Clik here to view.
គ្រួសាររបស់យុវជន ដែលស្លាប់ដោយសារគ្រាប់កាំភ្លើងសមត្ថកិច្ចបាញ់បែកលលាដ៍ក្បាល នៅពេលចុះបង្ក្រាបគ្រឿងញៀនកាលពីថ្ងៃទី៨ មីនា ឆ្នាំ២០១៧ ប្រាប់ថា ក្រុមគ្រួសារទទួលបានសំណងរដ្ឋប្បវេណីរួចរាល់ហើយ ប៉ុន្តែ ពួកគេទទូចឲ្យសមត្ថកិច្ចចាប់ខ្លួនដៃដល់មកផ្ដន្ទាទោសក្នុងបណ្ដឹងអាជ្ញា។
ឪពុកយុវជន ហឿន ស៊ុយទ្រី ដែលស្លាប់នៅក្នុងប្រតិបត្តិការបង្ក្រាបគ្រឿងញៀនរបស់សមត្ថកិច្ចខែត្រតាកែវ គឺលោក ហម សាវី ថា ក្រុមគ្រួសារបានយល់ព្រមទទួលយកលុយចំនួន ៨.០០០ដុល្លារ ពីក្រុមគ្រួសាររបស់ជនដៃដល់ ដើម្បីទុកធ្វើបុណ្យខួបមួយឆ្នាំឲ្យកូនប្រុស។ លោកថា ក្រុមគ្រួសារព្រមទទួលយកថវិកានេះ ដោយសារជាសំណងជំងឺចិត្ត ក្នុងបណ្ដឹងរដ្ឋប្បវេណី ប៉ុន្តែសម្រាប់បណ្ដឹងផ្នែកព្រហ្មទណ្ឌ ក្រុមគ្រួសារនៅតែទាមទារឲ្យសមត្ថកិច្ចចាប់ជនដៃដល់ និងទទូចឲ្យព្រះរាជអាជ្ញារងអមសាលាដំបូងខែត្រតាកែវ ឈ្មោះ ជ័យ ឬទ្ធី ទទួលខុសត្រូវ ព្រោះមន្ត្រីរូបនេះ ជាអ្នកដឹកនាំប្រតិបត្តិការបង្ក្រាបគ្រឿងញៀនកាលណោះ ដូច្នេះគ្រួសារទទូចឲ្យចេញមុខបកស្រាយជាមួយក្រុមគ្រួសារសព។ «»
កាលពីថ្ងៃទី៨ ខែមីនា ឆ្នាំ២០១៧ នៅក្នុងប្រតិបត្តិការបង្ក្រាបគ្រឿងញៀន នៅភូមិត្រពាំងវែង ឃុំបឹងត្រាញ់ខាងត្បូង ស្រុកសំរោង ខេត្តតាកែវ នៅវេលាម៉ោងប្រហែល៦ល្ងាច យុវជនម្នាក់ ឈ្មោះ ហឿន ស៊ុយទ្រី បានស្លាប់ដោយការបាញ់ប្រហារ ១គ្រាប់កាំភ្លើងធ្លុះលលាដ៍ក្បាល។ ឪពុកម្ដាយរបស់ជនរងគ្រោះបានចោទប្រកាន់ក្រុមសមត្ថកិច្ចថា បានចាប់វាយខ្នោះដៃកូនគាត់ទៅក្រោយ បន្ទាប់មកប៉ូលិសបានវាយ បង្ខំឲ្យយុវជន ហឿន ស៊ុយទ្រី សារភាពថា លាក់ទុកថ្នាំញៀននៅទីណា ខណៈដែលសមត្ថកិច្ចឆែកឆេរ ផ្ទះមិនឃើញថ្នាំញៀន។
ម្ដាយយុវជន ហឿន ស៊ុយទ្រី រំលឹកទិដ្ឋភាពនោះទាំងខ្លោចផ្សា ថា អ្នកស្រីទទួលយកមិនបានទេ ចំពោះសកម្មភាពសមត្ថកិច្ច វាយធ្វើទារុណកម្ម និងបានបាញ់សម្លាប់កូន នៅចំពោះមុខអ្នកស្រី។ ក្រោយពីលឺសំឡេងស្នូរគ្រាប់កាំភ្លើងផ្ទុះ ម្ដាយជនរងគ្រោះ ប្រាប់ថា សមត្ថកិច្ចបានដោះអាវ ដើម្បីគ្រប់ក្បាលជនរងគ្រោះ និងអូសបណ្ដើរចេញពីកន្លែងកើតហេតុ។ ម្ដាយជនរងគ្រោះអះអាងថា គាត់បានអង្វរសមត្ថកិច្ចយូរណាស់ ទម្រាំអនុញ្ញាតឲ្យបានយកកូនទៅព្យាបាល នៅមន្ទីរពេទ្យឯកជនមួយ នៅក្បែរផ្ទះ ទាំងជាប់ខ្នោះដៃ ក្រោយមក គ្រួសារបានដឹកជនរងគ្រោះទៅព្យាបាលនៅមន្ទីរពេទ្យបង្អែកខែត្រតាកែវ។ ពេលទៅដល់ មន្ទីរពេទ្យខែត្រតាកែវ គ្រួសារជនរងគ្រោះ អះអាងថា សមត្ថកិច្ច បានដោះខ្នោះដៃឲ្យជនរងគ្រោះ និងបាននាំគ្នារត់ចោលជនរងគ្រោះ ឯក្រុមគ្រួសារបានទៅខ្ចីលុយគេ ដើម្បីដឹកជនរងគ្រោះទៅសង្គ្រោះមន្ទីរពេទ្យកាល់ម៉ែត រាជធានីភ្នំពេញ ទាំងកណ្ដាលយប់។
ម្ដាយជនរងគ្រោះ អ្នកស្រី ទន់ វួចហៀង អះអាងថា ក្រោយការបាញ់សម្លាប់កូនអ្នកស្រីភ្លាម សមត្ថកិច្ចស្រុកសំរោង ខែត្រតាកែវ បានហៅគ្រួសារទៅសម្របសម្រួលដើម្បីយកលុយ ៤.០០០ដុល្លារ ដើម្បីជាថ្នូរឈប់ឲ្យក្រុមគ្រួសារប្ដឹងទៅតុលាការ។ គ្រួសារជនរងគ្រោះ មិនព្រមទទួលយក និងទាមទារឲ្យអ្នកដឹកនាំប្រតិបត្តិការបង្ក្រាបគ្រឿងញៀន គឺព្រះរាជអាជ្ញារងអយ្យការអមសាលាដំបូងខេត្តតាកែវ ឈ្មោះ ជ័យ រិទ្ធី និងជនដៃដល់ដែលបានបាញ់កូនអ្នកស្រី ឲ្យទទួលទោសតាមច្បាប់។
ម្ដាយជនរងគ្រោះរំលឹកព្រឹត្តិការណ៍ កាលពីថ្ងៃទី៨ ខែមីនាថា នៅម៉ោងប្រហែល ៦ល្ងាច ក្រុមសមត្ថកិច្ចចម្រុះជាច្រើននាក់ ដែលអះអាងថា ពួកគេ គឺជាមន្ត្រីព្រះរាជអាជ្ញា និងមន្ត្រីប៉ូលិសព្រហ្មទណ្ឌខេត្តតាកែវ ទទួលបន្ទុកចុះបង្ក្រាបគ្រឿងញៀន បានចូលទៅចាប់យុវជន ហឿន ស៊ុយទ្រី វាយខ្នោះ បាញ់មួយគ្រាប់ធ្លុះលលាដ៍ក្បាល ហើយក្រោយបាញ់ធ្លុះលលាដ៍ក្បាលសមត្ថកិច្ចបានដោះអាវជនរងគ្រោះគ្របលើក្បាល និងវាយដំបន្ថែមទៀត ទាំងនៅនឹងមុខរបស់ម្ដាយជនរងគ្រោះ។ ម្ដាយជនរងគ្រោះ ហៅទង្វើបាញ់សម្លាប់ និងវាយកូនប្រុស នៅចំពោះមុខគាត់ និងការស្រែកដង្ហោយសុំអង្វរឲ្យលែងកូន គឺជារូបភាពដ៏ខ្លោចផ្សា ដែលដក់ក្នុងចិត្តអ្នកស្រី ក្នុងនាមជាម្ដាយ។
គ្រួសារជនរងគ្រោះបន្តអះអាងថា ដំបូងសមត្ថកិច្ច និងព្រះរាជអាជ្ញាបានឆែកឆេរផ្ទះអ្នកស្រីទាំងមូលហើយ បើទោះជារកមិនឃើញថ្នាំញៀនដូចការសង្ស័យក៏ដោយ ក៏ពួកគេមិនបានលើកលែងឲ្យគ្រួសារអ្នកស្រីដែរ។ ម្ដាយជនរងគ្រោះបន្តថា ក្រុមសមត្ថកិច្ចបានចាប់ជនរងគ្រោះដែលជាកូនអ្នកស្រី វាយបង្ខំឲ្យប្រាប់ពីកន្លែងលាក់ថ្នាំញៀននៅក្នុងផ្ទះ ហើយកូនអ្នកស្រីបានប្រាប់ទៅវិញថា គ្មានថ្នាំញៀននោះទេ។
ឪពុកជនរងគ្រោះ គឺលោក ហម សារី អះអាងថា កូនប្រុសរបស់លោក មានប្រវត្តិធ្លាប់ប្រើប្រាស់គ្រឿងញៀន ប៉ុន្តែបានផ្ដាច់ជាយូរមកហើយ ហើយបើទោះជា កូនប្រុសធ្លាប់មានប្រវត្តិប្រើប្រាស់គ្រឿងញៀន ក៏មិនត្រូវបាញ់សម្លាប់ដែរ លោក ហម សារី បន្ទោសសមត្ថកិច្ចខែត្រតាកែវ ថា គ្មានសមត្ថភាពទប់ស្កាត់គ្រឿងញៀន ទើបមានបំណងចាប់កូនប្រុសលោក ដើម្បីគំរាមយកប្រាក់។
បើទោះជាឪពុកជនរងគ្រោះ មិនហ៊ានចោទថា សមត្ថកិច្ចជាអ្នកបាញ់កូនប្រុស ព្រោះលោកមិនបានឃើញហេតុការណ៍បាញ់នោះផ្ទាល់ភ្នែក តែលោកយល់ថា ប្រតិបត្តិការនោះ មានតែក្រុមសមត្ថកិច្ចចម្រុះទេ ដែលមានកាំភ្លើង។ ឪពុកជនរងគ្រោះសង្ស័យថា ការបង្ក្រាបគ្រឿងញៀនតែនៅក្នុងផ្ទះរបស់លោកកាលណោះ ជាចេតនាឆ្លៀតឱកាស ដើម្បីបង្ខំគ្រួសារ ឲ្យលុយទៅសមត្ថកិច្ច ជាថ្នូរបញ្ចប់ការធ្វើទុក្ខបុកម្នេញករណីគ្រឿងញៀន។ ឪពុកជនរងគ្រោះ ទទូចឲ្យសមត្ថកិច្ចចាប់ជនដៃដល់ដើម្បីយកទៅផ្ដន្ទាទោសតាមច្បាប់។
សមាជិកគណៈមេធាវីនៃព្រះរាជាណាចក្រកម្ពុជាម្នាក់ លោកមេធាវី ចាន់ ហឿន ពន្យល់ថា ជាគោលការណ៍ច្បាប់ក្នុងរឿងក្ដីព្រហ្មទណ្ឌបែបនេះ គ្រួសារជនរងគ្រោះមានសិទ្ធិទទួលបានសំណងរដ្ឋប្បវេណី (ថវិកា) ដើម្បីយកទៅព្យាបាល ឬចាត់ចែងផ្សេងៗ។ ប៉ុន្តែ បណ្ដឹងអាជ្ញាមិនត្រូវផុតរលត់ទេ វៀរលែងតែចៅក្រមស៊ើបសួរ រកឃើញ ជនត្រូវចោទគ្មានទោស។ «»
ត្បិតក្រុមគ្រួសារជនរងគ្រោះបានទទួលសំណងរដ្ឋប្បវេណីរួចរាល់ ប៉ុន្តែ គិតមកដល់ថ្ងៃទី២៤ មករា គ្រួសារជនរងគ្រោះ អះអាងថា សមត្ថកិច្ចមិនទាន់ចាប់បានជនដៃដល់ ដែលបាញ់សម្លាប់កូនប្រុសនោះទេ ខណៈដែលសាលាដំបូងខែត្រតាកែវ ក៏មិនទាន់បានចេញដីកាចាប់ខ្លួនជនសង្ស័យដែរ។
នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ សង្ស័យថា ករណីនេះ ប៉ូលិស និងមន្ត្រីតុលាការខែត្រតាកែវ អាចទទួលបានផលប្រយោជន៍ពីគ្នា ឬទំនាស់ផលប្រយោជន៍ជាមួយគ្នា ទើបដំណើរការរឿងក្ដីនេះ អូសបន្លាយយូរ។ លោក សន ជ័យ មើលឃើញថា ប្រសិនបើមន្ត្រីយុត្តិធម៌ ពិតជាចង់រកយុត្តិធម៌ជូនពលរដ្ឋ រឿងក្ដីនេះងាយស្រួលរកជនល្មើសយ៉ាងស្រួល ហើយប្រសិនបើនៅតែមិនព្រមមានចំណាត់ការនោះទេ ស្ថាប័នតុលាការនៅខែត្រតាកែវ នឹងរងការរិះគន់ និងម៉ាកងាយពីពលរដ្ឋខែត្រតាកែវ ថា មិនឯករាជ្យ ឬខ្លាចអំណាចអ្នកធំ។ «»
គ្រួសារជនរងគ្រោះ និងសង្គមស៊ីវិល ស្នើឲ្យតុលាការខែត្រតាកែវ ពន្លឿននីតិវិធី និងប្រញាប់ចាប់ខ្មាន់កាំភ្លើង ដើម្បីផ្ដល់យុត្តិធម៌ឲ្យក្រុមគ្រួសារ៕