តុលាការខេត្តកោះកុង គ្រោងបើកសវនាការជំនុំជម្រះសំណុំរឿងសកម្មជនអង្គការមាតាធម្មជាតិ ២រូប នៅថ្ងៃទី២៥ ខែមករា សប្ដាហ៍ក្រោយនេះ។
មេធាវីការពារក្តីឱ្យសកម្មជនអង្គការមាតាធម្មជាតិ ២រូប លោក សំ ចំរើន អះអាងប្រាប់អាស៊ីសេរីថា លោកត្រៀមខ្លួនរួចជាស្រេចនៅក្នុងការតតាំងរឿងក្តីនេះ ហើយនិងខំប្រឹងប្រែងឱ្យអស់លទ្ធភាពដើម្បីរកយុត្តិធម៌ជូនកូនក្តីរបស់លោក៖ «វា ៩០ភាគរយហើយកម្មវិធីនៅថ្ងៃនោះ ព្រោះយើងបានដាក់ពាក្យច្រើនជំរុញទៅព្រះរាជអាជ្ញា និងចៅក្រមផង ដើម្បីចាត់ការរឿងនេះឱ្យបានឆាប់ ព្រោះយើងឃើញថា វាមានភាពមិនប្រក្រតីច្រើន។ ខ្ញុំត្រៀមរួចរាល់អស់ហើយ ដើម្បីការពារក្តីរឿងនេះឱ្យបានពេញលេញ និងគ្រប់ជ្រុងជ្រោយ ព្រោះយើងបានតាមដានរឿងនេះតាំងពីដំបូង អ៊ីចឹងយើងគិតថា យើងយល់រឿងក្តីនេះបានច្រើន»។
សកម្មជនអង្គការមាតាធម្មជាតិ ២រូប គឺលោក ហ៊ុន វណ្ណៈ និងលោក ឌឹម គុណឌី ត្រូវបានអាជ្ញាធរចាប់ឃុំខ្លួនចាប់តាំងពីថ្ងៃទី១២ កញ្ញា ឆ្នាំ២០១៧ រហូតមកទល់នឹងពេលបច្ចុប្បន្ន ក្រោយពេលអ្នកទាំងពីរបានជិះទូកថតរូបភាព និងវីដេអូ កប៉ាល់ដឹកខ្សាច់ស៊ីលីកាពីរគ្រឿងក្នុងលំហសមុទ្រ នៅឃុំព្រែកខ្សាច់ ស្រុកគីរីសាគរ ខេត្តកោះកុង។ ដើមបណ្ដឹងក្នុងសំណុំរឿងនេះ គឺក្រុមហ៊ុនតំបន់សេដ្ឋកិច្ចពិសេសកោះកុង ដែលហៅកាត់ថា អេស.អ៊ី.ហ្សិត (SEZ Koh Kong Co., Ltd.) របស់លោកឧកញ៉ា លី យ៉ុងផាត់។
សកម្មជនបរិស្ថានទាំងពីរត្រូវបានចោទប្រកាន់ចំនួនពីរបទល្មើស គឺទី១ ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងទី២ ធ្វើឲ្យប៉ះពាល់ដល់សិទ្ធិខាងរូបភាពនៃបុគ្គល ដែលប្រឈមនឹងការជាប់ពន្ធនាគាររហូតដល់ ៣ឆ្នាំ។ ទោះបីជាយ៉ាងណា ក្រុមអង្គការសង្គមស៊ីវិលជាតិ និងអន្តរជាតិ ព្រមទាំងអ្នកច្បាប់ យល់ឃើញថា ការចាប់ខ្លួនអ្នកទាំងពីរដាក់ពន្ធនាគារនេះ គឺជារឿងអយុត្តិធម៌ និងជាការធ្វើទុក្ខបុកម្នេញលើសកម្មជនបរិស្ថានដែលហ៊ានចេញមុខតស៊ូមតិរឿងការពារធនធានធម្មជាតិ។
អង្គការលើកលែងទោសអន្តរជាតិ (Amnesty International) ហៅសកម្មជនទាំងពីររូបថា ជាអ្នកទោសមនសិការ និងទាមទារឱ្យអាជ្ញាធរខេត្តកោះកុង ដោះលែងអ្នកទាំងពីរជាបន្ទាន់ដោយគ្មានលក្ខខណ្ឌ៕