កម្មកររោងចក្រចំនួន២ ដែលមានថៅកែ ជាជនជាតិកូរ៉េ ត្រៀមដាក់ញត្តិដើម្បីសុំអន្តរាគមន៍ពីលោកនាយករដ្ឋមន្ត្រី ហ៊ុន សែន នៅថ្ងៃទី១៨ ខែមករា ក្រោយពេលពួកគេដេកតវ៉ានៅមុខរោងចក្រជាង ១ខែហើយ នៅតែគ្មានដំណោះស្រាយ។
កម្មកររោងចក្រចំនួន២ ដែលត្រៀមដាក់ញត្តិស្នើសុំការអន្តរាគមន៍ គឺរោងចក្រ ហ្គាវ័ន អាប់ភែរឹល (Gawon Apparel) នៅក្រុងតាខ្មៅ ខេត្តកណ្ដាល និងរោងចក្រ ហ្វើស ហ្គាវ័ន អាប់ភែរឹល (First Gawon Apparel) នៅតាមបណ្ដាយផ្លូវជាតិលេខ២ ភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។ ក្រុមកម្មករទាំង ២រោងចក្រ អះអាងថា រោងចក្រទាំង២នេះ គ្រប់គ្រងដោយថៅកែតែមួយគឺជាជនជាតិកូរ៉េ។
សហជីពស៊ីខៅឌូ ប្រចាំរោងចក្រ ហ្គាវ័ន លោក រ៉ាន់ បូរ៉ា អោយដឹងថា កម្មករបានត្រៀមញត្តិរួចរាល់ហើយ និងត្រៀមដាក់ជូនលោកនាយករដ្ឋមន្ត្រី ហ៊ុន សែន នៅថ្ងៃទី១៨ ខែមករា។ លោកថា សំណើនេះធ្វើឡើងក្រោយពីកម្មកររោងចក្រហ្គាវ័ន បានមកដេកនៅមុខរោងចក្រកាន់តែច្រើនឡើងៗ និងក្រោយពីបានសុំយោបល់ពីប្រធានសហភាពការងារកម្ពុជា៖ «ខាងថៅកែក្រុមហ៊ុនគាត់មានក្រុមហ៊ុនចំនួន២ មួយនៅចាក់អង្រែ មួយនៅទៀតនៅតាខ្មៅ។ កាលពីមួយខែមុន ក្រុមហ៊ុន ហ្វើស ហ្គាវ័ន បើកប្រាក់ពេញ តែមកដល់ខែនេះ គឺក្រុមហ៊ុនមិនបានបើកប្រាក់ខែឲ្យកម្មករខែនេះ មិនព្រមបើកប្រាក់ខែពេញទេ ក្រុមហ៊ុនទាំង២ អ៊ីចឹងកម្មករក្រុមហ៊ុនទាំង២ ក៏ធ្វើបាតុកម្មទាំង២រោងចក្រតែម្ដងទៅ»។
រយៈពេល១ខែកន្លះមកហើយ ដែលកម្មករបានមកដេកយាមនៅមុខរោងចក្រហ្គាវ័ន ទាំងថ្ងៃទាំងយប់ដើម្បីការពារមិនឲ្យថៅកែដឹកសម្ភារៈចេញក្រៅ។ ចំណែករោងចក្រ ហ្វើស ហ្គាវ័ន នៅសង្កាត់ចាក់អង្រែក្រោម រាជធានីភ្នំពេញ បានផ្ទុះកូដកម្មកាលពីថ្ងៃទី១០ មករា និងបាននាំគ្នាបន្តធ្វើកូដកម្មដោយអង្គុយក្រៅរោងចក្រមិនព្រមចូលធ្វើការងារ ដើម្បីទាមទារអោយថៅកែរោងចក្របើកប្រាក់ខែជូនពួកគាត់។
កម្មការិនីរោងចក្រហ្វើស ហ្គាវ័ន អាប់ភែរឹល អ្នកស្រី សុខ សំណាង បានឲ្យអាស៊ីសេរី ដឹងថា រោងចក្រហ្វើស ហ្គាវ័ន នឹងនាំគ្នាទៅដាក់ញត្តិនៅមុខផ្ទះលោកនាយករដ្ឋមន្ត្រី ហ៊ុន សែន នៅថ្ងៃទី១៨ ខែមករា ដើម្បីស្នើសុំដោយផ្ទាល់ឲ្យលោកនាយករដ្ឋមន្ត្រី ជួយរកដំណោះស្រាយដល់ពួកគាត់។ អ្នកស្រីថា នៅពេលនេះ ក្ដីរំពឹងរបស់កម្មករគឺមានតែលោកនាយករដ្ឋមន្ត្រីតែមួយគត់ ព្រោះអ្នកស្រីឧស្សាហ៍ឃើញលោកនាយករដ្ឋមន្ត្រី ហ៊ុន សែន ចុះជួប និងជួយកម្មករ។
ចំណែកកម្មការិនីរោងចក្រ ហ្គា វ័ន អាប់ភែរឹល នៅក្រុងតាខ្មៅ ម្នាក់ អ្នកស្រី សាន សុខន ឲ្យដឹងថា មកដល់ពេលនេះកម្មករជាច្រើនអស់លទ្ធភាពក្នុងការបង់ថ្លៃផ្ទះជួល ហើយនាំគ្នាយកចាន ឆ្នាំង មកបោះតង់ដេកនៅមុខរោងចក្រ ក្រោយពេលថៅកែមិនបើកប្រាក់ខែជាច្រើនខែឲ្យពួកគាត់៖ «កម្មករសុំស្នើអោយសម្ដេចតេជោ សូមធ្វើការអន្តរាគមន៍ចំពោះខាងបងប្អូនកម្មករ ហ្គាវ័ន និងកម្មករហ្វើស ហ្គាវ័នទាំងអស់គ្នាផង ព្រោះអីពួកខ្ញុំពិបាកណាស់ ពួកខ្ញុំធ្វើការយកកម្លាំងដើម្បីប្ដូរប្រាក់ខែ បើថៅកែមិនព្រមបើកប្រាក់ខែឲ្យពួកខ្ញុំ អោយពួកខ្ញុំធ្វើយ៉ាងម៉េច ខ្ញុំ និងកម្មករផ្សេងៗមានតែបន្តធ្វើកូដកម្មមុខរោងចក្រ។ អំពាវនាវដល់បុគ្គលមួយចំនួនកុំលាបពណ៌ពួកខ្ញុំ ពួកខ្ញុំមិននៅគណបក្សណាមួយទេ។ ពួកខ្ញុំសូមទាមទារតែអ្វីដែលត្រឹមត្រូវ និងអ្វីដែលពួកខ្ញុំទទួលបាន»។
«កម្មករសុំស្នើអោយសម្ដេចតេជោ សូមធ្វើការអន្តរាគមន៍ចំពោះខាងបងប្អូនកម្មករ ហ្គាវ័ន និងកម្មករហ្វើស ហ្គាវ័នទាំងអស់គ្នាផង ព្រោះអីពួកខ្ញុំពិបាកណាស់ ពួកខ្ញុំធ្វើការយកកម្លាំងដើម្បីប្ដូរប្រាក់ខែ បើថៅកែមិនព្រមបើកប្រាក់ខែឲ្យពួកខ្ញុំ អោយពួកខ្ញុំធ្វើយ៉ាងម៉េច ខ្ញុំ និងកម្មករផ្សេងៗមានតែបន្តធ្វើកូដកម្មមុខរោងចក្រ។ អំពាវនាវដល់បុគ្គលមួយចំនួនកុំលាបពណ៌ពួកខ្ញុំ ពួកខ្ញុំមិននៅគណបក្សណាមួយទេ។ ពួកខ្ញុំសូមទាមទារតែអ្វីដែលត្រឹមត្រូវ និងអ្វីដែលពួកខ្ញុំទទួលបាន»។
កម្មករទាំង ២រោងចក្រ បានធ្វើកូដកម្មតវ៉ាទាមទារ និងផ្លាស់វេនគ្នាដេកនៅមុខរោងចក្រទាំងយប់ទាំងថ្ងៃជាច្រើនថ្ងៃមកហើយ។ កម្មកររោងចក្រហ្គា វ័ន នៅក្រុងតាខ្មៅ បានចាប់ផ្ដើមការតវ៉ានេះមុន ដោយសារថៅកែរោងចក្របើកប្រាក់ឈ្នួលមិនគ្រប់ចំនួន និងមិនទៀងទាត់។ ប៉ុន្តែកាលពីថ្ងៃទី២៨ ខែធ្នូ កន្លងទៅ តុលាការខេត្តកណ្ដាល ចេញដីកាបង្គាប់ឲ្យកម្មករហ្គា វ័ន ចូលធ្វើការវិញ។
នៅពេលមានដីកាពីតុលាការដូចនេះ កម្មករខ្លះព្រមចូលធ្វើការ ប៉ុន្តែកម្មករខ្លះទៀតក៏មិនព្រមចូលធ្វើការដែរ។
អាស៊ីសេរី មិនអាចរកប្រភពភាគីថៅកែរោងចក្រ ដើម្បីបំភ្លឺជុំវិញបញ្ហានេះបានទេ នៅថ្ងៃទី១៧ ខែមករា។ ប៉ុន្តែ កាលពីថ្ងៃទី១៣ ខែធ្នូ កន្លងទៅ ថៅកែរោងចក្រអ្នកស្រី ឆា ក្យុងហ៊ី បានរាយការណ៍ទៅមន្ទីរការងារខេត្តកណ្ដាលថា ការដឹកម៉ាស៊ីនចេញពីរោងចក្រ គឺដើម្បីផ្លាស់ប្ដូរម៉ាស៊ីនថ្មីតម្រូវតាមការបញ្ជាទិញរបស់ភ្ញៀវថ្មី។ ថៅកែរោងចក្របានហៅការតវ៉ារបស់កម្មករដែលចាប់ផ្ដើមពីថ្ងៃទី១០ ខែធ្នូនោះ ជាការខុសច្បាប់។
កាលពីថ្ងៃទី៤ ខែមករា កម្មករជិត ៦០០នាក់ នៅរោងចក្រ ហ្គា វ័ន អាប់ភែរឹល នៅក្រុងតាខ្មៅ ត្រូវបានថៅកែរោងចក្របញ្ឈប់ពីការងារ ក្រោយពេលពួកគេតវ៉ានៅមុខរោងចក្រជាង ១ខែ ដោយមិនព្រមចូលធ្វើការតាមការកំណត់របស់ថៅកែ។ ក្រុមកម្មករបានចោទថា ថៅកែរោងចក្រ ហ្គា វ័ន បានរំលោភច្បាប់ការងារ និងរំលោភសិទ្ធរបស់កម្មករ៕