ប្រជាពលរដ្ឋនិងមេឃុំចៅសង្កាត់របស់គណបក្សសង្គ្រោះជាតិ នៅខេត្តបាត់ដំបង បានរិះគន់មេឃុំចៅសង្កាត់គណបក្សប្រជាជនកម្ពុជា នៅក្នុងខេត្តនេះមួយចំនួនថា ចៅសង្កាត់ខ្លះបានយកប្រាក់ថ្លៃសេវាសាធារណៈ ពីពលរដ្ឋដោយខុសច្បាប់ជាប្រចាំ ចាប់តាំងពីឡើងកាន់តំណែងជំនួសឲ្យបក្សប្រឆាំង ដែលតុលាការកំពូលបានរំលាយចោលមក។ ប៉ុន្តែការចោទប្រកាន់នេះ ត្រូវបានចៅសង្កាត់ព្រែកព្រះស្ដេច ក្រុងបាត់ដំបងបដិសេធ។
ប្រជាពលរដ្ឋ និងមេឃុំចៅសង្កាត់គណបក្ស សង្គ្រោះជាតិ ខេត្តបាត់ដំបង ដែលទើបបញ្ចប់តំណែងថ្មីថ្មោងលើកឡើងថា មេឃុំចៅសង្កាត់គណបក្សកាន់អំណាចនៅក្នុងខេត្តនេះ ហាក់កំពុងត្រូវប៉ាន់នឹងតំណែងថ្មីរបស់ខ្លួន ដោយបានថវិកាក្រោមតុពីប្រជាពលរដ្ឋច្រើនជាងពេលមុន។
ពលរដ្ឋម្នាក់រស់នៅសង្កាត់ព្រែកព្រះស្ដេច ក្រុងបាត់ដំបង ថ្លែងមិនឲ្យបញ្ចេញឈ្មោះឲ្យដឹងនៅថ្ងៃទី២៨ ធ្នូថា កាលពីដើមខែធ្នូ សាច់ញាតិខ្លួនបានចំណាយប្រាក់ចំនួន ៦ម៉ឺនរៀល (៦០,០០០) ដោយជូនទៅចៅសង្កាត់ ៣ម៉ឺនរៀល និងស្មៀនសង្កាត់ ៣ម៉ឺនរៀល ដើម្បីបញ្ជាក់ឯកសារយកទៅខ្ចីប្រាក់ពីធនាគារ៖ «ខ្ញុំក៏បានប្រាប់ដែរថា មិចបានឲ្យប្រាក់ច្រើន គេថាក្រៅម៉ោងអីចឹងខ្លាចគេធ្វើមិនទាន់ ព្រោះអីគាត់ប្រញាប់យកឯកសារទៅខ្ចីលុយពីធនាគារ ហើយបើយើងទៅមិនទាន់ម៉ោង៣រសៀលទេទាល់តែស្អែកព្រឹកបានអាចធ្វើបាន»។
ចំណែកសង្កាត់ព្រែកព្រះស្ដេច គណបក្សសង្គ្រោះជាតិ ដែលទើបបញ្ចប់តំណែងដោយសារអំណាចតុលាការកំពូល លោក ខាន់ ប៊ុនផេង មានប្រសាសន៍ថា មិនមែនប្រជាពលរដ្ឋម្នាក់ប៉ុណ្ណោះទេ ដែលត្អូញត្អែររឿងចៅសង្កាត់ និងស្មៀនយកប្រាក់ក្រោមតុពីប្រជាពលរដ្ឋនោះ លោកអះអាងថា ប្រជាពលរដ្ឋជាច្រើនទៀតក៏ជួបបញ្ហានេះដូចគ្នា៖ «ការឲ្យប្រាក់ក្រោមតុនៅក្នុងសាលាសង្កាត់បើតាមខ្ញុំដឹងប្រជាពលរដ្ឋជូនមិនតិចជា១ម៉ឺនរៀលទេ ក្នុងមួយលើកនោះ។ ប៉ុន្តែកាលដែលខ្ញុំធ្វើជាចៅសង្កាត់ខ្ញុំមិនឲ្យមន្ត្រីណាយកប្រាក់ពីប្រជាពលរដ្ឋទេ តែមកឥឡូវនេះមន្ត្រីសង្កាត់យកប្រាក់ក្រោមតុពីប្រជាពលរដ្ឋវិញដដែល»។
ឆ្លើយតបនឹងបញ្ហានេះ ចៅសង្កាត់ព្រែកព្រះស្ដេចគណបក្ស ប្រជាជនកម្ពុជា លោក តោ ហុន អះអាងថា ចាប់តាំងលោកឡើងកាន់តំណែងជាចៅសង្កាត់ថ្មីមក គឺតែងតែអនុវត្តទៅតាមការណែនាំរបស់ក្រសួងមហាផ្ទៃ ហើយក៏ពុំមានការយកប្រាក់ក្រោមតុដូចការចោទប្រកាន់នោះឡើយ៖ «ហើយអ្នកណាមួយដែលចេញមុខថា ខ្ញុំយកលុយថាតើយកលុយនៅត្រង់ណា? កន្លងមកខ្ញុំយកលុយមែនខ្ញុំចំពោះសេវារបស់រដ្ឋ ចំពោះខ្ញុំឲ្យតែចុះហត្ថលេខារួចខ្ញុំប្រគល់ឯកសារទៅឲ្យស្មៀនហើយ កន្លងមកមានគេហុចណេះហុចណោះដែរ តែខ្ញុំមិនទទួលទេរឿងសេវាខុសច្បាប់អីចឹង»។
ករណីអាជ្ញាធរមូលដ្ឋានយកក្រៅសេវា នៅឃុំព្រែកហ្លួង ក៏មានបញ្ហានេះដែរ។ មេឃុំព្រែកហ្លួង ស្រុកឯកភ្នំ គណបក្សប្រឆាំងដែលទើបដកហូតតំណែងដោយអំណាចតុលាការកំពូល អ្នកស្រី នី រំដួល មានប្រសាសន៍ថា សព្វថ្ងៃប្រជាពលរដ្ឋដែលអ្នកស្រីធ្លាប់ដឹកនាំ គឺពួកគាត់តែងតែមកប្ដឹងអ្នកស្រីអំពីករណីមេឃុំឡើងកាន់តំណែងថ្មី ដែលពួកគាត់មិនបានបោះឆ្នោតឲ្យនោះ គឺមិនសូវរហ័សរហួនរឿងការងារជូនប្រជាពលរដ្ឋនោះទេ។ អ្នកស្រីបន្ថែមទៀតថា មេឃុំនិងស្មៀនឃុំសកម្មការងារ លុះណាពួកគាត់ផ្ដល់ប្រាក់ទឹកតែ ទើបពួកគាត់បំពេញឯកសារជូនបានឆាប់រហ័ស៖ «ខ្ញុំជួបពួកគាត់ដោយសារប្រជាពលរដ្ឋមករកខ្ញុំដល់ផ្ទះមកសួរនាំខ្ញុំ ហើយក្រោយពីសួរនាំគាត់បានត្អូញត្អែរ ការធ្វើសេវាជូនពួកគាត់យឺតយ៉ាវ និងមានការទទួលលុយពីពួកគាត់ គឺមិនដូចមេឃុំចាស់ទេដែលមិនយកប្រាក់ពីប្រជាពលរដ្ឋឡើយ»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង លោក យិន ម៉េងលី លើកឡើងថា មេឃុំចៅសង្កាត់យកប្រាក់បំពេញឯកសារពីប្រជាពលរដ្ឋខុសពីបទបញ្ជារបស់ក្រសួងមហាផ្ទៃ បើទោះបីជាផ្ដល់ឲ្យក្រោមតុ ឬលើតុក្ដី។ លោកហៅថា ជាអំពើខុសច្បាប់៖ «ចង់និយាយថា លុយដែលខុសពីការកំណត់របស់រដ្ឋាភិបាលគឺខុសច្បាប់ហើយ ព្រោះបានហាមមិនឲ្យយកប្រាក់ខុសពីច្បាប់កំណត់ទេ ហើយការយកប្រាក់ក្រោមតុនេះគឺជាអំពើពុករលួយ ដែលអង្គភាពប្រឆាំងអំពើពុករលួយត្រូវតែចាត់វិធានការណ៍ដោយមិនចាំបាច់មានគេដាក់ពាក្យប្ដឹងនោះទេ»។
កន្លងមកមេឃុំចៅសង្កាត់គណបក្សសង្គ្រោះជាតិ ខេត្តបាត់ដំបង នៅកន្លែងខ្លះដូចជាសង្កាត់ព្រែកព្រះស្ដេច សង្កាត់អូរចារ ក្រុងបាត់ដំបង និងឃុំព្រែហ្លួង ស្រុកឯកភ្នំជាដើម ពួកគាត់មិនបានយកថ្លៃបញ្ជាក់លិខិតស្នាមពីប្រជាពលរដ្ឋនោះទេ ដោយពួកគាត់ស្វែងរកថវិកាពីសប្បុរសជនពីខាងក្នុង និងក្រៅប្រទេស ដើម្បីផ្គត់ផ្គង់ការចំណាយផ្សេងៗ នៅក្នុងឃុំសង្កាត់រៀងៗខ្លួន។ ប៉ុន្តែក្រោយមក ពួកគាត់បានយកថ្លៃសេវាតាមការណែនាំរបស់ក្រសួងមហាផ្ទៃវិញ បន្ទាប់ពីមានលិខិតព្រមានពីអាជ្ញាធរខេត្តបាត់ដំបងថា ជាការធ្វើឲ្យបាត់បង់ប្រាក់ចំណូលរបស់រដ្ឋ៕