Clik here to view.
ប្រជាពលរដ្ឋប្រមាណ ២០នាក់ តំណាងឲ្យ ៣៣គ្រួសារ ដែលរស់នៅអមផ្លូវរថភ្លើងនៅក្រុងប៉ោយប៉ែត ខេត្តបន្ទាយមានជ័យ នាំគ្នាដាក់ញាតិទៅសាលាក្រុងប៉ោយប៉ែត នៅព្រឹកថ្ងៃទី២៩ ខែធ្នូ ដើម្បីទាមទារឲ្យអភិបាលក្រុងឡើងកាន់តំណែងថ្មី ជួយដោះស្រាយសំណងប៉ះពាល់ពីគម្រោងអភិវឌ្ឍន៍ផ្លូវជូនពួកគាត់។ ការដាក់ញត្តិនេះ ធ្វើឡើងបន្ទាប់ពីពួកគាត់មានជំនឿថា អភិបាលក្រុងថ្មីអាចនឹងជួយដោះស្រាយជូនពួកគាត់បានប្រសើរជាងអភិបាលក្រុងចាស់។
នេះជាលើកទី១ហើយ ដែលពលរដ្ឋរស់នៅប៉ះពាល់ពីគម្រោងអភិវឌ្ឍន៍ផ្លូវរថភ្លើងនៅក្រុងប៉ោយប៉ែត ដាក់ញាតិទទូចឲ្យអភិបាលក្រុងថ្មីដោះស្រាយសំណងជូនពួកគាត់ បន្ទាប់ពីពួកគាត់តវ៉ាឲ្យអភិបាលក្រុងចាស់ជិត ១០០លើក តែគ្មានដំណោះស្រាយ។
តំណាងពលរដ្ឋរស់នៅអមផ្លូវរថភ្លើងនៅក្នុងប៉ោយប៉ែត លោក វន វ័ន ឲ្យដឹងនៅថ្ងៃទី២៩ ធ្នូ ថា មូលហេតុដែលពួកគាត់ដាក់ញត្តិទទូចឲ្យអាជ្ញាធរក្រុងដោះស្រាយជាថ្មីនេះ ដោយសារពួកគាត់ជាប្រជាពលរដ្ឋក្រីក្រ ហើយគ្មានប្រាប់សម្រាប់ទិញដីសង់ទីលំនៅនោះទេ។ លោកបន្ថែមថា ការដាក់ញត្តិនេះ អាជ្ញាធរក្រុងបានមកទទួលញត្តិពីពួកគាត់ហើយ ក៏ប៉ុន្តែពុំដឹងអាជ្ញាធរដោះស្រាយជូនពួកគាត់ ឬយ៉ាងណានៅឡើយទេ៖ «ចង់ឱ្យគាត់មានការដោះស្រាយជូនប្រជាពលរដ្ឋ ព្រោះអាជ្ញាធរក្រុងចាស់ហ្នឹងគាត់មិនបានដោះស្រាយជូនប្រជាពលរដ្ឋទេ។ គាត់ធ្វើមិនដឹង ធ្វើមិនឭ ហើយអ៊ីចឹងខ្ញុំដាក់ថ្មីម្តងទៀត។ ទាមទារឲ្យអាជ្ញាធរដោះស្រាយជូនដោយមានសំណងសមរម្យ ហើយឲ្យបានដីដូចដែលពួកខ្ញុំរងផលប៉ះពាល់ដែរ»។
ឆ្លើយតបនឹងបញ្ហានេះអភិបាលក្រុងប៉ោយប៉ែត លោក សាន ស៊ានហូ មានប្រសាសន៍ថា លោកទើបតែមកពីព្យាបាលជំងឺនៅប្រទេសថៃ គឺពុំទាន់ទទួលដំណឹងពីការដាក់ញត្តិរបស់ប្រជាពលរដ្ឋរស់នៅអមផ្លូវរថភ្លើងទាំងនោះទេ។ ក៏ប៉ុន្តែលោកសន្យាថា នឹងដោះស្រាយរឿងទំនាស់ដីធ្លីរបស់ពលរដ្ឋទាំងនោះឲ្យខាងតែបាន ហើយលោកសង្ឃឹមថា ប្រជាពលរដ្ឋនឹងទទួលយកបានតាមការដោះស្រាយរបស់អាជ្ញាធរក្រុង៖ «អ៊ីចឹងយើងទៅរកដីមួយកន្លែង យើងពុះដីធ្វើជាផ្លូវក្រាលក្រួសក្រហម មានដាក់តភ្លើងចូល រួចហើយយើងទៅ... ១២ម៉ែត្រ គុណនឹង ២០ម៉ែត្រ។ យើងមានបង្កើតសាលារៀន វត្តអារាម មានមណ្ឌលសុខភាព មានស្នាក់ការភូមិ។ យើងនឹងដោះស្រាយជូនប្រជាជនណាដែលគាត់រស់នៅក្នុងក្រុងប៉ោយប៉ែត គ្មានដីពិតប្រាកដ»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា លើកឡើងថា ការដាក់ញត្តិរបស់ប្រជាពលរដ្ឋនៅពេលនេះ អាចមានសង្ឃឹមច្រើនជាងមុន ខណៈដែលពួកគាត់តវ៉ាឲ្យអភិបាលក្រុងចាស់ គឺលោក ង៉ោ ម៉េងជ្រួន ដែលគ្មានដំណោះស្រាយជូនពួកគាត់នោះឡើយ។
លោកបន្ថែមថា អភិបាលក្រុងថ្មី ត្រូវពន្លឿនដោះស្រាយជូនពួកគាត់ឲ្យបានឆាប់ ពីព្រោះពួកគាត់ក្រីក្រ ហើយជួបបញ្ហាលំបាករកដីសង់ទីលំនៅថ្មីមិនបានជាច្រើនខែមកហើយ៖ «យើងអបអរសាទរ ដោយសារយើងសង្ឃឹមមុតមាំ ព្រោះអភិបាលក្រុងថ្មីនេះ រូបរាងខ្មៅមែន កាត់ខ្មែរមែន ប៉ុន្តែជើងហាក់ដូចជាមិនជាប់ដីទេ។ គាត់មិនចង់ឱ្យរឿងអាស្រូវ រួមទាំងបរិស្ថានផង រួមទាំងបញ្ហាផង គាត់មិនឱ្យកើតឡើងនៅប៉ោយប៉ែតទេ។ គាត់ខិតខំប្រឹងប្រែងដោះឱ្យទាល់តែចប់»។
ប្រជាពលរដ្ឋបាននាំគ្នាត្រឡប់ទៅផ្ទះវិញ នៅព្រឹកថ្ងៃទី២៩ ធ្នូ ដដែល បន្ទាប់ពីអាជ្ញាធរសាលាក្រុងទទួលញត្តិរបស់ពួកគាត់ ហើយពួកគាត់បញ្ជាក់ថា នឹងរង់ចាំមើលចំណាត់ការរបស់អាជ្ញាធរបន្តទៀត ហើយប្រសិនបើគ្មានដំណោះស្រាយទេ ពួកគាត់នឹងជួបជុំគ្នាជំរុញឲ្យអាជ្ញាធរដោះស្រាយបន្តទៀត៕
