អធិការនគរបាលស្រុកស្ទោង ខេត្តកំពង់ធំ បញ្ជាក់ថា ករណីចាប់ខ្លួនអតីតជំទប់ទី១ ឃុំចំណារក្រោម មកពីគណបក្សសង្គ្រោះជាតិ គឺជាករណីបទល្មើសព្រហ្មទណ្ឌ ពុំទាក់ទងនឹងរឿងនយោបាយនោះឡើយ។ ការអះអាងនេះ គឺក្រោយពេលសមត្ថកិច្ចស្រុកស្ទោង ចាប់ខ្លួនអតីតមន្ត្រីគណបក្សប្រឆាំងនៅឃុំចំណារ ម្នាក់ កាលពីថ្ងៃទី១០ ខែមករា។
សមត្ថកិច្ចស្រុកស្ទោង ខេត្តកំពង់ធំ អះអាងថា ករណីចាប់ខ្លួនលោក ខេង ថា ដែលជាអតីតជំទប់ទី១ គណបក្សសង្គ្រោះជាតិ ឃុំចំណារក្រោម គឺពាក់ព័ន្ធករណីលួចម៉ូតូគេពីស្រុកជីក្រែង ខេត្តសៀមរាប។ ជនសង្ស័យត្រូវបានចាប់បញ្ជូនទៅឱ្យសមត្ថកិច្ចស្រុកជីក្រែង ដើម្បីកសាងសំណុំរឿងចាត់ការទៅតាមផ្លូវច្បាប់។
អធិការនគរបាលស្រុកស្ទោង លោក យុង សំ មានប្រសាសន៍នៅថ្ងៃទី១១ ខែមករា ថា ការចាប់ខ្លួនលោក ខេង ថា គឺធ្វើឡើងកាលពីថ្ងៃទី១០ មករា។ លោកថា ការចាប់ខ្លួនបុគ្គលនោះ ដោយមានការស្នើសុំសហការពីអធិការនគរបាលស្រុកជីក្រែង ដើម្បីតាមចាប់ខ្លួនអតីតមន្ត្រីគណបក្សប្រឆាំងរូបនោះ ពាក់ព័ន្ធសំណុំរឿងលួចម៉ូតូពីស្រុកជីក្រែង ហើយរត់គេចខ្លួនមកស្រុកស្ទោង។
រឿងក្រៅពីនេះ លោកមិនអាចបញ្ជាក់បានទេ គឺទាល់តែសាកសួរទៅអធិការស្រុកជីក្រែង ផ្ទាល់តែម្ដង។ ប៉ុន្តែលោកអះអាងថា ករណីនេះជាបទល្មើសព្រហ្មទណ្ឌ គឺមិនពាក់ព័ន្ធរឿងនយោបាយនោះឡើយ៖ «បាទ! មិនមែនជារឿងនយោបាយអីទេ គឺគាត់បានប្រព្រឹត្តបទល្មើសព្រហ្មទណ្ឌ»។
លោក ខេង ថា បានទទួលតំណែងជាជំទប់ទី១ ឃុំចំណារក្រោម កូតាមកពីគណបក្សសង្គ្រោះជាតិ ក្រោយការបោះឆ្នោតក្រុមប្រឹក្សាឃុំ-សង្កាត់ កាលពីថ្ងៃទី៤ ខែមិថុនា ឆ្នាំ២០១៧។ ក្រោយពេលគណបក្សសង្គ្រោះជាតិ ត្រូវបានរំលាយតាមអំណាចសាលក្រមរបស់តុលាការកំពូល កាលពីថ្ងៃទី១៦ វិច្ឆិកា ឆ្នាំ២០១៧ លោក ខេង ថា បានសម្រេចចូលរួមជីវិតនយោបាយជាមួយគណបក្សប្រជាជនកម្ពុជា ហើយទទួលបានតំណែងជាទំជប់ទី១ ឃុំចំណារក្រោម ដដែល។
អាស៊ីសេរី បានព្យាយាមទាក់ទងក្រុមគ្រួសារលោក ខេង ថា ជាច្រើនលើកច្រើនសា ប៉ុន្តែគ្មានអ្នកទទួលទូរស័ព្ទឡើយ នៅថ្ងៃទី១១ ខែមករា។
សមាជិកក្រុមប្រឹក្សាស្រុកស្ទោង មកពីគណបក្សសង្គ្រោះជាតិ ថ្លែងសុំមិនបញ្ចេញឈ្មោះលើកឡើងថា រឿងនេះខាងលោកមិនអាចសន្និដ្ឋានបានទេ ដោយសារលោក ខេង ថា បានលាលែងពីគណបក្សសង្គ្រោះជាតិ រួចទៅហើយ។ យ៉ាងនេះក្តីលោកស្នើសុំឱ្យសមត្ថកិច្ចស្រាវជ្រាវករណីនេះឱ្យបានច្បាស់លាស់ ដើម្បីធានាភាពថ្លៃថ្នូរ និងផ្ដល់យុត្តិធម៌ដល់លោក ខេង ថា៖ «បើសិនជាបុគ្គលហ្នុងធ្វើខុស ត្រូវតែមានការស៊ើបអង្កេតឱ្យបានច្បាស់លាស់ និងផ្ដន្ទាទោសទៅតាមអ្វីដែលជាកំហុសជាក់ស្តែង។ ជៀសវាងការមួលបង្កាច់បង្ខូចអ្វីមួយដែលធ្វើឱ្យបុគ្គលហ្នឹងមានការឈឺចាប់ មានការបាត់បង់នូវគុណតម្លៃរបស់ខ្លួន»។
លោកមើលឃើញថា ក្នុងមួយរយៈពេលចុងក្រោយនេះ សកម្មភាពអូសទាញ និងគំរាមកំហែងមន្ត្រីគណបក្សសង្គ្រោះជាតិ ពីសំណាក់អាជ្ញាធរ និងមន្ត្រីគណបក្សកាន់អំណាចដើម្បីឱ្យចុះចូលជាមួយគណបក្សប្រជាជនកម្ពុជា គឺស្ងប់ស្ងាត់ទៅវិញហើយ។ ប្រភពដដែលអះអាងថា ក្នុងចំណោមសមាជិកក្រុមប្រឹក្សាឃុំនៅស្រុកស្ទោង ចំនួន ៥៤នាក់ គឺមាន ១២នាក់ដែលបានចុះចូលជាមួយគណបក្សកាន់អំណាច។
ការបោះឆ្នោតក្រុមប្រឹក្សាឃុំ-សង្កាត់ កាលពីថ្ងៃទី៤ ខែមិថុនា ឆ្នាំ២០១៧ លទ្ធផលផ្លូវការសម្រាប់នៅខេត្តកំពង់ធំ ក្នុងចំណោមឃុំ-សង្កាត់ ចំនួន៨១ គឺគណបក្សសង្គ្រោះជាតិ ឈ្នះដឹកនាំឃុំ-សង្កាត់ បានចំនួន ៤១ ហើយគណបក្សប្រជាជនកម្ពុជា ឈ្នះបានចំនួន ៤០ ឃុំ-សង្កាត់។
ក្នុងចំណោមមន្ត្រីសមាជិកក្រុមប្រឹក្សាខេត្ត ស្រុក និងឃុំ-សង្កាត់ ទូទាំងខេត្តកំពង់ធំ របស់គណបក្សសង្គ្រោះជាតិជាង ៣០០នាក់ គឺមានប្រមាណ ៧០នាក់ ដែលបានចុះចូលជាមួយគណបក្សប្រជាជនកម្ពុជា។ ក្រៅពីនោះ ពួកគាត់រក្សាភាពស្ងប់ស្ងាត់នៅតាមមូលដ្ឋានរៀងៗខ្លួន ដោយអ្នកខ្លះធ្វើស្រែចម្ការ ខ្លះនេសាទ និងប្រកបមុខរបរផ្សេងៗទៀត៕