លោកនាយករដ្ឋមន្ត្រី ហ៊ុន សែន រំពឹងថា សេដ្ឋកិច្ចប្រទេសកម្ពុជា នឹងអភិវឌ្ឍន៍ទៅមុខដោយភាពល្អប្រសើរ និងរឹងមាំជាងមុន សម្រាប់ឆ្នាំ២០១៨ ព្រោះជាឆ្នាំបោះឆ្នោត ទាំងនៅព្រឹទ្ធសភា និងរដ្ឋសភា។ ប៉ុន្តែអ្នកវិភាគវាយតម្លៃថា សេដ្ឋកិច្ចអាចរឹងមាំតែតួលេខ និងឈ្មួញបរទេសធំៗប៉ុណ្ណោះ ខណៈអ្នកប្រកបរបរតូចតាចបានរងផលប៉ះពាល់បណ្ដើរៗហើយ។
បើទោះជាលោកនាយករដ្ឋមន្ត្រី ហ៊ុន សែន មានសមត្ថភាពកម្ទេចគណបក្សប្រឆាំងជាដៃគូប្រកួតប្រជែងដ៏ខ្លាំងដើម្បីឲ្យប្រាកដថា លោកនឹងអាចបន្ដកាន់អំណាច ១០ទៀត ក៏លោក ហ៊ុន សែន នៅតែបន្ដយកចិត្តពលរដ្ឋតាមរយៈការសន្យាទៀតថា នឹងអភិវឌ្ឍសេដ្ឋកិច្ចប្រទេសឲ្យបានល្អនៅក្នុងឆ្នាំបោះឆ្នោត៖ «ត្រូវតែជាឆ្នាំដែលមានការអភិវឌ្ឍល្អ ព្រោះជាឆ្នាំនៃនីតិកាលទី៥ ចុងក្រោយដើម្បីឈានឆ្ពោះទៅនីតិកាលទី៦»។
ការប្រកាសរបស់លោកនាយករដ្ឋមន្ត្រី ធ្វើឡើងនៅព្រឹកថ្ងៃទី១៥ មករា ក្នុងពិធីសម្ពោធដាក់ឲ្យប្រើប្រាស់អគារព្យាបាលជំងឺមហារីក និងសម្ភពនៅក្នុងបរិវេណមន្ទីរពេទ្យកាល់ម៉ែត រាជធានីភ្នំពេញ។
ក្រៅពីការរំពឹងសេដ្ឋកិច្ចកម្ពុជា ថាអាចនឹងរឹងមាំជាងឆ្នាំដែលគ្មានការបោះឆ្នោត លោកនាយករដ្ឋមន្ត្រី ហ៊ុន សែន ហាក់បង្ហាញពីមោទនភាពនៅក្រោយពេលដែលមន្ត្រីក្រោមឱវាទរបស់លោកបានជូនពរឲ្យលោកកាន់កាប់អំណាចជានាយករដ្ឋមន្ត្រីជារៀងរហូត។ លោកក៏បានឆ្លៀតបង្រៀនអ្នកវិភាគ និងអ្នករិះគន់លោកឲ្យរៀនមើលច្បាប់រដ្ឋធម្មនុញ្ញនៅទូទាំងពិភពលោក ដែលចែងពីអាណត្តិនាយករដ្ឋមន្ត្រីដើម្បីជៀសវាង ត្រូវលោកហៅថា ជាមនុស្សល្ងង់។
នៅមុនការបោះឆ្នោតព្រឹទ្ធសភាអាណត្តិទី៤ បួនខែ គណបក្សប្រឆាំងនៅកម្ពុជា ត្រូវបានរំលាយ។ លោកនាយករដ្ឋមន្ត្រី ហ៊ុន សែន មិនខ្វល់ពីការគំរាមដាក់ទណ្ឌកម្មសេដ្ឋកិច្ចពីសំណាក់សហគមន៍អន្តរជាតិនេះទេ ព្រោះលោកអះអាងថា កម្ពុជាបច្ចុប្បន្ន មិនដូចកម្ពុជា កាលពីប្រមាណ ៣០ឆ្នាំមុននោះឡើយ។ លោក ហ៊ុន សែន ថ្លែងកាលពីថ្ងៃទី២២ ខែវិច្ឆិកា ថា កាលពីមុនកម្ពុជា រងការដាក់ទណ្ឌកម្មសេដ្ឋកិច្ចជុំទិស អាចរស់បាន ចុះឥឡូវនេះ ហេតុអីរស់មិនបាន? លោកថែមទាំងទម្លាក់ការទទួលខុសត្រូវលើប្រទេសដែលជាអ្នកទទួលទិញ ឲ្យទទួលខុសត្រូវលើអ្នកវិនិយោគថែមទៀត បើសិនជាបិទការអនុគ្រោះពន្ធមែននោះ។
កំណើនសេដ្ឋកិច្ចកម្ពុជា ពឹងអាស្រ័យយ៉ាងខ្លាំងទៅលើការនាំចេញផលិតផលវិស័យកាត់ដេរ ដែលទីផ្សារធំបំផុតរបស់កម្ពុជា គឺសហគមន៍អឺរ៉ុប និងសហរដ្ឋអាមេរិក។ ជាង ៦០% នៃការនាំចេញផលិតផលវិស័យវាយនភណ្ឌរបស់កម្ពុជា ទៅពិភពលោក គឺនាំចេញទៅទីផ្សារអឺរ៉ុប និងសហរដ្ឋអាមេរិក។ ការរីកលូតលាស់វិស័យកាត់ដេរ និងរោងចក្រនៅកម្ពុជា ក៏ដោយសារតែការអនុគ្រោះពន្ធពីសហគមន៍អឺរ៉ុប និងសហរដ្ឋអាមេរិកនេះដែរ។ ប៉ុន្តែ ដោយសារតែរដ្ឋាភិបាល លោក ហ៊ុន សែន ធ្វើទុក្ខបុកម្នេញលើគណបក្សប្រឆាំង អង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យនៅកម្ពុជា យ៉ាងសន្ធាប់ និងបំពានរដ្ឋធម្មនុញ្ញកម្ពុជា ខ្លួនឯងផងនោះ ទើបប្រទេសទាំងនោះព្រមានកាត់ផ្ដាច់ការអនុគ្រោះពន្ធ។
អ្នកវិភាគនយោបាយ លោកបណ្ឌិត ឡៅ ម៉ុងហៃ យល់ថា នៅឆ្នាំ២០១៨ សេដ្ឋកិច្ចកម្ពុជា អាចនឹងបន្ដភាពរឹងមាំផ្នែកខ្លះ ប៉ុន្ដែគុណភាពមិនរឹងមាំនោះទេ។ លោកបញ្ជាក់ថា អ្នកប្រកបរបរតូចតាច ឬវិស័យទេសចរណ៍ នឹងមិនអាចទទួលបានចំណូលរឹងមាំនោះទេ ហើយប្រសិនបើសហរដ្ឋអាមេរិក និងសហភាពអ៊ឺរ៉ុប ពិតជាបិទការអនុគ្រោះពន្ធនាំចូលសម្លៀកបំពាក់ វិស័យឧស្សាហកម្មនឹងប៉ះពាល់សេដ្ឋកិច្ចមុនគេ បន្ទាប់មកគឺពលរដ្ឋទូទៅ។
ទោះយ៉ាងណាលោកបណ្ឌិត ឡៅ ម៉ុងហៃ មិនចង់ឃើញទិដ្ឋភាពបែបនេះទេ៖ «តួលេខធំៗដែលអ្នកវិនិយោគទុនដាក់ចូលមើលទៅប្រហែលអាចមានការប្រែប្រួលតិចតួចបំផុត ដូចជាអចលនទ្រព្យអីជាដើម»។
ធនាគារពិភពលោកធ្លាប់ចេញរបាយការណ៍ព្យាករសេដ្ឋកិច្ចកម្ពុជាថា ស្ថានភាពនយោបាយមិនល្អនឹងមិនធ្វើឲ្យកម្ពុជា ទទួលបានកំណើតសេដ្ឋកិច្ច ៧% ក្នុងមួយឆ្នាំ ដូចដែលរដ្ឋាភិបាលរំពឹងទុកនោះទេ ហើយវិស័យវាយនភណ្ឌកាត់ដេរ គឺជាប្រភពចំណូលដ៏សំខាន់ក្នុងការជួយលើកស្ទួយសេដ្ឋកិច្ចជាតិ៕