មន្ត្រីគណបក្សសង្គ្រោះជាតិអះអាងថា អាហារដ្ឋាននៅទីរួមខេត្តបាត់ដំបង ដែលមានឈ្មោះ ថា អាហារដ្ឋាន រ៉ូហ្សេត គឺទទួលបានការចាប់អារម្មណ៍កាន់តែខ្លាំងពីពលរដ្ឋមកពីតំបន់ផ្សេងៗគ្នា ពោលគឺលក់ដាច់ចាប់តាំងពីបង្កើតឡើងដំបូងម្ល៉េះ។
សមាជិកព្រឹទ្ធសភា គណបក្សសម រង្ស៊ី លោក សោរ ចាន់ដេត មានប្រសាសន៍ថា ពលរដ្ឋ ឬភ្ញៀវដែលមកទទួលទានអាហារនៅអាហារដ្ឋាន រ៉ូហ្សេត គឺមកពីតំបន់ផ្សេងៗគ្នា មិនថាអ្នកស្រុកមន្ត្រីរាជការ ឬសកម្មជននោះទេ។ លោកថា ពលរដ្ឋដែលចូលបរិភោគ អាហារនៅទីនោះ តែងនិយាយលើកទឹកចិត្តពួកគាត់ និងឱ្យរក្សាគោលជំហរដដែល មិនចុះចូល ឬលក់ឧត្ដមគតិ ហើយពួកគាត់នឹងបន្តគាំទ្ររហូតទៀតផង។
អាហារដ្ឋាន រ៉ូហ្សេត បានបង្កើតឡើងក្រោយពេលចៅសង្កាត់អូរចារក្រុងបាត់ដំបងរូបនេះ និងមន្ត្រីគណបក្សប្រឆាំងនៅក្នុងខេត្តមួយនេះ ត្រូវបានរាជរដ្ឋាភិបាលបញ្ចប់តួនាទីរបស់ខ្លួន តាមរយៈសាលដីកាតុលាការកំពូល ដែលសម្រេចរំលាយគណបក្សសង្គ្រោះជាតិកាលពីថ្ងៃទី១៦ វិច្ឆិកា។
អាហារដ្ឋាននេះ ជាគំនិតផ្ដួចផ្ដើមនិងសហការគ្នារបស់មន្ត្រីគណបក្សប្រឆាំង ដែលមិនចុះចូលជាមួយគណបក្សប្រជាជនកម្ពុជា ក្នុងបំណងរកប្រាក់ចំណូលផ្គត់ផ្គង់គ្រួសារ ក្រោយពេលពួកគេបាត់បង់តួនាទី៕