លោកនាយករដ្ឋមន្ត្រី ហ៊ុន សែន បានប្រាប់ទៅមន្ត្រីរបស់លោកម្ដងទៀត អោយយកចិត្តទុកដាក់ចំពោះករណីម្ចាស់ផ្ទះជួលដំឡើងថ្លៃជួលផ្ទះ និងដំឡើងថ្លៃទឹកភ្លើងនៅឆ្នាំ២០១៨។ លោកបញ្ជាមិនឱ្យមានករណីដំឡើងថ្លៃផ្ទះជួល និងដំឡើងទឹកភ្លើងជាដាច់ខាតនៅឆ្នាំ ២០១៨។ ការបញ្ជាក់ជាថ្មីទៀតនេះ ធ្វើឡើងក្នុងពិធីជួបជុំជាមួយកម្មករ កម្មការិនីជាង ១ម៉ឺននាក់នៅបណ្ដោយផ្លូវជាតិលេខ ៣ រាជធានីភ្នំពេញ នៅព្រឹកថ្ងៃទី២៧ ធ្នូ។
លោកនាយករដ្ឋមន្ត្រី ហ៊ុន សែន អំពាវនាវជាថ្មីម្ដងទៀត មិនឱ្យម្ចាស់ផ្ទះជួលទាំងអស់ដំឡើងថ្លៃជួលផ្ទះ និងថ្លៃទឹកភ្លើងជាដាច់ខាត។ មិនតែប៉ុណ្ណោះ លោកថែមទាំងបញ្ជាឱ្យមន្ត្រីរបស់ខ្លួនតាមដានករណីនេះជាប្រចាំ និងដោយយកចិត្តទុកដាក់ ដើម្បីធានាដល់ភាពងាយស្រួលដល់កម្មករ ស្របពេលប្រាក់ខែគោលរបស់ពួកគេនឹងត្រូវដំឡើងបន្ថែមទៀតចាប់ពីខែមករាឆ្នាំ ២០១៨ទៅ។ លោក ហ៊ុន សែន មានប្រសាសន៍ថា ថ្មីៗនេះ លោកបានប្រញាប់បញ្ជាឱ្យមន្ត្រីក្រោមឱវាទដោះស្រាយជាបន្ទាន់ ក្រោយពេលលោកទទួលបានព័ត៌មាននៃការដំឡើងថ្លៃផ្ទះជួលតាមបណ្ដាញទំនាក់ទំនងសង្គម។ «»
លោក ហ៊ុន សែន ក៏បានបញ្ជាឱ្យមន្ត្រីរបស់ខ្លួន បន្តការខិតខំប្រឹងប្រែងភ្ជាប់បណ្ដាញទឹកភ្លើង ទៅកាន់ផ្ទះជួលទាំងឡាយណា ដែលមិនទាន់មានប្រព័ន្ធទឹក ភ្លើង ត្រឹមត្រូវ ដើម្បីកាត់បន្ថយការចំណាយរបស់កម្មករកម្មការិនី។
ប្រធានសហជីពចលនាកម្មករកម្ពុជា មានប្រសាសន៍ថា ការអំពាវនាវរបស់លោកនាយករដ្ឋមន្ត្រី ហ៊ុន សែន គឺមានប្រសិទ្ធភាព ពីព្រោះមានម្ចាស់ផ្ទះជួលមួយចំនួនបានអនុវត្ត។ ប៉ុន្តែលោកថា ដើម្បីឱ្យមានប្រសិទ្ធភាពជាងនេះ អាជ្ញាធរត្រូវពង្រឹងការអនុវត្តច្បាប់កិច្ចសន្យាជួលផ្ទះឱ្យបានម៉ឹងមាត់។ «»
លោក ប៉ាវ ស៊ីណា ថ្លែងថា តាមច្បាប់ជួលផ្ទះ គឺនៅឆ្នាំ២០១៩ ម្ចាស់ផ្ទះជួលក៏មិនអាចដំឡើងថ្លៃបានដែរ ព្រោះច្បាប់នេះ តម្រូវឱ្យម្ចាស់ផ្ទះអាចដំឡើងថ្លៃបាននៅរាល់ពីរឆ្នាំម្ដង ពោលគឺរហូតដល់ឆ្នាំ ២០២០ ទើបពួកគេអាចដំឡើងថ្លៃជួលផ្ទះបាន៕
នៅថ្ងៃទី២៧ ធ្នូ ដដែល លោក ហ៊ុន សែន ក៏បានប្រកាសប្រាប់ក្រុមកម្មករ កម្មការិនីថា ប្រសិនបើចង់រក្សាការងារ និងប្រាក់ចំណូលដែលជា ឆ្នាំងបាយរាល់ថ្ងៃ ត្រូវរួមគ្នាទប់ស្កាត់ជនណាក៏ដោយ មិនថាខ្មែរ ឬបរទេសនោះទេ ដែលមានចេតនាចង់បំផ្លាញសន្តិភាពនៅកម្ពុជា។
ទោះបីលោកមិនបានបញ្ជាក់ឈ្មោះខ្មែរ ឬបរទេសដែលចង់បំផ្លាញសន្តិភាពក៏ដោយ ប៉ុន្តែកន្លងមករដ្ឋាភិបាលបានចោទគណបក្សសង្គ្រោះជាតិ និងសហរដ្ឋអាមេរិកថា រៀបចំគ្រោងធ្វើបដិវត្តន៍ពណ៌ ដោយប្រើប្រាស់កម្មករកាត់ដេរដើម្បីទម្លាក់រដ្ឋាភិបាលលោកចុះចេញពីដំណែង។
ក្នុងយុទ្ធនាការឃោសនាមុនរដូវបោះឆ្នោត លោក ហ៊ុន សែន បញ្ជាក់ថា ឱកាសការងារ និងប្រាក់ចំណូល ដែលជាឆ្នាំងបាយ និងជាអាយុជីវិតនៅរៀងរាល់ថ្ងៃនេះ មិនអាច ចាប់កំណើតក្នុងផ្ទៃនៃ សង្គ្រាមបាននោះទេ ពោលគឺចាប់កំណើត ក្នុងផ្ទៃនៃសន្តិភាពតែប៉ុណ្ណោះ ដូច្នេះហើយត្រូវរួមគ្នាថែរក្សាឲ្យខាងតែបាន ទោះក្នុងតម្លៃណាក៏ដោយ។
លោក ហ៊ុន សែន ក៏បានប្រៀបធៀបទៅនឹងយុវជន ជំនាន់មុន និងយុវជនជំនាន់ថ្មីនេះ ថាខុសគ្នាដាច់ស្រឡះ ដោយសារយុវជន ជំនាន់មុន គឺជាចំណាប់ខ្មាំងនៃសង្គ្រាម បាត់បង់ឱកាស បាត់បង់ជីវិត រហូតដល់អ្នកសេសសល់មួយចំនួនធ្លាក់ខ្លួនពិការ ប៉ុន្តែ យុវជន សម័យនេះ មានឱកាសច្រើនណាស់៕