ពលរដ្ឋបុរីកីឡាដែលមិនទាន់ទទួលបានដំណោះស្រាយចំនួន ១១គ្រួសារ នឹងជួបជុំគ្នា នៅមុខសាលារាជធានីភ្នំពេញ នៅព្រឹកថ្ងៃពុធទី ១០នេះ ដើម្បីតាមដានញត្តិទាមទារសំណងរបស់ពួកគេដែលបានដាក់ទៅសាលាក្រុងនាពេលកន្លងមក។ ក្រុមពលរដ្ឋទាមទារ សំណងពីរម៉ឺន ប្រាំពាន់ដុល្លារ (២៥.០០០) ជាថ្នូរនឹងការចាកចេញពីផ្ទះសម្បែង នៅតំបន់បុរីកីឡា។
តំណាងពលរដ្ឋនៅបុរីកីឡា លោកស្រី ង៉ូវ ណារី អះអាងថា ពលរដ្ឋ ទាំង១១គ្រួសារ គឺមានឯកសារគ្រប់គ្រាន់ក្នុងការទទួលយកសំណង តែអាជ្ញាធរបែរជាមិនអើពើក្នុងការដោះស្រាយបញ្ចប់ទៅវិញ។ លោកស្រី រិះគន់អាជ្ញាធរថាមិនមានឆន្ទៈក្នុងការដោះស្រាយបញ្ហាជូនពួកគាត់ តែបែរជាប្រើការគំរាមកំហែងមកលើពួកគាត់ទៅវិញ៖ «គាត់ទុករ៉ាំរ៉ៃ ដូចជំងឺមហារីកអញ្ចឹង សល់តែប៉ុន្មានគ្រួសារគាត់មិនដោះបញ្ចប់ទេ គាត់ទុកអ៊ីចឹង។ គាត់ទុកដូចថា បើនិយាយឱ្យចំទៅ គាត់ទុកស៊ីតែម្ដងហ្នឹង គាត់ទុកស៊ីដូចថា បើអ្នកណានៅយូរទ្រាំអត់បាន អ៊ីចឹងគ្នាខ្វះខាត ក៏ទៅយកតាមតម្រូវការគាត់អោយទៅភូមិអណ្ដូង យកតិចតួចហ្នឹង គាត់ដោះស្រាយអ៊ីចឹង។ គាត់អត់មានស្រង់បញ្ជីពិតប្រាកដហើយ ដោះស្រាយមួយសារឱ្យចប់ ដូចក្រសួងដែនដីដោះនៅអាគារប៊ូឌីងទេ គាត់អត់មានជំហរដោះស្រាយហ្មង»។
លោកស្រីក៏អះអាងថា កន្លងមកអាជ្ញាធរធ្លាប់ព្រមានក្រុមពលរដ្ឋថា នឹងប្រើប្រព័ន្ធរដ្ឋបាល និងប្រព័ន្ធតុលាការ មកចាត់ការលើពលរដ្ឋទាំង ១១គ្រួសារ បើនៅតែមិនព្រមទទួលយកការដោះស្រាយ។ ចំណែកក្រុមពលរដ្ឋក៏បានបញ្ជាក់ជំហរថា នៅក្រាញននៀលទាមទាររកដំណោះស្រាយ និងគ្រោងស្វែងរកអន្តរាគមន៍ពីលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណងទៀងផង។
ជាង ៦ឆ្នាំហើយ ដែលអាជ្ញាធរបានបណ្ដេញពលរដ្ឋបុរីកីឡាចេញពីផ្ទះសម្បែង ដើម្បីប្រគល់ដីតំបន់នោះទៅឱ្យក្រុមហ៊ុន ផានអ៊ីម៉ិច ធ្វើការអភិវឌ្ឍ។ ពលរដ្ឋដែលត្រូវបានបណ្ដេញចេញមួយចំនួន បានសម្រេចចិត្តទទួលយកសំណង បន្ទាប់ពីអស់លទ្ធភាពក្នុងការតវ៉ា៕