ក្រសួងមហាផ្ទៃ និងក្រសួងការងារ ប្រកាសដាក់ឲ្យប្រើប្រាស់ទីស្នាក់ការផ្ដល់លិខិតធ្វើដំណើរ និងប័ណ្ណពលករកម្ពុជាធ្វើការនៅបរទេសចំនួន ៣កន្លែងផ្សេងគ្នា ជាផ្លូវការចាប់ពីថ្ងៃទី៨ ខែមករា ឆ្នាំ២០១៨ ដើម្បីសម្រួល និងពន្លឿនការផ្ដល់សេវាជូនពលករកម្ពុជា ដែលទៅធ្វើការនៅប្រទេសថៃ។
មន្ត្រីសង្គមស៊ីវិល សម្ដែងការសាទរចំពោះវិធានការនេះ និងស្នើឲ្យធ្វើការប្រកបដោយមានតម្លាភាព និងយុត្តិធម៌ ជៀសវាងអំពើពុករលួយ។
ទីស្នាក់ការផ្ដល់លិខិតធ្វើដំណើរ និងប័ណ្ណពលករកម្ពុជាធ្វើការនៅបរទេសទាំង ៣កន្លែង ដែលអាជ្ញាធរទើបដាក់ឲ្យប្រើប្រាស់នេះ គឺមាននៅរាជធានីភ្នំពេញស្ថិតក្នុងផ្សារស្ទឹងមានជ័យថ្មី (ជាន់ទី២) នៅខេត្តបាត់ដំបង និងនៅខេត្តបន្ទាយមានជ័យ។
អគ្គនាយក នៃអគ្គនាយកដ្ឋានការងារ នៃក្រសួងការងារ និងបណ្ដុះបណ្ដាលវិជ្ជាជីវៈ នៅផ្សារស្ទឹងមានជ័យថ្មី លោក សេង សក្តា ថ្លែងប្រាប់ អ្នកសារព័ត៌មានថា គោលបំណងនៃការបង្កើតទីស្នាក់ការផ្ដល់លិខិតធ្វើដំណើរ និងប័ណ្ណពលករកម្ពុជា ធ្វើការនៅបរទេសនេះ គឺដើម្បីបង្កលក្ខណៈងាយស្រួលដល់ពលករ ដែលចង់បំពេញបែបបទឯកសារ ទៅធ្វើការនៅប្រទេសថៃ ហើយក៏ជាកន្លែងមួយច្បាស់លាស់ ក្នុងការបំពេញបែបបទនីតិវិធី សម្រាប់ឲ្យបានឯកសារស្របច្បាប់ទៅធ្វើការនៅបរទេស។ លោកបន្តថា ប័ណ្ណទាំងនេះមានសុពលភាព ៥ឆ្នាំ និងគ្មានការពន្យារពេលនោះទេ។
រីឯអគ្គនាយកនៃអគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ ម៉ៅ ច័ន្ទតារា ក៏បានបញ្ជាក់ប្រាប់អ្នកសារព័ត៌មានដែរថា ការបង្កើតទីស្នាក់ការផ្ដល់លិខិតធ្វើដំណើរ និងប័ណ្ណពលករកម្ពុជាធ្វើការ នៅបរទេសចំនួន ៣កន្លែងនេះ គឺជាការរួមចំណែកមួយយ៉ាងសំខាន់ក្នុងការទប់ស្កាត់បញ្ហាពលករចាញ់បោកមេខ្យល់ ចំណាកស្រុកខុសច្បាប់ ការចំណាយថវិកាច្រើន ខ្ជះខ្ជាយពេលវេលា និងទប់ស្កាត់ការចេញទៅធ្វើការនៅក្រៅប្រទេស គ្មានឯកសារស្របច្បាប់។
មន្ត្រីកម្មវិធី នៃមជ្ឈមណ្ឌលសម្ព័ន្ធការងារ និងសិទ្ធិមនុស្ស លោក ឌី ថេហូ សាទរចំពោះការបង្កើតទីស្នាក់ការផ្ដល់សេវាបែបបទឯកសារជូនពលករនេះ ទោះបីជាយឺតពេលបន្តិចក្តី។ លោករំពឹងថា ការធ្វើការងារជូនពលរដ្ឋនេះ សូមធ្វើដោយភាពស្មោះត្រង់ និងកុំសម្លឹងឃើញតែផលប្រយោជន៍នយោបាយដោយសារតែជិតបោះឆ្នោត។ លោកស្នើសុំឲ្យមន្ត្រីដែលបំពេញការងារ កំណត់តម្លៃឲ្យបានច្បាស់លាស់ ព្រោះកន្លងមកមានករណីយកតម្លៃខ្ពស់ហួសហេតុ និងស្នើសុំឲ្យមានលេខរៀងត្រឹមត្រូវ ជៀសវាងភាពរញ៉េរញ៉ៃ។ «»
យ៉ាងណាក៏ដោយចុះ មន្ត្រីក្រសួងការងារប៉ាន់ប្រមាណថា ទីស្នាក់ការទាំង ៣កន្លែងនេះ គឺមន្ត្រីអាចធ្វើលិខិតធ្វើដំណើរ និងប័ណ្ណពលករកម្ពុជាធ្វើការនៅបរទេសជូនពលករបានប្រមាណ ៣ពាន់នាក់ ក្នុងមួយខែ។ ដើម្បីធ្វើលិខិតធ្វើដំណើរ និងប័ណ្ណពលករនេះ ប្រជាពលរដ្ឋកម្ពុជា ត្រូវបំពេញតាមលក្ខខណ្ឌ គតិយុត្តិមួយចំនួន ដូចជាត្រូវមានកិច្ចសន្យាការងារពីនិយោជកថៃ តាមរយៈទីភ្នាក់ងារ ដែលបញ្ជូនពួកគេទៅធ្វើការងារនៅទីនោះ ត្រូវមានអត្តសញ្ញាណប័ណ្ណសញ្ជាតិខ្មែរ បើគ្មានអត្តសញ្ញាណប័ណ្ណសញ្ជាតិខ្មែរទេ ត្រូវមានសំបុត្របញ្ជាក់កំណើតច្បាប់ដើម ភ្ជាប់ជាមួយសៀវភៅគ្រួសារ ឬសៀវភៅ ស្នាក់នៅដែលច្បាស់លាស់ត្រឹមត្រូវ។
តំណាងក្រសួងមហាផ្ទៃ និងក្រសួងការងារ ក៏ស្នើដល់ទីភ្នាក់ងារជ្រើសរើសបណ្ដុះបណ្ដាល និងបញ្ជូនពលករទៅធ្វើការនៅក្រៅប្រទេសផងដែរ កុំឲ្យកំណត់ថ្លៃសេវាខ្ពស់ហួសពេក ព្រោះរដ្ឋាភិបាលបានរិះរក និងធ្វើគ្រប់វិធី ដើម្បីសម្រួល និងដោះស្រាយបញ្ហាជូនប្រជាពលរដ្ឋ កម្មករ ពលករជាដើម៕