បណ្ដាញព្រះសង្ឃឯករាជ្យ ខេត្តបាត់ដំបង លើកឡើងថា ការបន្តឃុំខ្លួនអតីតសមាជិកបណ្ដាញព្រះសង្ឃឯករាជ្យ ជុំវិញសំណុំរឿងកាន់កាំភ្លើងជ័រនោះ គឺធ្វើឱ្យប៉ះពាល់ការសិក្សា និងការរស់នៅរបស់ជនជាប់ចោទ។ ការលើកឡើងនេះ ក្រោយពេលតុលាការកំពូលសម្រេចបដិសេធសំណើសុំនៅក្រៅឃុំរបស់អតីតព្រះសង្ឃ ព្រះនាម ហន សុផានី្ន កាលពីថ្ងៃទី៤ ធ្នូ។
បណ្ដាញព្រះសង្ឃឯករាជ្យ ខេត្តបាត់ដំបង យល់ថា ការបន្តឃុំខ្លួនអតីតព្រះសង្ឃ ហន សុផានី្ន គឺជារូបភាពគំរាមកំហែង មិនចង់ឱ្យព្រះសង្ឃផ្សេងទៀត ចូលរួមការងារសង្គម និងជាចេតនាផ្នែកនយោបាយច្រើនជាង។
ប្រធានបណ្ដាញព្រះសង្ឃឯករាជ្យ ខេត្តបាត់ដំបង ព្រះតេជព្រះគុណ ឡុញ សុខជា មានថេរដីកានៅថ្ងៃទី៥ ធ្នូ ថា ព្រះអង្គខកព្រះទ័យនៅពេលតុលាការសម្រេចបដិសេធបណ្ដឹងសុំនៅក្រៅឃុំ និងស្នើឱ្យតុលាការលើកលែងការចោទប្រកាន់ទាំងឡាយទៅអតីតសមាជិករបស់ខ្លួន។ ព្រះអង្គបន្តថា ការបន្តឃុំខ្លួនព្រះអង្គ ហន សុផានី្ន គឺបណ្ដាលឱ្យប៉ះពាល់ធ្ងន់ធ្ងរដល់ជនជាប់ចោទ ដូចជាមិនអាចបន្តការសិក្សា។ ព្រះអង្គបញ្ជាក់ថា មេធាវីរបស់អតីតព្រះសង្ឃអង្គនេះ បានអះអាងប្រាប់មន្ត្រីតុលាការទៀតថា នឹងសហការជាមួយតុលាការគ្រប់ពេល ធ្វើយ៉ាងណាអាចឱ្យកូនក្តីរបស់ខ្លួនបាននៅក្រៅឃុំបណ្តោះអាសន្ន ប៉ុន្តែមន្ត្រីតុលាការបានបដិសេធ។
ព្រះអង្គហៅការបន្តឃុំខ្លួននេះថា ជារឿងនយោបាយ និងអយុត្តិធម៌ ត្បិតការចោទប្រកាន់ព្រះអង្គកន្លងមកគឺមិនមានភស្តុតាងគ្រប់គ្រាន់ឡើយ៖ «បើសិនតុលាការឱ្យនៅក្រៅឃុំ លោកនឹងមានឱកាសបានបន្តការសិក្សា ហើយនឹងសហការធ្វើការជាមួយតុលាការដដែល ប៉ុន្តែតុលាការបានបដិសេធ ដោយលើកឡើងថា មានការលំបាក ខ្លាចមានការរត់គេចខ្លួនជាដើម»។
សមាជិកបណ្ដាញព្រះសង្ឃឯករាជ្យខេត្តបាត់ដំបង ព្រះនាម ហន សុផាន្នី គង់នៅវត្តដំរីស ក្រុងបាត់ដំបង ត្រូវបានសមត្ថកិច្ចឃាត់ព្រះកាយកាលពីថ្ងៃទី២១ មិថុនា និងត្រូវបានមន្ត្រីតុលាការខេត្តមួយនេះបញ្ជូនទៅឃុំខ្លួននៅពន្ធនាគារខេត្តបាត់ដំបង កាលពីថ្ងៃទី២២ មិថុនា ក្រោមបទចោទពីរករណី គឺពីបទដឹកជញ្ជូន និងកាន់កាប់អាវុធដោយខុសច្បាប់ និងញុះញង់ឲ្យប្រព្រឹត្តបទឧក្រិដ្ឋ។ ប៉ុន្តែកន្លងមកស្ថាបនិកបណ្ដាញព្រះសង្ឃឯករាជ្យ ដើម្បីយុត្តិធម៌សង្គមព្រះតេជព្រះគុណ ប៊ុត ប៊ុនតិញ មានថេរដីកាថា តុលាការចាប់ព្រះសង្ឃដោយពុំបានស៊ើបអង្កេតច្បាស់លាស់ ពីព្រោះកាំភ្លើងដែលព្រះអង្គ ហន សុផាន្នី បង្ហោះនៅលើបណ្ដាញហ្វេសប៊ុក (FaceBook) កាលពីខែមេសា ឆ្នាំ២០១៧នោះ ជាកាំភ្លើងជ័រសម្រាប់ក្មេងលែងពុំមែនជាអាវុធដែលបង្កគ្រោះថ្នាក់ដល់ជីវិតមនុស្សឡើយ។
មន្ត្រីជាន់ខ្ពស់ផ្នែកអង្កេតអង្គការការពារសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថា លោកសោកស្ដាយនៅពេលតុលាការកំពូលសម្រេចបដិសេធបណ្ដឹងនៅក្រៅឃុំបណ្ដោះអាសន្នរបស់អតីតព្រះសង្ឃ ហន សុផានី្ន។ លោកមើលឃើញថា ករណីព្រះអង្គលេងកាំភ្លើងជ័រនោះ គឺមិនបណ្ដាលឱ្យមានគ្រោះថ្នាក់ ឬបង្កជាបទល្មើសអ្វីនោះទេ ហើយគួរតែអនុញ្ញាតឱ្យព្រះអង្គបាននៅក្រៅឃុំបណ្ដោះអាសន្ន៖ «អ្នកដែលប្រើប្រាស់នូវអាវុធពិតក្នុងការគំរាមកំហែង ហើយអាជ្ញាធរមិនបានស្រាវជ្រាវរកឃើញទេ ហើយអ្នកដែលប្រើប្រាស់អាវុធជ័រត្រូវបានចាប់ខ្លួនផ្ដន្ទាទោស នាំឲ្យសាធារណជនគេមើលទៅហាក់បីដូចការអនុវត្តច្បាប់វាមិនស្មើភាពគ្នា ហើយការផ្ដល់យុត្តិធម៌ក៏វាមិនស្មើភាពគ្នាដែរ»។
កន្លងមកធ្លាប់មានការបង្ហោះអាវុធ និងគ្រាប់កាំភ្លើងពិតចំនួន ៧គ្រាប់នៅលើគេហទំព័រហ្វេសប៊ុក (Facebook) ឈ្មោះ ផែង វណ្ណៈ ដែលគេស្គាល់ថា ជាមន្ត្រីនគរបាលក្រសួងមហាផ្ទៃ ដែលបានគំរាមបាញ់សម្លាប់ប្រធានគណបក្សសង្គ្រោះជាតិ លោក កឹម សុខា ប៉ុន្តែសំណុំរឿងនេះ មិនបានឈានដល់ការចាប់ចង ឬចោទប្រកាន់ណាមួយនោះទេ។
លោក អំ សំអាត យល់ថា ការដោះលែងអតីតព្រះសង្ឃអង្គនេះ ឱ្យបាននៅក្រៅឃុំបណ្ដោះអាសន្ននឹងអាចឱ្យព្រះអង្គមានឱកាសវិលត្រឡប់ទៅបន្តការសិក្សា ម្យ៉ាងអាចឱ្យព្រះអង្គបានទៅចូលរួមកិច្ចការងារសង្គម ដូចជាលើកស្ទួយសិទ្ធិមនុស្ស ការពារធនធានធម្មជាតិ និងអាចសម្រាលបន្ទុករបស់រដ្ឋថែមទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។