាក់ថា ជំងឺគ្រុនឈាមឆ្នាំ២០១៧ បានថយចុះចំនួន ១២០% បើប្រៀបធៀបឆ្នាំ២០១៦ ។ ប៉ុន្តែជំងឺគ្រុនឈាមមានការកើនឡើងលើមនុស្សពេញវ័យ និងមនុស្សចាស់ក្នុងអំឡុងពេល ៣ឆ្នាំចុងក្រោយ គឺ ឆ្នាំ ២០១៥ ២០១៦ និង២០១៧។ ក្រសួងសុខាភិបាលបន្ថែមថា ជំងឺគ្រុនឈាមធ្លាប់រាតត្បាតខ្លាំងចុងក្រោយនៅឆ្នាំ២០១២ ហើយអំឡុងពេលរាតត្បាតខ្លាំង គឺនៅរៀងរាល់ ៥ ទៅ ៦ឆ្នាំម្ដង។ ដូច្នេះ ឆ្នាំ២០១៨ គឺជាឆ្នាំដែលត្រូវដល់វដ្ដនៃការរាតត្បាតធំម្ដងទៀត។
ជាក់ស្ដែងក្នុងរយៈពេល ៣សប្តាហ៍ដំបូងនៅឆ្នាំ២០១៨ ករណីជំងឺគ្រុនឈាមសរុបមានចំនួន ៣១៦ ករណី និងស្លាប់ ១ករណី។ ចំនួននេះ គឺកើនឡើង ១៣០% បើប្រៀបធៀបទៅនឹងរយៈពេលដូចគ្នានាឆ្នាំ២០១៧ ដែលមានតែ ១៣៨ករណី និងគ្មានករណីស្លាប់ទេ។
ក្រសួងសុខាភិបាល បានផ្តល់អនុសាសន៍មួយចំនួនដើម្បីគ្រប់គ្រងហានិភ័យនៃការរាតត្បាតដោយជំងឺគ្រុនឈាមឆ្នាំ ២០១៨ ឱ្យទាន់ពេលវេលា គឺមន្ទីរសុខាភិបាលរាជធានី ខេត្ត និងភ្នាក់ងារកម្មវិធីប្រយុទ្ធនឹងជំងឺគ្រុនឈាមថ្នាក់ក្រោមជាតិត្រូវក្ដាប់អោយបាន នូវសភាពការជំងឺគ្រុនឈាម និងចាត់វិធានការជាបន្ទាន់។ ត្រូវពង្រឹងបណ្ដាញគ្រប់គ្រង និងក្ដាប់អោយបាននូវស្ថានភាពជំងឺគ្រុនឈាម។ រៀបចំធនធានមនុស្ស សម្ភារៈឱសថបរិក្ខារ ហិរញ្ញវត្ថុ និងជំរុញអោយមានការចូលរួមពីមន្ទីរពាក់ព័ន្ធដូចជា មន្ទីរអប់រំ យុវជន និងកីឡា មន្ទីរបរិស្ថាននិង មន្ទីរមួយចំនួនទៀត រួមទាំង អាជ្ញាធរដែនដី និងដៃគូអភិវឌ្ឍន៍ផងដែរ។
លើសពីនេះ ត្រូវពង្រឹងសេវាពិនិត្យ រោគវិនិច្ឆ័យ និងព្យាបាល ដោយក្ដាប់អោយបាននូវបច្ចុប្បន្នភាពសេវាថែទាំសុខភាព និងតម្រូវការទៅតាមស្ថានភាពជំងឺគ្រុនឈាមជាក់ស្ដែង។ ត្រូវពង្រឹងការងារគ្រប់គ្រងភ្នាក់ងារចំលងរួមមានពិនិត្យវាយតម្លៃ ធ្វើបច្ចុប្បន្នភាព និងរៀបចំ ថ្នាំបាណកឃាដ ឬអាបែត ព្រមទាំងថ្នាំសម្រាប់បាញ់មូស ឬម៉ាស៊ីនបាញ់ថ្នាំមូស។ ជាមួយគ្នានេះ ត្រូវលើកកម្ពស់សេវាអប់រំសុខភាពនៅតាមសហគមន៍ សាលារៀន ទីប្រជុំជន និងវត្តអារាម ដោយប្រើប្រាស់លទ្ធភាពធនធានដែលមានដូចជា ផ្ទាំងរូបភាព អប់រំសុខភាពចល័ត វិទ្យុ ទូរទស្សន៍ និងមធ្យោបាយផ្សេងៗ ព្រមទាំងវិធីសាស្ត្រមួយចំនួនទៀត ដើម្បីរួមគ្នាកាត់បន្ថយអត្រាឈឺ និងស្លាប់ដោយសារជំងឺគ្រុនឈាមនៅប្រទេសកម្ពុជា។ ព័ត៌មានទាន់ហេតុការណ៍ ពលរដ្ឋអាចហៅទូរស័ព្ទ ទៅលេខ ១១៥ ដោយមិនគិតថ្លៃពីគ្រប់ប្រព័ន្ធ៕
