សហរដ្ឋអាមេរិក បន្តផ្ដល់ជំនួយសម្រាប់ដោះមីននៅកម្ពុជា។ អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា ដែលហៅកាត់ថាស៊ីម៉ាក់ (CMAC) លោក ហេង រតនា អះអាងថា សហរដ្ឋអាមេរិក បានផ្ដល់ជំនួយជាង ៣២ម៉ឺនដុល្លារ ដល់មជ្ឈមណ្ឌលកម្ចាត់មីននៅកម្ពុជា សម្រាប់សកម្មភាពបោសសំអាតកាកសំណល់ជាតិផ្ទុះពីសង្គ្រាម នៅខេត្តភាគខាងកើតចំនួន ៥ របស់ប្រទេស។
ការផ្ដល់ជំនួយនេះ ធ្វើឡើងតាមរយៈអង្គការជំនួយប្រជាជនន័រវែស (Norway) នៅទីបញ្ជាការដ្ឋានស៊ីម៉ាក់ ក្នុងក្រុងភ្នំពេញ កាលពីថ្ងៃព្រហស្បតិ៍ ទី៤ ខែមករា។ ជំនួយទាំងនេះនឹងត្រូវអនុវត្តនៅខេត្តចំនួន៥ រួមមានខេត្តកំពង់ចាម ត្បូងឃ្មុំ ក្រចេះ ស្វាយរៀង និងខេត្តព្រៃវែង។
ប្រព័ន្ធឃោសនារបស់លោក ហ៊ុន សែន បានដកស្រង់សម្ដីលោក ហេង រតនា ចុះផ្សាយថា លោកបានចុះហត្ថលេខាលើកិច្ចសហប្រតិបត្តិការជាមួយប្រធានអង្គការជំនួយប្រជាជនន័រវែស (NPA) ប្រចាំតំបន់ ដើម្បីទទួលជំនួយថវិកាចំនួនជាង ៣២ម៉ឺនដុល្លារអាមេរិក ដែលផ្ដល់ដោយក្រសួងការបរទេសសហរដ្ឋអាមេរិក ដើម្បីគាំទ្រដល់សកម្មភាពបោសសំអាតកាកសំណល់ជាតិផ្ទុះពីសង្គ្រាម ដែលត្រូវប្រតិបត្តិការនៅខេត្តកំពង់ចាម ត្បូងឃ្មុំ ក្រចេះ ស្វាយរៀង និងព្រៃវែង។
លោកបន្តថា ក្នុងរយៈពេល ១២ខែ ឆ្នាំ២០១៧ កន្លងទៅនេះ គម្រោងជំនួយសហរដ្ឋអាមេរិក ត្រូវបានផ្ដល់ទៅស៊ីម៉ាក់ តាមរយៈអង្គការជំនួយប្រជាជនន័រវែស ដែលហៅកាត់ថា (NPA) ហើយអង្គការស៊ីម៉ាក់ ទទួលបានផ្ទាល់នោះ មានចំនួនជាង ២លាន ១សែនដុល្លារ ហើយបានដោះមីនចេញពីផ្ទៃដីចំនួន ៦៥គីឡូម៉ែត្រក្រឡា ហើយបានកម្ទេចចោលសំណល់ជាតិផ្ទុះពីសង្គ្រាមគ្រប់ប្រភេទមានចំនួនជាង ២ម៉ឺនគ្រាប់៕