មន្ត្រីសង្គមស៊ីវិលបារម្ភពីការកើនឡើងនៃការហូរចូលគ្រឿងញៀន ពីប្រទេសឡាវ មកកាន់ប្រទេសកម្ពុជាតាមច្រករបៀងឆ្លងកាត់ខែត្រស្ទឹងត្រែង។ ការព្រួយបារម្ភនេះ កើតឡើងជាថ្មីទៀត ក្រោយពីនគរបាលខែត្រស្ទឹងត្រែង ឃាត់ខ្លួនជនជាតិឡាវម្នាក់ រឹបអូសគ្រឿងញៀនបានជាង ២គីឡូក្រាម នៅជិតព្រំដែនកម្ពុជាឡាវ។
មន្ត្រីសង្គមស៊ីវិលនៅថ្ងៃទី២ ធ្នូ អំពាវនាវឲ្យរដ្ឋាភិបាលរកមធ្យោបាយ ពង្រឹងវិធានការទប់ស្កាត់ការចរាចរគ្រឿងញៀនឲ្យមានប្រសិទ្ធភាព និងពង្រឹងសមត្ថភាពដល់សមត្ថកិច្ចក្នុងការបង្ក្រាបបទល្មើសគ្រឿងញៀនឲ្យបានម៉ឺងម៉ាត់។ ពួកគេបារម្ភថា ទិសដៅនៃការហូរចូលគ្រឿងញៀនពីប្រទេសឡាវ តាមច្រកមួយចំនួននៃខែត្រស្ទឹងត្រែង បានក្លាយជាប្រធានបទក្ដៅ ដែលទាមទារឲ្យអាជ្ញាធរកំណត់តំបន់នោះ ជាតំបន់អត្ថិភាពក្នុងការពង្រឹងវិធានការបង្ក្រាបឲ្យមានប្រសិទ្ធភាព។
នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ថា ភាពចន្លោះប្រហោងការត្រួតពិនិត្យ ទំនិញពីក្រៅប្រទេសតាមច្រកអន្តរជាតិ និងច្រករបៀងរបស់មន្ត្រីជំនាញ បានក្លាយជាក្ដីបារម្ភខ្លាំង ខណៈទំនិញខូចគុណភាពច្រើនតោន ត្រូវបានសមត្ថកិច្ចបង្ក្រាបបានកាលពីពេលថ្មីៗនេះ ឋិតនៅខែត្រកំពង់ស្ពឺ។ ទំនិញទាំងនោះគេរកឃើញថា ជាទំនិញខូចគុណភាព នាំចូលពីប្រទេសវៀតណាម។ លោកថា ការហូរចូលគ្រឿងញៀនពីប្រទេសឡាវ នៅខែត្រស្ទឹងត្រែង ដែលជាតំបន់សំបូរព្រៃភ្នំ និងទន្លេ គឺជាភូមិសាស្ត្រដែលក្រុមឧក្រិដ្ឋជន មានឱកាសក្នុងការនាំចូលបានងាយស្រូល ហេតុនេះរដ្ឋាភិបាល និងស្ថាប័នជំនាញត្រូវពង្រឹងសមត្ថភាពបង្ក្រាបគ្រឿងញៀន និងកំណត់ជាតំបន់អត្ថិភាពបង្ក្រាបគ្រឿងញៀន៖ «ខ្ញុំមើលទៅយុទ្ធសាស្ត្ររបស់ពួកឈ្មួញជួញដូរគ្រឿងញៀន ខ្ញុំមើលទៅគេមានយុទ្ធសាស្ត្រខ្ពស់ជាងសមត្ថកិច្ច រួមផ្សំជាមួយភាពអសកម្ម និងសមត្ថភាពរបស់សមត្ថកិច្ចមានកម្រិត។ អាហ្នឹងជាមូលហេតុធ្វើឲ្យនាំចូលគ្រឿងញៀន ខុសច្បាប់ដោយលួចលាក់ក្នុងទម្រង់ណាមួយ។ ចំណុចអស់នេះ ខ្ញុំនៅតែមើលឃើញថា សមត្ថភាពរបស់សមត្ថកិច្ច តាមព្រំដែននៅតែមានបញ្ហា ហើយអាចពាក់ព័ន្ធរឿងទំនាស់ផលប្រយោជន៍ដែរ»។
កាលពីថ្ងៃទី១ ធ្នូ សមត្ថកិច្ចនៃស្នងការខែត្រស្ទឹងត្រែង ចាប់ខ្លួនជនជាតិឡាវម្នាក់ និងរឹបអូសគ្រឿងញៀនបាន ជាង ២គីឡូក្រាម។ ប្រតិបត្តិការបង្ក្រាបនោះ ឋិតនៅចំណុចកោះឫស្សី ឃុំសន្តិភាព ស្រុកសៀមប៉ាង ខែត្រស្ទឹងត្រែង ដែលជាតំបន់សំបូរដោយព្រៃ និងទន្លេ។
មន្ត្រីសម្របសម្រួលសមាគមអាដហុក (Adhoc) ខែត្រស្ទឹងត្រែង លោក ហូ សំអុល កត់សម្គាល់ថា ខែត្រស្ទឹងត្រែង គឺជាចំណុចអត្ថិភាពដែលក្រុមឧក្រិដ្ឋជនធ្វើចរាចរគ្រឿងញៀនឆ្លងកាត់ ដោយសារទំហំព្រំដែនប្រទេសទាំងពីរធំធេង ហើយប្រជាជនរស់នៅតាមព្រំដែនមួយចំនួនធំ ចេះប្រើប្រាស់ភាសាឡាវផង។ លោកថា កន្លងទៅនគរបាល នៃស្នងការខែត្រស្ទឹងត្រែង និងមន្ត្រីអាវុធហត្ថបានបើកប្រតិបត្តិការបង្ក្រាបការជួញដូរគ្រឿងញៀនច្រើនករណី ដែលមួយចំនួនធំជាជនជាតិឡាវជួញដូរគ្រឿងញៀនមកកាន់ប្រទេសកម្ពុជា៖ «យើងនៅតែមានការព្រួយបារម្ភ ព្រោះពាក់ព័ន្ធករណីគ្រឿងញៀនហ្នឹង យើងឃើញអ៊ីចឹង គឺនៅតែមានការចរាចរ។ ចង់និយាយថា យើងកោតសរសើរទាំងស្នងការ និងមន្ត្រីអាវុធហត្ថតែគួរបន្ថែមការយកចិត្តទុកដាក់ឲ្យខ្ពស់ទៀត»។
កាសែតក្នុងស្រុកផ្សាយថា រយៈពេល ១១ខែចុងក្រោយនេះ យុទ្ធនាការប្រឆាំងគ្រឿងញៀនលើកទី២ អាជ្ញាធរបង្ក្រាបករណីជួញដូរ និងប្រើប្រាស់គ្រឿងញៀនបាន ជាង៧ពាន់ ៥រយករណី (៧,៥២៣) ឃាត់ខ្លួនមនុស្សជាង ១ម៉ឺន ៦ពាន់នាក់ (១៦,៤៨៦នាក់)។
របាយការណ៍របស់អាជ្ញាធរប្រឆាំងគ្រឿងញៀន ឲ្យដឹងថា សមត្ថកិច្ចដកហូតសារធាតុញៀន បាន១៦៦គីឡូក្រាម និង ១.៣៤១កញ្ចប់ ដកហូតកញ្ឆាក្រៀមជាង ៨៩គីឡូក្រាម និងជាង ២៣ម៉ឺនដើម៕