អតីតមេដឹកនាំគណបក្សសង្គ្រោះជាតិ មានគម្រោងអំពាវនាវអោយឲ្យពលរដ្ឋងើបឈរតវ៉ាដោយសន្តិវិធីទាមទារឲ្យមានការបោះឆ្នោតដ៏ត្រឹមត្រូវមួយ ដែលមានគណបក្សសង្គ្រោះជាតិចូលរួមប្រកួតប្រជែង។ លោក សម រង្ស៊ី អះអាងថាមានតែចលនាសង្គ្រោះជាតិដែលលោកទើបបង្កើតនេះទេ ទើបអាចតស៊ូទៅមុខប្រឆាំងនឹងរបបដឹកនាំរបស់លោក ហ៊ុន សែន បាន។ ប៉ុន្តែ មន្ត្រីគណបក្សសង្គ្រោះជាតិនៅក្រៅប្រទេសមួយចំនួនប្រកាសមិនចូលរួមជាមួយចលនានេះ។
ថ្លែងចំពោះមុខអ្នកគាំទ្រគណបក្សសង្គ្រោះជាតិ នៅសហរដ្ឋអាមេរិក កាលពីថ្ងៃទី១៣ ខែមករា លោក សម រង្ស៊ី ស្ថាបនិកចលនាសង្គ្រោះជាតិ បញ្ជាក់យ៉ាងច្បាស់ថា ចលនាសង្គ្រោះជាតិ ជាចលនាដែលមានកម្លាំងទូលំទូលាយ ដើម្បីទាមទារឲ្យមានការបោះឆ្នោតដោយសេរីត្រឹមត្រូវ និងយុត្តិធម៌ នៅកម្ពុជា។ ជាងនេះទៅទៀត លោកថា ចលនានេះ គឺជាការទាមទារឲ្យគណបក្សសង្គ្រោះជាតិអាចចូលរួមបោះឆ្នោតបាន។
ចលនាសង្គ្រោះជាតិដែលមានស្ថាបនិកចំនួន ៩រូប ក្នុងនោះមាន លោក សម រង្ស៊ី អនុប្រធានគណបក្សពីររូប និងមន្ត្រីជាន់ខ្ពស់គណបក្សង្គ្រោះជាតិមួយចំនួន។ លោក សម រង្ស៊ី បញ្ជាក់ថា ចលនាថ្មីនេះមិនបានទៅចុះឈ្មោះនៅក្រសួងមហាផ្ទៃ ដូច្នេះក៏មិនព្រួយបារម្ភថា អ្នកណាអាចរំលាយបានទេ។ លោកថា គណបក្សនយោបាយមិនអាចអំពាវនាវឲ្យងើបរើបម្រាស់បានទេ ប៉ុន្តែ ចលនាថ្មី អាចអំពាវនាវឲ្យប្រជាពលរដ្ឋងើបឈរ និងការអំពាវនាវឲ្យកងកម្លាំងប្រដាប់អាវុធឈរនៅខាងប្រជារាស្ត្រ។ «»
ទន្ទឹមនឹងការអំពាវឲ្យប្រជាពលរដ្ឋជាពិសេសអ្នកគាំទ្របក្សប្រឆាំងគាំទ្រនិងចូលរួមជាមួយ"ចលនាសង្គ្រោះជាតិ” ដែលទើបបង្កើតឡើងថ្មី។ លោក សម រង្ស៊ី និយាយថា ចលនានេះ នឹងប្រមូលកម្លាំងអ្នកគាំទ្របានច្រើនជាងមុន ដូចជា សហគមន៍អន្តរជាតិ សង្គមស៊ីវិល និងអ្នកសារព័ត៌មានជាដើម។
ទន្ទឹមនឹងការបង្កើតចលនាសង្គ្រោះជាតិនេះដែរ មន្ត្រីគណបក្សសង្គ្រោះជាតិមួយចំនួនបង្ហាញការយល់ឃើញផ្សេងគ្នាចំពោះចលនានេះ។ អ្នកខ្លះប្រកាសគាំទ្រចលនាសង្គ្រោះជាតិ អ្នកផ្សេងទៀតប្រកាសមិនចូលរួមជាមួយចលនានោះទេ។ គណបក្សសង្គ្រោះជាតិប្រចាំនៅតាមរដ្ឋនានានៅសហរដ្ឋអាមេរិកចំនួន៥០នាក់ក្នុងនោះក៏មានអតីតតំណាងរាស្ត្រចំនួន ៣រូបប្រកាសមិនចូលរួមចលនាសង្គ្រោះជាតិ។ ពួកគេប្រកាសថា នៅតែតស៊ូនយោបាយក្នុងក្របខ័ណ្ឌគណបក្សសង្គ្រោះជាតិដដែល។
តំណាងរាស្ត្រគណបក្សសង្គ្រោះជាតិ លោក យ៉ែម ប៉ុញ្ញឫទ្ធិ និយាយនៅប្រទេសបារាំង ថ្ងៃទី១៣ ខែមករាថា ចលនាសង្គ្រោះជាតិនឹងត្រូវប្រឈមផ្លូវច្បាប់នៅក្នុងប្រទេសកម្ពុជា ព្រោះមិនបានចុះបញ្ជីនៅក្រសួងមហាផ្ទៃ និងបញ្ហាទំនាក់ទំនងការទូតនៅក្រៅប្រទេស។ តំណាងរាស្ត្ររូបនេះ ទាមទារឲ្យចលនារបស់លោក សម រង្ស៊ី យកពាក្យសង្គ្រោះជាតិចេញពីចលនានេះ។ «»
ទន្ទឹមនឹងការខ្វែងគំនិតគ្នារបស់មន្ត្រីគណបក្សសង្គ្រោះជាតិ និងការរៀបចំចលនាសង្គ្រោះជាតិនេះ។ អ្នកនាំពាក្យបក្សកាន់អំណាច លោក សុខ ឥសាន និយាយថា ការបង្កើតអង្គការណាមួយក្រៅច្បាប់ វាគឺជាសកម្មភាពបែបឧទ្ទាម។ «»
ការប្រកាសបង្កើតចលនាសង្គ្រោះជាតិរបស់លោក សម រង្ស៊ី នៅពេលនេះ ក្រោយពេលអ្នកនាំពាក្យគណបក្សប្រជាជនកម្ពុជា ចោទប្រកាន់ថា គណបក្សសង្គ្រោះជាតិនៅក្រៅប្រទេសថា ជាក្រុមឧទ្ទាមនិយមក្រៅប្រទេស។ លោក សុខ ឥសាន ឌឺដងថា ទោះសេះដុះស្នែងក៏បក្សប្រឆាំងមិនអាចចូលរួមប្រកួតប្រជែងការបោះឆ្នោតជាតិនៅពេលខាងមុខបាននោះដែរ។
ចំណែក លោក សម រង្ស៊ី អះអាងថា ចលនាសង្គ្រោះជាតិនៅតែគាំទ្រលោក កឹម សុខា ធ្វើជាប្រធានគណបក្សសង្គ្រោះជាតិដដែល។ លោកថាចលនានេះនៅពេលនេះទាមទារ ឲ្យគណបក្សសង្គ្រោះជាតិអាចចូលរួមក្នុងការបោះឆ្នោត និងឈ្នះឆ្នោត គឺចលនាសង្គ្រោះជាតិត្រូវ រលាយខ្លួនទៅក្នុងគណបក្សសង្គ្រោះជាតិ៕