លោក សម រង្ស៊ី មេដឹកនាំចលនាសង្គ្រោះជាតិ បន្តអំពាវនាវដល់មន្ត្រីរាជការ និងកងទ័ពដែលស្អាតស្អំ សូមកុំយកខ្លួនបៀតជាមួយលោក ហ៊ុន សែន ដែលលោក សម រង្ស៊ី ចោទថា ជាមេដឹកនាំផ្ដាច់ការ និងមានទោសឧក្រិដ្ឋជាច្រើនករណី ក្នុងរយៈពេលដឹកនាំប្រទេសជាង ៣០ឆ្នាំកន្លងមកនេះ។ លោកសន្យាថា ពលរដ្ឋដែលរងគ្រោះដោយរបបលោក ហ៊ុន សែន នឹងទទួលបានយុត្តិធម៌នៅពេលបក្សប្រឆាំងគ្រប់គ្រងតំណែងដឹកនាំរដ្ឋាភិបាល។
លោក សម រង្ស៊ី ប្រកាសថា នៅពេលគណបក្សសង្គ្រោះជាតិ ឈ្នះឆ្នោតឡើងដឹកនាំប្រទេស នឹងបង្កើតតុលាការឯករាជ្យមួយកាត់ទោសនាយករដ្ឋមន្ត្រី លោក ហ៊ុន សែន។
នេះជាការប្រកាសដ៏កម្រមួយដោយដៅចំឈ្មោះលោក លោក ហ៊ុន សែន តែម្ដង ដែលជាគូប្រកួតនយោបាយដ៏ស្រួចស្រាល់មួយអស់រយៈពេលជាច្រើនអាណត្តិណាស់មកហើយ។
ថ្លែងនៅក្នុងវេទិកាអ្នកស្តាប់អាស៊ីសេរី កាលពីយប់ថ្ងៃពុធ ទី៣១ មករា លោក សម រង្ស៊ី ថ្លែងដោយមិនសំចៃមាត់ថា ជនឧក្រិដ្ឋ ហ៊ុន សែន បានសាងកំហុសច្រើនណាស់ប្រឆាំងនឹងមនុស្សជាតិ ដូចជាការបង្កើតផែនការក៥ ដែលកេណ្ឌពលរដ្ឋឲ្យទៅកាប់ព្រៃនៅតំបន់ព្រំដែនជាន់មីនស្លាប់រាប់ម៉ឺនរាប់សែននាក់ ដោយស្តាប់តាមបញ្ជាវៀតណាម ដែលចូលមកឈ្លានពានកម្ពុជា កាលពីឆ្នាំ១៩៧៩ ហើយបានលើកបន្តុបលោក ហ៊ុន សែន ឲ្យធ្វើជាមេដឹកនាំផ្ដាច់ការសម្លាប់មនុស្ស គឺមិនខុសពីរបបខ្មែរក្រហមឡើយ៖ «»។
លោកបន្តថា ក្រៅពីតុលការឯករាជ្យក្នុងស្រុកផ្ដន្ទាទោសរួចហើយ លោក ហ៊ុន សែន នឹងត្រូវដឹកយកទៅកាត់ទោសនៅតុលាការអន្តរជាតិបន្តទៀត៖ «»។
ហេតុដូច្នេះហើយ ទើបលោកអំពាវនាវកុំឲ្យជនស្លូតត្រង់ ស្មោះត្រង់នឹងជាតិកុំភ្ជាប់វាសនាជាមួយលោក ហ៊ុន សែន ឲ្យសោះ ហើយងាកមកចូលរួមជាមួយចលនាសង្គ្រោះជាតិ សង្គ្រោះជាតិ រួមកម្លាំងអ្នកប្រជាធិបតេយ្យប្រឆាំងនឹងរបបផ្ដាច់ការ ដើម្បីរៀបចំកសាងប្រទេសឲ្យមានប្រជាធិបតេយ្យពិតប្រាកដ មានការគោរពសិទ្ធិមនុស្សពេញលេញ។
អាស៊ីសេរី មិនទាន់អាចស្វែងរកប្រតិកម្មតបពីមន្ត្រីនាំពាក្យរដ្ឋាភិបាលទាក់ទងនឹងការដាក់បន្ទុករបស់លោក សម រង្ស៊ី ចំពោះលោកនាយករដ្ឋមន្ត្រី ហ៊ុន សែន បាននៅឡើយទេ កាលពីថ្ងៃពុធ ទី៣១ មករា។
ប៉ុន្តែកន្លងមក លោក ហ៊ុន សែន ធ្លាប់ថ្លែងចំអកឲ្យបក្សប្រឆាំងថា លោកមិនខ្វល់ចំពោះផែនការខ្យល់ សន្យាខ្យល់ របស់ក្រុមប្រឆាំងដែលមាននាយករដ្ឋមន្ត្រីឧទាហរណ៍នោះឡើយ។
តែទោះយ៉ាងណា លោកព្រមានធ្ងន់ៗថា ទោះក្នុងតម្លៃណាក៏ដោយ លោកត្រូវតែការពារឲ្យបាននូវសន្តិភាពដែលលោកអះអាងថា រកបានដោយលំបាក។ ដូច្នេះលោកមិនអនុញ្ញាតឲ្យក្រុមប្រឆាំងមកបំផ្លាញសន្តិភាពនេះបានជាដាច់ខាត់។
ការប្រកាសរបស់លោក សម រង្ស៊ី ធ្វើឡើងស្របពេលមេធាវីអន្តរជាតិបានគ្រោងដាក់ភស្តុតាងដាក់បន្ទុកបន្ថែមពាក់ព័ន្ធនឹងចេតនាសម្លាប់ហ្វូងបាតុករដោយអហិង្សាកាលពីឆ្នាំ២០១៣ ទៅតុលាការព្រហ្មទណ្ឌអន្តរជាតិ (ICC) ក្រោយលោកនាយករដ្ឋមន្ត្រី ហ៊ុន សែន ប្រកាសជាសាធារណៈអំពីចេតនាឧក្រិដ្ឋនេះ។
មេធាវីអន្តរជាតិ និងជាជនជាតិអង់គ្លេស លោក រីឆាត រ៉ូជើរ (Richard Rogers) ចាត់ទុកសម្ដីរបស់លោក ហ៊ុន សែន ថាមិនស័ក្ដិសមជាសម្ដីរបស់អ្នកដឹកនាំក្នុងសម័យទំនើបនេះទេ។ លោកថា សម្ដីបែបនេះមិនខុសពីសម្ដីរបស់មេដឹកនាំផ្ដាច់ការ និងឃោរឃៅបំផុត ដូចជាលោក សាដាម ហ៊ូសេន លោក មូអាម៉ា ហ្កាដាហ្វ៊ី និង ប៉ុល ពត ជាដើម។ មេធាវីរូបនេះសង្ឃឹមយ៉ាងមុតមាំថា តុលាការ ICC នឹងចាត់ការលើសំណុំរឿងនេះឲ្យបានឆាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។