រដ្ឋាភិបាលលោកនាយករដ្ឋមន្ត្រី ហ៊ុន សែន នៅថ្ងៃសុក្រ ទី២ ខែកុម្ភៈ បានអនុម័តសេចក្ដីព្រាងច្បាប់ស្ដីពីវិសោធនកម្មក្រមព្រហ្មទណ្ឌ ដែលនឹងអាចផ្ដន្ទាទោសបុគ្គលណាដែលត្រូវតុលាការរកឃើញថា មានកំហុសប្រមាថព្រះមហាក្សត្រឲ្យជាប់ពន្ធនាគាររយៈពេល ៥ឆ្នាំ និងពិន័យជាប្រាក់ ២.៥០០ដុល្លារ។
មន្ត្រីសិទ្ធិមនុស្សសំដែងក្តីបារម្ភថា ច្បាប់ថ្មីនេះនឹងត្រូវប្រើប្រាស់ដើម្បីធ្វើទុក្ខបុកម្នេញគណបក្សប្រឆាំង។ ពួកគេថា រដ្ឋាភិបាលអាចប្រើប្រាស់ច្បាប់ថ្មីនេះជាអាវុធបន្ថែមលើច្បាប់មួយចំនួនផ្សេងទៀតដែលរដ្ឋាភិបាលកំពុងប្រើប្រាស់ទាំងបំពានដើម្បីបំបិទសំឡេងអ្នកប្រឆាំង។
មន្ត្រីនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ត្រូវបានទីភ្នាក់ងារ អា.អេហ្វ.ប៉េ (AFP) ដកស្រង់សម្ដីថា សេចក្ដីព្រាងច្បាប់ស្ដីពីវិសោធនកម្មក្រមព្រហ្មទណ្ឌនេះធ្វើឡើងដើម្បីលើកស្ទួយ និងការពារព្រះចេស្ដារបស់ព្រះមហាក្សត្រ។ ក្នុងប៉ុន្មានទសវត្សរ៍ចុងក្រោយនេះ អ្នកវិភាគមើលឃើញថា អំណាចរបស់ព្រះមហាក្សត្របានថមថយជាខ្លាំងក្រោយការដឹកនាំរបស់លោកនាយករដ្ឋមន្ត្រី ហ៊ុន សែន ក្នុងរយៈពេល ៣៣ឆ្នាំ។
ព្រះមហាក្សត្រ ព្រះបាទ នរោត្តម សីហមុនី បានគ្រងរាជសម្បត្តិ កាលពីឆ្នាំ២០០៤។ ព្រះអង្គគង់ជាព្រះប្រមុខរដ្ឋ ក្នុងជីវិតស្ងប់ស្ងាត់ មិនដូចព្រះបិតាព្រះអង្គ ព្រះបាទ នរោត្តម សីហនុ ដែលបានតែងតែប៉ះទង្គិចនឹងលោក ហ៊ុន សែន។ គណៈរដ្ឋមន្ត្រីនៅថ្ងៃសុក្រ ក៏បានអនុម័តវិសោធនកម្មច្បាប់មួយចំនួនផ្សេងទៀតដែរ។
លោក ផៃ ស៊ីផាន អះអាងច្បាប់ទាំងនោះធ្វើឡើងដើម្បីទប់ស្កាត់ការជ្រៀតជ្រែកពីបរទេស។ រដ្ឋាភិបាលលោក ហ៊ុន សែន កាលពីឆ្នាំ២០១៧ បានរំលាយបក្សប្រឆាំង និងហាមឃាត់មន្ត្រីបក្សប្រឆាំង ១១៨នាក់ មិនឲ្យធ្វើនយោបាយដោយចោទប្រកាន់ថា គណបក្សសង្គ្រោះជាតិ បានឃុបឃិតនឹងបរទេសដើម្បីផ្ដួលរំលំរដ្ឋាភិបាល៕