សាលាដំបូងរាជធានីភ្នំពេញ នៅថ្ងៃព្រហស្បតិ៍ ទី១១ ខែមករា នេះ ចោទប្រកាន់ប៉ូលិសសក្ដិ៤ម្នាក់ចំនួន ២បទល្មើស ករណីប្រើហិង្សាលើនគរបាលចរាចរណ៍ម្នាក់ កាលពីថ្ងៃទី៩ ខែមករា។ មន្ត្រីសង្គមស៊ីវិលលើកឡើងថា ការដាក់ទោស ទណ្ឌធ្ងន់ធ្ងរនេះ គឺជារឿងល្អ ដើម្បីកុំឲ្យមន្ត្រីផ្សេងទៀតយកគំរូតាម។
ព្រះរាជអាជ្ញារងអមសាលាដំបូងរាជធានីភ្នំពេញ លោក សៀង សុខ សម្រេចចោទប្រកាន់ប៉ូលិសស័ក្ដិ៤ ចំនួនពីរបទល្មើស គឺហិង្សាដោយចេតនាមានស្ថានទម្ងន់ទោស និងប្រើប្រាស់ដោយគ្មានសិទ្ធិនូវសញ្ញាសម្គាល់ ដែលកំណត់ដោយអាជ្ញាធរសាធារណៈតាមមាត្រា ២១៨ និងមាត្រា ៦១៤ នៃក្រមព្រហ្មទណ្ឌ។ នេះបើតាមការអះអាងរបស់អ្នកនាំពាក្យសាលាដំបូងរាជធានីភ្នំពេញ លោក លី សុផាណា តាមរយៈបណ្ដាញទំនាក់ទំនងតេឡេក្រាម។
ការចោទប្រកាន់នេះ បន្ទាប់ពីប៉ូលិសសក្ដិ៤ ឈ្មោះ សៅ បញ្ញា អាយុ ៣៣ឆ្នាំរូបនេះ បានប្រើអំពើហិង្សាលើមន្ត្រីនគរបាលចរាចរណ៍ជាប់កិច្ចសន្យាម្នាក់ ឈ្មោះ អឿន ចំណាន នៅចំណុចផ្លូវលេខ៥៩៨ កែងផ្លូវលេខ៣១៥ សង្កាត់ភ្នំពេញថ្មី ខណ្ឌសែនសុខ កាលពីថ្ងៃទី៩ ខែមករា ឆ្នាំ២០១៨។
លោក លី សុផាណា ឲ្យដឹងថា ក្រោយបញ្ចប់ការសួរនាំ និងចោទប្រកាន់ តំណាងអយ្យការបានបញ្ជូនទៅចៅក្រមស៊ើបសួរដើម្បីចាត់ការបន្ត។ សារព័ត៌មានក្នុងស្រុកចុះផ្សាយថា តាមពិតជនជាប់ចោទរូបនេះ មានឋានន្តរសក្ដិអនុសេនីយ៍ឯកស័ក្ដិ៣ ប៉ុន្តែជននេះបានទិញស័ក្ដិក្លែងក្លាយ១ទៀតដើម្បីឡើងស័ក្ដិ៤។
មន្ត្រីនគរបាលផ្នែកនាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃ លោក សៅ បញ្ញា អាយុ ៣៣ឆ្នាំ ត្រូវបានសមត្ថកិច្ចឃាត់ខ្លួនកាលពីល្ងាចថ្ងៃ៩ មករា បន្ទាប់ពីមានវីដេអូឃ្លិបចែកចាយតាមបណ្ដាញសង្គម ដោយបង្ហាញឃើញប៉ូលិសរូបនេះបានប្រើអំពើហិង្សាទៅលើមន្ត្រីនគរបាលចរាចរណ៍ម្នាក់ដែលបានចាប់ឃាត់រថយន្តរបស់គាត់។ នៅក្នុងវីដេអូនោះ គឺលោក សៅ បញ្ញា បានចុះពីលើរថយន្តដែលប៉ូលិសចរាចរណ៍ឃាត់ ហើយបាននិយាយជាមួយមន្ត្រីនោះ។ ក្រោយមកក៏ទាត់ធាក់មន្ត្រីនោះចំដើមទ្រូងមួយជើងផ្ងារទៅក្រោយ បើទោះបីប៉ូលិសចរាចរណ៍បានលត់ជង្គង់ និងលើកដៃគោរពបង្ហាញការសុំទោសក្តី។
អាស៊ីសេរី មិនអាចសុំការឆ្លើយតបពីប្រធាននគរបាលចរាចរណ៍រាជធានីភ្នំពេញ លោក ចេវ ហាក់ បានទេ នៅថ្ងៃទី១១ ខែមករា ដោយសារប្រព័ន្ធទូរស័ព្ទមានបញ្ហាស្តាប់មិនបាន។
នគរបាលចរាចរណ៍ដែលរងអំពើហិង្សា អឿន ចំណាន បានរៀបរាប់ក្នុងឃ្លិបវីដេអូដែលគេថតបង្ហោះកាលពីថ្ងៃទី១០ ខែមករា ថា នៅថ្ងៃទី៩ ខែមករា ប៉ូលិសសក្ដិ៤នោះ បានជិះរថយន្តមកឈប់ហើយចាប់ក្របួចកអាវអូសលោកពីដងផ្លូវមកខាង និងបានវាយទាត់ធាក់រូបលោក ដោយសារខឹងលោកឃាត់រថយន្តកាលពីថ្ងៃទី៨ ខែមករា។ ប៉ុន្តែពេលនោះលោកពុំបានផាកពិន័យអ្វីឡើយ គ្រាន់តែប្រាប់ឲ្យគោរពច្បាប់ចរាចរណ៍តែប៉ុណ្ណោះ៖ «»។
កាលពីថ្ងៃទី៩ ខែមករា នាយឧត្ដមសេនីយ៍ ជួន សុវណ្ណ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាក់ថា អគ្គស្នងការនគរបាលជាតិ លោក នេត សាវឿន បានចេញបញ្ជាម៉ឺងម៉ាត់ឲ្យចាត់វិធានការតាមផ្លូវច្បាប់ចំពោះមន្ត្រីនគរបាលដែលប្រើអំពើហិង្សារូបនេះ ដោយគ្មានការលើកលែងជាដាច់ខាត។
នាយកវិទ្យាស្ថានសុវត្ថិភាពចរាចរណ៍ លោក អ៊ា ចរិយា មានប្រសាសន៍ថា ការចាត់វិធានការដាក់ទោសចំពោះមន្ត្រីថ្នាក់លើដែលប្រើហិង្សាលើមន្ត្រីថ្នាក់ក្រោមនេះ គឺជារឿងត្រឹមត្រូវតាមផ្នែកច្បាប់ និងជាគំរូល្អមួយដើម្បីបង្ហាញដល់មន្ត្រីថ្នាក់លើមួយចំនួនទៀត ដែលប្រើប្រាស់អំណាចមិនត្រឹមត្រូវ៖ «»។
លោក អ៊ា ចរិយា យល់ថា រដ្ឋាភិបាលត្រូវឲ្យតម្លៃ និងផ្ដល់សិទ្ធិអំណាចដល់មន្ត្រីថ្នាក់ក្រោមរបស់ខ្លួនដើម្បីឲ្យពួកគេអាចអនុវត្តច្បាប់បានដោយស្មើភាព និងគ្មានសម្ពាធ។ លោកថា បើសិនជាមន្ត្រីថ្នាក់ក្រោមអនុវត្តច្បាប់ដោយត្រឹមត្រូវ ប៉ុន្តែរងពិន័យទៅវិញនោះ វានឹងនាំឲ្យការអនុវត្តច្បាប់គ្មានប្រសិទ្ធភាព។
មាត្រា ២១៨ នៃក្រមព្រហ្មទណ្ឌ ចែងថា ហិង្សាដោយចេតនាមានស្ថានទម្ងន់ទោសត្រូវផ្ដន្ទាទោសដាក់ពន្ធនាគារពី ២ឆ្នាំ ទៅ ៥ឆ្នាំ ពិន័យជាប្រាក់ពី ៤លាន ទៅ ១០លានរៀល។ ចំណែកមាត្រា ៦១៤ នៃក្រមព្រហ្មទណ្ឌចែងថា បទប្រើប្រាស់ដោយគ្មានសិទ្ធិនូវសញ្ញាសម្គាល់ដែលកំណត់ដោយអាជ្ញាធរសាធារណៈត្រូវផ្ដន្ទាទោសដាក់ពន្ធនាគារពី ១ខែ ទៅ ១ឆ្នាំ ពិន័យជាប្រាក់ពី ១០ម៉ឺន ទៅ ២លានរៀល៕