ម្ដាយរបស់សកម្មជនមាតាធម្មជាតិ ២រូប ដែលកំពុងជាប់ឃុំ បានយកញត្តិទៅដាក់នៅក្រសួងជំនាញ និងអង្គការសង្គមស៊ីវិលមួយចំនួន នៅថ្ងៃទី១៨ មករា នេះ ដើម្បីស្នើសុំឱ្យស្ថាប័នទាំងនោះជួយអន្តរាគមន៍ឱ្យតុលាការខេត្តកោះកុងដោះលែងកូនរបស់ពួកគាត់មកវិញ។ ការស្នើសុំអន្តរាគមន៍ពីស្ថាប័នពាក់ព័ន្ធនេះ ធ្វើឡើងស្របពេលដែលតុលាការខេត្តកោះកុង គ្រោងបើកសវនាការជំនុំជម្រះរឿងក្តីនេះនៅថ្ងៃព្រហស្បតិ៍ សប្ដាហ៍ក្រោយ។
ម្ដាយរបស់លោក ហ៊ុន វណ្ណៈ និងលោក ឌឹម គុណឌី យកញត្តិទៅដាក់នៅក្រសួងបរិស្ថាន និងក្រសួងរ៉ែ និងថាមពល ព្រមទាំងសមាគមអាដហុក (ADHOC) ដើម្បីស្នើសុំឱ្យស្ថាប័នទាំងនេះ ជួយអន្តរាគមន៍ឱ្យតុលាការខេត្តកោះកុងដោះលែងកូនប្រុសរបស់ពួកគាត់មកវិញ។
ម្ដាយរបស់លោក ហ៊ុន វណ្ណៈ គឺលោកស្រី ទី ម៉ារី បញ្ជាក់ប្រាប់អាស៊ីសេរីថា កូនរបស់គាត់មិនបានប្រព្រឹត្តកំហុសដូចការចោទប្រកាន់របស់តុលាការខេត្តកោះកុងនោះទេ គឺរូបគេគ្រាន់តែចុះទៅថតរូបកប៉ាល់ចតនៅក្នុងលំហសមុទ្រប៉ុណ្ណោះ ក៏ប៉ុន្តែបែរជាត្រូវបុគ្គលិកក្រុមហ៊ុន និងអាជ្ញាធរមូលដ្ឋាន ចាប់ខ្លួនរូបគេ និងបញ្ជូនទៅឃុំខ្លួននៅពន្ធនាគារទៅវិញ។ លោកស្រីបន្តថា នេះជារឿងអយុត្តិធម៌ ដែលអាជ្ញាធរ និងតុលាការខេត្តកោះកុងធ្វើមកលើកូនប្រុសលោកស្រី ដែលជាសកម្មជនបរិស្ថាន។ លោកស្រីអាណិតអាសូរ និងនឹករលឹកដល់កូនដែលកំពុងជាប់ឃុំ ហេតុដូចនេះហើយទើបអំពាវនាវដល់ស្ថាប័នពាក់ព័ន្ធឱ្យជួយអន្តរាគមន៍ ដោះលែងកូនរបស់លោកស្រីឱ្យមានសេរីភាពវិញ៖ «ខ្ញុំសំណូមពរដល់តុលាការត្រូវមានភាពយុត្តិធម៌ កុំលម្អៀង ព្រោះកូនខ្ញុំអត់មានធើ្វអ្វីខុសទេ អត់មានភស្តុតាងអ្វីបង្ហាញថា ខុសនោះទេ។ អ្នកដែលខុសនោះ គឺបុគ្គលដែលធ្វើរំលោភច្បាប់ រំលោភថវិកាប្រទេសជាតិ នោះទើបតុលាការត្រូវគិតគូរ។ កុំតាមតែក្រុមហ៊ុនថាម៉េចធ្វើអ៊ីចឹងនោះ គឺត្រូវមានចិត្តស្នេហាជាតិផង ទើបប្រទេសជាតិយើងបានរុងរឿង។ បើយើងធ្វើតាមតែក្រុមហ៊ុន នោះប្រទេសជាតិយើងមិនអាចរុងរឿងបានទេ វានឹងទៅជារឿងពុករលួយពេញទីហើយ»។
ចំណែក ម្ដាយរបស់លោក ឌឹម គុណឌី គឺលោកស្រី ដួង សាកធារី វិញ ក៏បានអះអាងដែរថា សកម្មភាពកូនរបស់គាត់នេះ គឺជាការចូលរួមការពារធនធានធម្មជាតិ ស្របទៅតាមការអំពាវនាវរបស់រដ្ឋាភិបាលដែលអំពាវនាវឱ្យយុវជនចូលរួមឃ្លាំមើល និងការពារបរិស្ថាន និងធនធានធម្មជាតិ ប៉ុន្តែពេលកូនគាត់ចូលរួម បែរជាត្រូវគេចាប់ដាក់ពន្ធនាគារបែបនេះទៅវិញ។ លោកស្រីអះអាងថា លោកស្រីពិតជាមានការឈឺចាប់ខ្លាំងណាស់ ដែលឃើញកូនប្រុសត្រូវជាប់ពន្ធនាគារដោយសារតែសកម្មភាពជួយសង្គមបែបនេះ។ លោកស្រីសង្ឃឹមថា អាជ្ញាធរខេត្តកោះកុងនឹងជំនុំជម្រះរឿងក្តីនេះដោយយុត្តិធម៌៖ «កូនខ្ញុំខំតស៊ូតាំងពីយូរមកហើយ ដោយមិនមានខុសអ្វីសោះ ទៅចាប់គ្នាដាក់គុកជាង ៤ខែ។ ខ្ញុំឃើញថា វាមានភាពអយុត្តិធម៌ច្រើន ហើយខ្ញុំស្នើសុំអន្តរាគមន៍ពីសម្តេច ហ៊ុន សែន ផង ឱ្យជួយមើលខាងណាខុសខាងណាត្រូវ ព្រោះគាត់ធ្លាប់ប្រកាសថា ឱ្យយុវជនទៅការពារបរិស្ថាន តែពេលគ្នាទៅការពារបរិស្ថានហើយ ទៅចាប់គ្នាដាក់គុកវិញ។ នេះហើយជារឿងអយុត្តិធម៌ ហើយខ្ញុំសុំឱ្យគាត់ដោះលែងកូនខ្ញុំឆាប់ៗនេះផង»។
សកម្មជនអង្គការមាតាធម្មជាតិ ២រូប គឺលោក ហ៊ុន វណ្ណៈ និងលោក ឌឹម គុណឌី ត្រូវបានអាជ្ញាធរចាប់ឃុំខ្លួនចាប់តាំងពីថ្ងៃទី១២ កញ្ញា ឆ្នាំ ២០១៧ រហូតមកទល់នឹងពេលបច្ចុប្បន្ន ក្រោយពេលអ្នកទាំងពីរបានជិះទូកថតរូបភាព និងវីដេអូ សកម្មភាពកប៉ាល់ដឹកខ្សាច់ស៊ីលីកាពីរគ្រឿងក្នុងលំហសមុទ្រ នៅឃុំព្រែកខ្សាច់ ស្រុកគិរីសាគរ ខេត្តកោះកុង។ ដើមបណ្ដឹងក្នុងសំណុំរឿងនេះ គឺក្រុមហ៊ុនតំបន់សេដ្ឋកិច្ចពិសេសកោះកុង ដែលហៅកាត់ថា អេស.អ៊ី.ហ្សិត (SEZ Koh Kong Co., Ltd.) របស់លោកឧកញ៉ា លី យ៉ុងផាត់ ដែលជាសមាជិកព្រឹទ្ធសភាគណបក្សប្រជាជនកម្ពុជា ជាអ្នកជំនួញដ៏មានឥទ្ធិពល និងជាអ្នករកស៊ីនាំចេញខ្សាច់នៅខេត្តកោះកុង ជាច្រើនឆ្នាំមកហើយ។
សកម្មជនបរិស្ថានទាំងពីរត្រូវបានចោទប្រកាន់ចំនួនពីរបទល្មើស គឺទី១ ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងទី២ ធ្វើឲ្យប៉ះពាល់ដល់សិទ្ធិខាងរូបភាពនៃបុគ្គល ដែលប្រឈមនឹងការជាប់ពន្ធនាគាររហូតដល់ ៣ឆ្នាំ។
ទោះបីជាយ៉ាងណា អង្គការលើកលែងទោសអន្តរជាតិ (Amnesty International) រកមិនឃើញថា សកម្មភាពរបស់ លោក ហ៊ុន វណ្ណៈ និងលោក ឌឹម គុណឌី នេះ គឺជាការប្រព្រឹត្តបទឧក្រិដ្ឋឡើយ។ អង្គការសិទ្ធិមនុស្សអន្តរជាតិមួយនេះ ហៅសកម្មជនទាំងពីររូបនេះ ថាជាអ្នកទោសមនសិការ និងទាមទារឱ្យអាជ្ញាធរខេត្តកោះកុងដោះលែងអ្នកទាំងពីរជាបន្ទាន់ និងឥតលក្ខខណ្ឌ។
អតីតអ្នកសម្របសម្រួលបណ្ដាញស្ត្រីនៃអង្គការមាតាធម្មជាតិ អ្នកនាង លឹម គីមស័រ ចាត់ទុកការចោទប្រកាន់ និងឃុំខ្លួនអតីតសហការីរបស់អ្នកនាង គឺជារឿងអយុត្តិធម៌ និងជាការធ្វើទុកបុកម្នេញលើសកម្មជនបរិស្ថានដែលហ៊ានចេញមុខតស៊ូមតិរឿងការពារធនធានធម្មជាតិ។ អ្នកនាងក៏សម្ដែងការសោកស្ដាយចំពោះតុលាការខេត្តកោះកុងដែរ ដែលបន្តឃុំខ្លួនពួកគេជាង ៤ ខែ ដោយមិនជំនុំជម្រះ ដែលជាការអនុវត្តខុសនីតិវិធី៖ «ខ្ញុំមានតែជំរុញឱ្យតុលាការហ្នឹងដោះស្រាយឱ្យបានឆាប់ចំពោះសំណុំរឿងរបស់ពួកគាត់ ហើយស្នើសុំក្រសួងពាក់ព័ន្ធទាំងអស់ឱ្យមើលទៅលើរឿងនេះផង ហើយកុំភ្លេចប្រសាសន៍របស់សម្តេចដែលគាត់តែងតែលើកដដែលៗ ថាឱ្យយុវជនចូលរួមកិច្ចការងារសង្គម និងបរិស្ថាន ជួយឃ្លាំមើលអំពើពុករលួយ ហើយមិនត្រឹមតែសម្តេចទេ សូម្បីតែក្រសួងពាក់ព័ន្ធក៏តែងលើកឡើងដូចនេះដែរ។ ប្រសិនបើយើងធ្វើការងារហ្នឹងហើយ គាត់ចាប់យើងដាក់គុក ហើយគាត់មិនដោះស្រាយ ស្តាប់តែបញ្ជារបស់ក្រុមហ៊ុនដដែល សួរថាតើមានយុវជនណាដែលហ៊ានចេញមុខការពារ (បរិស្ថាន) បន្តទៀត?»។
ម្ដាយរបស់លោក ហ៊ុន វណ្ណៈ និងលោក ឌឹម គុណឌី សកម្មជនបរិស្ថាន និងអង្គការសង្គមស៊ីវិល អះអាងថា ពួកគេនឹងតាមដានសវនាការជំនុំជម្រះរឿងក្តីនេះ នៅថ្ងៃទី២៥ មករា សប្ដាហ៍ក្រោយ ដោយយកចិត្តទុកដាក់ និងបន្តការទាមទាររហូតទាល់តែរឿងក្តីនេះមានភាពយុត្តិធម៌៕