Clik here to view.
រដ្ឋមន្ត្រីក្រសួងសាធារណការ លោក ស៊ុន ចាន់ថុល ថ្លែងអះអាងថា ក្រសួងសាធារណការ និងដឹកជញ្ជូន សម្រេចបានការងារសំខាន់ៗរួមមាន៖ ការដាក់ឱ្យដំណើរការសេវាដឹកជញ្ជូនអ្នកដំណើរតាមរថភ្លើងពីរាជធានីភ្នំពេញ ទៅព្រលានយន្តហោះអន្តរជាតិភ្នំពេញ ការតភ្ជាប់ផ្លូវដែកកម្ពុជាជាមួយប្រទេសថៃ សេវាដឹកជញ្ជូនអ្នកដំណើរតាមផ្លូវទឹក ការបិតចំណាំងផ្លាត សុវត្ថិភាពជូនពលរដ្ឋជាងបីលានដោយឥតគិតថ្លៃ ចលនាចែកមួកសុវត្ថិភាព និងការផលិតស្ពតអប់រំស្ដីពីសុវត្ថិភាពចរាចរណ៍ផ្លូវគោក។
រដ្ឋមន្ត្រីក្រសួងសាធារណការបានឲ្យដឹងដែរថា ការដាក់ឱ្យដំណើរការសេវាដឹកជញ្ជូនអ្នកដំណើរតាមរថភ្លើងពីរាជធានីភ្នំពេញ ទៅព្រលានយន្តហោះអន្តរជាតិភ្នំពេញ នឹងដាក់ឲ្យដំណើរការជាផ្លូវការមុនបុណ្យចូលឆ្នាំខ្មែរ ចំណែកឯសេវាដឹកជញ្ជូនអ្នកដំណើរតាមផ្លូវទឹកពីព្រែកព្នៅ ទៅក្រុងភ្នំពេញ និងក្រុងតាខ្មៅក៏ដូចគ្នាដែរ។ លោក ស៊ុន ចាន់ថុល ថ្លែងថា សមិទ្ធផល សំខាន់ៗដែលលើកឡើងក្នុងសន្និបាតនេះមួយចំនួនក្រសួងបានអនុវត្តសម្រេចហើយ នៅមួយចំនួនទៀតក្រសួងនឹងបន្តអនុវត្តឲ្យបានជោគជ័យនៅក្នុងឆ្នាំ២០១៨នេះ។
ជាមួយគ្នានេះ លោក ស៊ុន ចាន់ថុល ក៏បានលើកឡើងផងដែរអំពីយុទ្ធនាការចុះបង្ក្រាបរថយន្តដឹកជញ្ជូនលើសទម្ងន់ និងការណែនាំឱ្យមន្ត្រីបច្ចេកទេសចុះពិនិត្យមើលការបិតសំបុកមាន់ការជួសជុលថែទាំផ្លូវថ្នល់ ដើម្បីអោយមានគុណភាពរឹងមាំប្រើប្រាស់បានយូរអង្វែង និងគោរពតាមស្តង់ដារបច្ចេកទេស៕
