បណ្ដាញព្រះសង្ឃឯករាជ្យដើម្បីយុត្តិធម៌សង្គម ប្រចាំខេត្តបាត់ដំបង ច្រានចោលសេចក្ដីសម្រេចរបស់សាលាដំបូងខេត្ត ជុំវិញការផ្ដន្ទាទោសព្រះតេជព្រះគុណ ហន សុផាន្នី ឲ្យជាប់ពន្ធនាគាររយៈពេល ២ឆ្នាំ ក្រោមបទចោទញុះញង់ឲ្យប្រព្រឹត្តបទឧក្រិដ្ឋ។ ការបដិសេធនេះ ក្រោយពេលតុលាការបើកសវនាការ និងប្រកាសសាលក្រមផ្ដន្ទាទោសព្រះសង្ឃអង្គនេះ កាលពីរសៀលថ្ងៃទី១៩ ខែធ្នូ ឲ្យជាប់ពន្ធនាគាររយៈពេលពីរឆ្នាំ។
បណ្ដាញព្រះសង្ឃឯករាជ្យដើម្បីយុត្តិធម៌សង្គម ខេត្តបាត់ដំបង គ្រោងប្ដឹងជំទាស់ទៅនឹងសេចក្ដីសម្រេចរបស់សាលាដំបូងខេត្តនេះ ទៅសាលាឧទ្ធរណ៍បន្តទៀត តាមរយៈមេធាវី ជុំវិញការសម្រេចផ្ដន្ទាទោសអតីតព្រះសង្ឃ ហន សុផាន្នី ឲ្យជាប់ពន្ធនាគាររយៈពេលពីរឆ្នាំ។ ព្រះអង្គយល់ថា សេចក្ដីសម្រេចនេះអយុត្តិធម៌ ពីព្រោះតុលាការមិនបានបង្ហាញផលប៉ះពាល់អ្វីខ្លះដែលកើតចេញពីការញុះញង់ឲ្យប្រព្រឹត្តបទឧក្រិដ្ឋនោះឡើយ។
ប្រធានបណ្ដាញព្រះសង្ឃឯករាជ្យដើម្បីយុត្តិធម៌សង្គម ខេត្តបាត់ដំបង ព្រះតេជព្រះគុណ ឡុញ សុខជា មានថេរដីកាក្រោយពេលបញ្ចប់សវនាការថា បទចោទប្រកាន់អតីតព្រះសង្ឃ ហន សុផាន្នី ថាកាន់កាប់អាវុធខុសច្បាប់ត្រូវបានតុលាការទម្លាក់ចោល ប៉ុន្តែតុលាការបានសម្រេចចោទប្រកាន់ព្រះអង្គពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ ហើយផ្ដន្ទាទោសឱ្យជាប់ពន្ធនាគាររយៈពេល ២ឆ្នាំ។ ក្រោយមក តុលាការបានបញ្ជូនអតីតព្រះសង្ឃអង្គនេះទៅពន្ធនាគារខេត្តបាត់ដំបងវិញ ដោយទុកពេលឱ្យមេធាវី និងសាច់ញាតិប្ដឹងទាស់ទៅសាលាឧទ្ធរណ៍ក្នុងរយៈពេលមួយខែ៖ «យើងមានការមិនសុខចិត្តត្រង់ថា បើសិនចោទប្រកាន់ថាញុះញង់ប្រព្រឹត្តបទឧក្រិដ្ឋជាអាទិ៍ហ្នឹង តើញុះញង់នរណា? ញុះញង់ឱ្យធ្វើរឿងអី? ហើយប៉ះពាល់ មានភាពវឹកវរកើតឡើងហ្នឹងរឿងអីបានជាចោទប្រកាន់អ៊ីចឹង?»។
ប្រធានបណ្ដាញព្រះសង្ឃឯករាជ្យអង្គនេះអះអាងទៀតថា សាច់ញាតិរបស់អតីតព្រះតេជព្រះគុណ ហន សុផាន្នី មិនបានចូលរួមក្នុងការប្រកាសសាលក្រមនោះទេ ប៉ុន្តែមានពុទ្ធបរិស័ទប្រហែល ៥នាក់ និងព្រះសង្ឃដែលស្រលាញ់យុត្តិធម៌ដែលធ្វើការងារសង្គមប្រហែល ១៥អង្គ បានចូលរួម។
សមាជិកបណ្ដាញព្រះសង្ឃឯករាជ្យខេត្តបាត់ដំបង ព្រះនាម ហន សុផាន្នី គង់នៅវត្តដំរីស ក្រុងបាត់ដំបង ត្រូវបានសមត្ថកិច្ចឃាត់ព្រះកាយកាលពីថ្ងៃទី២១ ខែមិថុនា ហើយត្រូវបានមន្ត្រីតុលាការខេត្តមួយនេះបញ្ជូនទៅឃុំខ្លួននៅពន្ធនាគារខេត្តបាត់ដំបង កាលពីថ្ងៃទី២២ ខែមិថុនា ពីបទដឹកជញ្ជូន និងកាន់កាប់អាវុធដោយខុសច្បាប់ និងបទញុះញង់ឲ្យប្រព្រឹត្តបទឧក្រិដ្ឋ។
ប៉ុន្តែកន្លងមកស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះតេជព្រះគុណ ប៊ុត ប៊ុនតិញ មានថេរដីកាថា តុលាការចាប់ព្រះសង្ឃដោយពុំបានស៊ើបអង្កេតច្បាស់លាស់ ពីព្រោះកាំភ្លើងដែលព្រះអង្គ ហន សុផាន្នី បង្ហោះនៅលើបណ្ដាញហ្វេសប៊ុក (FaceBook) កាលពីខែមេសា ឆ្នាំ២០១៧ នោះ ជាកាំភ្លើងជ័រសម្រាប់ក្មេងលេង ពុំមែនជាអាវុធដែលបង្កគ្រោះថ្នាក់ដល់ជីវិតមនុស្សឡើយ។
មន្ត្រីសម្របសម្រួលអង្គការការពារសិទ្ធិមនុស្សលីកាដូ (Licadho) ខេត្តបាត់ដំបង លោក ហេង សាយហុង មានប្រសាសន៍ថា សកម្មភាពរបស់អតីតព្រះសង្ឃអង្គនេះកន្លងមកតែងចូលរួមជួយកិច្ចសង្គមជាច្រើន ដូចជាការថែរក្សាធនធានធម្មជាតិ ជាពិសេសព្រៃឈើ ការលើកកម្ពស់សិទ្ធិមនុស្ស និងយុត្តិធម៌សង្គមជាដើម។ លោកសង្កេតឃើញថា ការចោទប្រកាន់មកលើព្រះតេជព្រះគុណ ហន សុផាន្នី មិនត្រឹមត្រូវ និងមិនយុត្តិធម៌សម្រាប់ព្រះអង្គនោះឡើយ៖ «យើងមើលទៅសកម្មភាពរបស់ព្រះអង្គ ទាក់ទងការចោទប្រកាន់វាហាក់ដូចជាមិនបានចំណុចណាមួយទទួលយកបានថាត្រឹមត្រូវ និងយុត្តិធម៌ សម្រាប់ព្រះអង្គដែរ»។
មន្ត្រីសង្គមស៊ីវិលរូបនេះមើលឃើញថា ការចោទប្រកាន់ និងផ្ដន្ទាទោសអតីតព្រះសង្ឃ ហន សុផាន្នី ឱ្យជាប់ពន្ធនាគាររយៈពេល ២ឆ្នាំ គឺបណ្ដាលឲ្យព្រះសង្ឃ និងពលរដ្ឋផ្សេងទៀតខ្លាចរអាក្នុងការបញ្ចេញមតិយោបល់ និងចូលរួមធ្វើការងារសង្គម៕