មន្ត្រីជំនាញកម្ពុជា បានទៅសម្ភាសពលរដ្ឋខ្មែរដែលបានអនុវត្តទោសនៅសហរដ្ឋអាមេរិក បានជាង ១០០នាក់ហើយ។ ពលរដ្ឋខ្មែរជាង ៥០នាក់ ក្នុងចំណោមពលរដ្ឋជាង ១០០នាក់ នឹងត្រូវមន្ត្រីកម្ពុជា ទទួលយកមករស់នៅប្រទេសកម្ពុជា វិញ។
អ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់អាស៊ីសេរី ថា មន្ត្រីជំនាញកម្ពុជា បានសម្ភាសពលរដ្ឋទាំងនោះ ពីព្រោះចង់ដឹងថា ពួកគេពិតជាជនជាតិខ្មែរ។
ការប្រកាសទទួលយកពលរដ្ឋខ្មែរជាង ៥០នាក់មកកម្ពុជាវិញនេះ ក្រោយពេលលោក ហ៊ុន សែន ប្រកាសជាសាធារណៈកាលពីថ្ងៃទី៦ ខែធ្នូ ថា រដ្ឋាភិបាលរបស់លោកយល់ព្រមទទួលយកពលរដ្ឋដែលបានទៅរស់នៅសហរដ្ឋអាមេរិក កាលពីអំឡុងទសវត្សឆ្នាំ១៩៧៩ និងក្រោយឆ្នាំ១៩៩៤។ ក្រៅពីការប្រកាសទទួលយកពលរដ្ឋរបស់ខ្លួនដូចនេះ លោក ហ៊ុន សែន ក៏អំពាវឲ្យសហរដ្ឋមេអាមេរិកផ្តល់កញ្ចប់ថវិកាខ្លះដល់អ្នកទាំងនោះសម្រាប់ការសមាហរណកម្មប្រកបដោយលក្ខណៈវិជ្ជមានដើម្បីឲ្យអាចមករស់នៅសមរម្យនៅក្នុងស្រុកកំណើតរបស់ខ្លួនឡើងវិញ។ សហរដ្ឋអាមេរិក មិនទាន់ឆ្លើយតបសំណើរបស់លោក ហ៊ុន សែន នៅឡើយទេ។ សហរដ្ឋអាមេរិកបានផ្អាកទិដ្ឋាការមន្ត្រីក្រសួងការបរទេស និងក្រុមគ្រួសារមិនឲ្យមកជាន់ទឹកដីអាមេរិក ជាការឆ្លើយតបនឹងរដ្ឋាភិបាលកម្ពុជា ដែលកន្លងមកធ្លាប់ប្រកាសមិនទទួលយកពលរដ្ឋខ្មែរដែលអាមេរិក ចង់បញ្ជូនមកកម្ពុជាវិញ។ ការផ្អាកទិដ្ឋាការមន្ត្រីកម្ពុជា នៅមានសុពលភាពនៅឡើយទេ រហូតមកទល់ពេលនេះ។
មន្ត្រីជាន់ខ្ពស់នៃសមាគមការពារសិទ្ធិមនុស្សអាដហុក (ADHOC) លោក ស៊ឹង សែនករុណា យល់ថា ការប្រកាសជំហររបស់លោក ហ៊ុន សែន ទទួលយកពលរដ្ឋខ្មែរជាកាតព្វកិច្ចរបស់រដ្ឋាភិបាលក្នុងការទទួលខុសត្រូវលើពលរដ្ឋរបស់ខ្លួន។ លោក ស៊ឹង សែនករុណា យល់ថា រដ្ឋាភិបាលគួរមានការទទួលខុសត្រូវលើពលរដ្ឋរបស់ខ្លួនដោយផ្ដល់កន្លែងរស់នៅសមរម្យ និងមានថវិកាដើម្បីជួយពលរដ្ឋដែលត្រូវបញ្ជូនមកវិញនោះ៖ «»។
មកដល់ពេលនេះ មានពលរដ្ឋខ្មែរប្រមាណ ៥៦០នាក់ហើយ ដែលសហរដ្ឋអាមេរិក បញ្ជូនមកកម្ពុជា វិញ ចាប់តាំងពីកម្ពុជា មានកិច្ចព្រមព្រៀងបញ្ជូនពលរដ្ឋខ្មែរកាលពីឆ្នាំ២០០២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។