អ្នកកាសែតនិងអ្នកធ្វើការទាក់ទងវិស័យសារព័ត៌មាន ស្នើឲ្យជំនួបរវាងនាយករដ្ឋមន្ត្រី និងអ្នកកាសែត ឲ្យមានការបើកទូលាយ ព្រមទាំងអនុញ្ញាតឲ្យអ្នកកាសែតអាចប្រាប់ពីទុក្ខលំបាករបស់ខ្លួនក្នុងពេលបំពេញការងារតាមវិជ្ជាជីវៈទៅកាន់នាយករដ្ឋមន្ត្រី។ លោកនាយករដ្ឋមន្ត្រី ហ៊ុន សែន គ្រោងជួបអ្នកកាសែតជាលើកទី២ នៅថ្ងៃទី២១ មករា នេះ។
អ្នកកាសែតចង់ឃើញអ្នករៀបចំកម្មវិធីកែសម្រួលជំនួបលោក ហ៊ុន សែន និងអ្នកសារព័ត៌មាន ទុកឱកាសឲ្យអ្នកកាសែតអាចនិយាយពីទុក្ខលំបាករបស់ខ្លួនក្នុងពេលបំពេញវិជ្ជាជីវៈ ឲ្យលោក ហ៊ុន សែន និងមន្ត្រីរបស់លោកបានដឹងផង ដោយសារតែក្នុងជំនួបឆ្នាំមុន លោក ហ៊ុន សែន យកវេទិកានិយាយតែម្នាក់ឯង។
អ្នកកាសែត ខ្មែរ ថាមស៍ (Khmer Times) លោក ម៉ៃ ទិត្យថារ៉ា ប្រាប់ថា ឆ្នាំនេះលោកមិនបានជួបលោក ហ៊ុន សែន ដូចឆ្នាំមុនទេ។ លោក ម៉ៃ ទិត្យថារ៉ា រំលឹកថា បទពិសោធន៍ឆ្នាំមុនអ្នកកាសែត មន្ត្រីរដ្ឋាភិបាល និងលោក ហ៊ុន សែន មិនបាននិយាយគ្នាឲ្យបានស្និទ្ធស្នាលឡើយ។ លោកយល់ថា ឆ្នាំនេះគួរមានការរៀបចំកន្លែងអង្គុយពិសាអាហារដោយដាក់ឆ្លាស់គ្នាឲ្យមានអ្នកសារព័ត៌មានជាមួយមន្ត្រីរដ្ឋាភិបាល ឬអ្នកនាំពាក្យអាចអង្គុយនៅជិតគ្នា។ ក្រៅតែពីការពិសាអាហារជុំគ្នា លោក ម៉ៃ ទិត្យថារ៉ា ស្នើឲ្យមានការជជែកសួរដេញដោលគ្នារវាងអ្នកសារព័ត៌មានជាមួយមន្ត្រីអ្នកនាំពាក្យ និងលោក ហ៊ុន សែន៖ «»។
គិតមកទល់ពេលនេះ មានអ្នកកាសែតក្នុងស្រុកជាង ៣.០០០នាក់ហើយ បានទៅចុះឈ្មោះនៅក្រសួងព័ត៌មានដើម្បីចូលរួមក្នុងពិធីជួបសំណេះសំណាលជាមួយលោកនាយករដ្ឋមន្ត្រី ហ៊ុន សែន នៅកោះពេជ្រ នៅថ្ងៃទី២១ មករា ខាងមុខ។ ប៉ុន្តែចំនួនជាក់លាក់នៅមិនទាន់បានបង្ហាញឲ្យដឹងនៅឡើយទេ ខណៈកាលពីឆ្នាំទៅមានអ្នកកាសែតក្នុងស្រុកជាង ១.០០០នាក់បានទៅជួបលោក ហ៊ុន សែន។
នាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មាន លោក មឿន ឈានណារិទ្ធិ ដែលនឹងចូលរួមក្នុងពិធីនេះដែរយល់ថា ជំនួបនេះជារឿងល្អ ព្រោះនេះក៏ជាឱកាសដែលលោក ហ៊ុន សែន ពន្យល់ទៅអ្នកកាសែតពីវិធានការរបស់ខ្លួនដែលបានបិទកាសែតឯករាជ្យ និងវិទ្យុនៅពេលកន្លងមក។ យ៉ាងហោចណាស់ មានអតីតរាយការណ៍ព័ត៌មានអាស៊ីសេរី ចំនួនពីរនាក់ត្រូវបានអាជ្ញាធរចាប់ និងឃុំខ្លួនពីបទបញ្ជូនព័ត៌មានទៅឲ្យបរទេស ទោះបីអ្នកទាំងពីរបដិសេធក៏ដោយ។
លោក មឿន ឈានណារិទ្ធិ លើកឡើងថា ជំនួបរវាងលោកនាយករដ្ឋមន្ត្រី ហ៊ុន សែន និងអ្នកសារព័ត៌មាន គួរតែបើកទូលាយឲ្យអ្នកកាសែតដែលសរសេរគាំទ្ររដ្ឋាភិបាល និងអ្នកកាសែតសរសេររិះគន់រដ្ឋាភិបាលអាចចូលរួមក្នុងពិធីនេះដូចគ្នា៖ «»។
ក្រសួងព័ត៌មានជាអ្នករៀបចំកិច្ចប្រជុំនេះ នឹងមានសិទ្ធិសម្រេចដើម្បីឲ្យអ្នកកាសែតអាចចូលរួមពិធីនោះ។
ជុំវិញសំណើរបស់អ្នកសារព័ត៌មានដែលស្នើឲ្យមានការកែប្រែកម្មវិធីឲ្យល្អជាងឆ្នាំមុន និងការបើកទូលាយផងនោះ អាស៊ីសេរីបានសុំការបញ្ជាក់បន្ថែមពីអ្នកនាំពាក្យក្រសួងព័ត៌មាន លោក អ៊ុក គឹមសេង ប៉ុន្តែលោកមិនបានឆ្លើយតបវិញទេ ដោយបញ្ជាក់ថា លោកកំពុងប្រជុំក្នុងមហាសន្និបាតរបស់គណបក្សប្រជាជនកម្ពុជា។
ក្នុងជំនួបរវាងលោក ហ៊ុន សែន និងអ្នកសារព័ត៌មានកាលពីលើកទី១ រងការរិះគន់ថា អ្នករៀបចំកម្មវិធីរើសអើងអ្នកសារព័ត៌មានដែលសរសេររិះគន់រដ្ឋាភិបាល ព្រោះអ្នកសារព័ត៌មានដែលសរសេរពីបញ្ហានៃការអភិវឌ្ឍ និងសរសេរពីកំហុសនៃការអនុវត្តការងាររបស់រដ្ឋាភិបាល មិនត្រូវបានអនុញ្ញាតឲ្យចូលរួមទេ៕