ព្រះរាជអាជ្ញារងអមតុលាការក្រុងភ្នំពេញ លោក សៀង សុខ កោះហៅលោក កេតុ សុវណ្ណឌី និងលោក ដារ៉ា សុបញ្ញា ដែលជាមេធាវីរបស់សហភាព និងសហព័ន្ធសហជីពដែលស្និទ្ធនឹងរដ្ឋាភិបាលឱ្យចូលទៅបំភ្លឺនៅសាលាដំបូងរាជធានីភ្នំពេញ នៅថ្ងៃទី៩ ខែមករា ខាងមុខ ជុំវិញពាក្យបណ្ដឹងរបស់ពួកគេប្រឆាំងលោក ជា មុនី ដែលជាអតីតប្រធានសហជីពសេរីកម្មករ។
ក្រុមសហជីពគាំទ្ររដ្ឋាភិបាលជាង ១០០សហជីព ក្រោមការសម្របសម្រួលរបស់លោក ជួន មុំថុល ដែលជាប្រធានសហភាពសហព័ន្ធសហជីពជាតិកម្ពុជា បានរួមគ្នាដាក់ពាក្យបណ្ដឹងប្រឆាំងលោក ជា មុនី ដែលជាសមាជិកក្រុមប្រឹក្សាឃ្លាំមើលពហុវិស័យនៃកម្ពុជា ពីបទញុះញង់ ដោយពួកគេចោទលោក ជា មុនី បានអំពាវនាវឲ្យសហគមន៍អឺរ៉ុបដាក់ទណ្ឌកម្មលើរដ្ឋាភិបាលកម្ពុជា។
ពាក្យបណ្ដឹងចុះថ្ងៃទី១៨ ខែធ្នូ ទាមទារឲ្យតុលាការផ្ដន្ទាទោសលោក ជា មុនី និងបក្ខពួកតាមច្បាប់ និងទាមទារសំណងជំងឺចិត្តដល់កម្មករ និយោជិតចំនួន ១លានដុល្លារអាមេរិក។ បច្ចុប្បន្ន លោក ជា មុនី បានភៀសខ្លួនទៅដល់ទីមានសុវត្ថិភាពហើយ ដោយព្រួយបារម្ភពីការចាប់ខ្លួន៕