Clik here to view.
អ្នកឃ្លាំមើលផែនការអភិវឌ្ឍសង្គម និងប្រជាពលរដ្ឋរស់ខេត្តព្រះសីហនុ កំពុងតាមដានចំណាត់ការ របស់មន្ត្រីស្ថាប័នជំនាញពាក់ព័ន្ធនានា ដែលបានចុះពិនិត្យការប្រើប្រាស់អក្សរខ្មែរ និងអក្សរបរទេស នៅលើផ្ទាំងប៉ាណូ ឬផ្ទាំងគំនូរសំណង់អាគារ ព្រមទាំងស្លាកយីហោផ្សេងៗ នាខេត្តព្រះសីហនុថាមានប្រសិទ្ធភាពដែរឬទេ?
ប្រជាពលរដ្ឋ អាជីវករជនជាតិខ្មែរ និងមន្ត្រីអង្គការក្រៅរដ្ឋាភិបាលមួយចំនួន នាខេត្តព្រះសីហនុ រួមមាន៖ អង្គការលីកាដូ (Licadho) និងសមាគមអាដហុក (Adhoc) ជាដើម បានស្វាគមន៍សកម្មភាព របស់មន្ត្រីស្ថាប័នជំនាញ ដែលបានចុះពិនិត្យជាក់ស្ដែងទៅលើការប្រើប្រាស់អក្សរខ្មែរ និងអក្សរបរទេស ឲ្យបានត្រឹមត្រូវ ពិសេសការប្រើប្រាស់អក្សរចិន នៅលើផ្ទាំងផ្សព្វផ្សាយ ឬស្លាកយីហោនានា ដែលមានភាពមិនប្រក្រតីនាខេត្តជាប់ឆ្នេរសមុទ្រមួយនេះ។
អ្នកសម្របសម្រួលសមាគមអាដហុក ប្រចាំខេត្តព្រះសីហនុ អ្នកស្រី ជៀប សុធារី មានប្រសាសន៍ថា កន្លងមក ស្លាកសញ្ញាផ្សេងៗ ដែលមានម្ចាស់ ឬមានថៅកែជាជនបរទេស ពិសេសជនជាតិចិន គឺបានសរសេរអក្សរនៅលើផ្ទាំងប៉ាណូ ផ្ទាំងគំនូរសំណង់ និងស្លាកយីហោផ្សេងៗជាអក្សរចិន មានទំហំធំៗ ជាងអក្សរខ្មែរ ឬមិនមានសរសេរអក្សរខ្មែរជាដើម។
ត្រង់ចំណុចនេះ អ្នកស្រី សុធារី បានស្នើដល់មន្ត្រីជំនាញស្ថាប័នពាក់ព័ន្ធ ពិសេសក្រសួងរៀបចំដែនដី នគរូបនីយកម្ម និងសំណង់ និងក្រសួងវប្បធម៌ និងវិចិត្រសិល្បៈជាដើម ឲ្យបន្តសកម្មភាពចុះត្រួតពិនិត្យការប្រើប្រាស់អក្សរខ្មែរ និងអក្សរបរទេស នៅលើសំណង់អាគារផ្សេងៗ ឲ្យបានត្រឹមត្រូវ ដើម្បីបញ្ចៀសមតិរិះគន់ និងលើកកម្ពស់អក្សរសាស្ត្រជាតិខ្លួនឯងឲ្យបានប្រសើរឡើងវិញ៖ «យើងសង្កេតឃើញថា មានកំហុសឆ្គងមួយចំនួនពាក់ព័ន្ធអ្នកវិនិយោគ ដែលលើកស្លាកយីហោ សរសេរអក្សរខ្មែរមិនត្រឹមត្រូវ ឬក៏មិនបានសរសេរអក្សរខ្មែរនៅលើស្លាកយីហោ និងមិនបានគោរពទៅតាមនីតិវិធីនៃការបង់ពន្ធជូនរដ្ឋជាដើម។ ដូច្នេះសូមអ្នកវិនិយោគទុនទាំងអស់ត្រូវចូលរួមគោរពច្បាប់នៃព្រះរាជាណាចក្រកម្ពុជា ព្រមទាំងផ្ទៀងផ្ទាត់ទៅលើភាសាខ្មែរ និងត្រូវទំនាក់ទំនងជាមួយសមត្ថកិច្ចស្ថាប័នជំនាញ ដើម្បីលើកស្លាកសំគាត់ ឬក៏តុបតែងស្លាកយីហោរបស់ខ្លួន ឲ្យមានអក្សរខ្មែរ ជាសម្គាល់ថាជាប្រទេសកម្ពុជា»។
កាលពីថ្ងៃទី១០ ខែមករា ឆ្នាំ២០១៨ រដ្ឋលេខាធិការក្រសួងរៀបចំដែនដី លោកបណ្ឌិត ប៉ែន សុផល និងក្រុមការងារស្ថាប័នពាក់ព័ន្ធ នៃរដ្ឋបាលខេត្តព្រះសីហនុ បានចុះពិនិត្យការដ្ឋានសំណង់មួយចំនួន ដែលកំពុងសាងសង់នាមូលដ្ឋាននេះ ដែលមានស្លាកយីហោ ឬផ្ទាំងប៉ាណូជាអក្សរចិន។ លោក ប៉ែន សុផល ក៏បានណែនាំ ដល់តំណាងភាគីអ្នកវិនិយោគចិន ស្ដីអំពីការប្រើប្រាស់អក្សរខ្មែរ និងអក្សរបរទេស ឬអក្សរចិន នៅលើផ្ទាំងគំនូរសំណង់ ឬផ្លាកសញ្ញាផ្សព្វផ្សាយនៅតាមតំបន់ឆ្នេរ ឲ្យបានត្រឹមត្រូវស្របតាមការណែនាំរបស់ក្រសួង។
លោកបណ្ឌិត ប៉ែន សុផល ដែលជាអគ្គលេខាធិការ នៃគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជាផងនោះ ក៏បានចុះផ្សព្វផ្សាយសារមួយចំនួនរួមមាន ការប្រើប្រាស់អក្សរខ្មែរ និងអក្សរបរទេសនៅលើផ្ទាំងគំនូរសំណង់ ឬស្លាកសញ្ញាផ្សព្វផ្សាយនៅតាមតំបន់ឆ្នេរ និងសេចក្ដីណែនាំបន្ថែមស្ដីពីការរៀបចំអាងប្រព្រឹត្តកម្មទឹកកខ្វក់ អាងបង្គន់អនាម័យ និងប្រព័ន្ធបណ្ដាញលូ ។ មន្ត្រីជំនាញទាំងនោះ ក៏បានណែនាំឲ្យក្រុមហ៊ុនមួយចំនួន ត្រូវចូលរួមអនុវត្តតាមច្បាប់អនុញ្ញាតសាងសង់ និងសុវត្ថិភាពក្នុងការដ្ឋាន និងបទដ្ឋានគតិយុត្តិ ដែលនៅជាធរមានឲ្យបានត្រឹមត្រូវ។
មន្ត្រីឃ្លាំមើលផែនការអភិវឌ្ឍសង្គម ភ្ញៀវទេសចរជាតិ និងប្រជាពលរដ្ឋភាគច្រើន រស់នៅខេត្តព្រះសីហនុ បានគាំទ្រ សកម្មភាពចុះអប់រំ និងណែនាំដល់ជនបរទេស ស្ដីអំពីការប្រើប្រាស់អក្សរខ្មែរ និងអក្សរបរទេស នៅលើស្លាកសញ្ញាសំគាល់ នៅតាមទីតាំងនីមួយៗ ឲ្យស្របតាមច្បាប់ នៃព្រះរាជាណាចក្រកម្ពុជា។
ទោះជាមានការណែនាំពីមន្ត្រីជំនាញក៏ដោយ សាធារណជនអះអាងថា គិតមកដល់ថ្ងៃទី១៣ ខែមករា ស្លាកសញ្ញា ឬស្លាកយីយោផ្សេងៗនៅតាមទីតាំងមួយចំនួន ដែលមានថៅកែជាជនបរទេស ពិសេសថៅកែជនជាតិចិន នៅមិនទាន់គោរពតាមការណែនាំ របស់មន្ត្រីជំនាញ ឲ្យបានត្រឹមត្រូវនៅឡើយទេ៕
