ចៅក្រមស៊ើបសួរសាលាដំបូងរាជធានីភ្នំពេញ មិនទាន់សម្រេចចិត្តលើសំណើសុំរបស់មេធាវីឱ្យអតីតអ្នករាយការណ៍ព័ត៌មានអាស៊ីសេរី ពីររូបនៅក្រៅឃុំនៅឡើយទេ រហូតមកទល់នឹងថ្ងៃសុក្រ ទី១ ខែធ្នូ នេះ។
មេធាវីការពារក្ដីឱ្យអតីតបុគ្គលិកអាស៊ីសេរី គឺលោក កែវ វ៉ាន់នី បានឱ្យដឹងថា លោកបានសុំឱ្យតុលាការដោះលែងកូនក្ដីរបស់លោកនៅក្រៅឃុំជាបណ្ដោះអាសន្ន កាលពីថ្ងៃទី២៧ ខែវិច្ឆិកា ប៉ុន្តែនៅមិនទាន់ទទួលបានចម្លើយពីតុលាការនៅឡើយទេ បើទោះបីជាចៅក្រមស៊ើបអង្កេតសន្យានឹងផ្ដល់ចម្លើយនៅចុងសប្ដាហ៍នេះក៏ដោយ។
លោក កែវ វ៉ាន់នី អះអាងថា គ្មានហេតុផលចាំបាច់ណាមួយដែលចៅក្រមស៊ើបសួរត្រូវឃុំខ្លួនកូនក្ដីលោកទាល់តែសោះ ដោយហេតុថា កូនក្តីរបស់លោកទាំងពីរមានទីលំនៅច្បាស់លាស់។ លោកអះអាងថា កូនក្ដីរបស់លោកនៅក្រៅឃុំនឹងមិនបង្កបញ្ហាប៉ះពាល់ដល់សណ្ដាប់ធ្នាប់សាធារណៈឱ្យមានការច្របូកច្របល់ឡើយ។ លោកមេធាវីបញ្ជាក់ថា ជាគោលការណ៍ច្បាប់ជនត្រូវចោទត្រូវតែមានសេរីភាព។
លោកមេធាវី កែវ វ៉ាន់នី អះអាងថា កូនក្ដីរបស់លោកមិនបានប្រព្រឹត្តដូចការចោទប្រកាន់របស់តុលាការឡើយ។ លោមេធាវីបញ្ជាក់ថា អង្គហេតុនេះ គ្មានធាតុផ្សំបទល្មើសគ្រប់គ្រាន់ដើម្បីធ្វើការចោទប្រកាន់កូនក្តីលោកឡើយ៖ «តាំងពីដំណាក់កាលដំបូងមកដែលខ្ញុំបានចូលរួម គឺខ្ញុំនៅតែយល់ឃើញថា កូនក្ដីខ្ញុំអត់មានបានប្រព្រឹត្តបទល្មើសណាមួយដែលអាចចោទប្រកាន់គាត់បានទេ»។
លោមេធាវី កែវ វ៉ានើនី ឱ្យដឹងថា លោកបានទៅជួបកូនក្ដីទាំងពីររបស់លោកនៅពន្ធនាគារព្រៃស នៅថ្ងៃសុក្រនេះ។ លោកបានឱ្យដឹងបន្តថា កូនក្ដីទាំងពីររបស់លោកមានសុខភាពល្អធម្មតា មិនមានជំងឺតម្កាត់អ្វីឡើយ។ លោកបញ្ជាក់ថា កូនក្ដីទាំងពីររបស់លោកបានស្នើជួបរូបលោកក្នុងមួយសប្ដាហ៍១ដង ដើម្បីឱ្យមានភាពកក់ក្ដៅ។ លោកក៏បានឱ្យដឹងដែរថា កូនក្ដីទាំងពីររបស់លោកត្រូវមន្ត្រីពន្ធនាគារឃុំខ្លួននៅក្នុងអគារជាមួយគ្នា ប៉ុន្តែនៅបន្ទប់ផ្សេងគ្នា។
លោក អ៊ួន ឈិន និងលោក យាង សុធារិន ឬហៅក្រៅ យាង សុជាមេត្តា ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញ បានបង្គាប់ឱ្យសមត្ថកិច្ចនាំខ្លួនទៅឃុំបណ្ដោះអាសន្ននៅពន្ធនាគារព្រៃស កាលពីថ្ងៃទី១៨ ខែវិច្ឆិកា។ អ្នកទាំងពីរត្រូវបានតំណាងអយ្យការអមសាលាដំបូងរាជធានីភ្នំពេញ ចោទប្រកាន់ពីបទលួចផលិតព័ត៌មានបញ្ជូនមករដ្ឋធានីវ៉ាស៊ីនតុន តាមមាត្រា ៤៤៥ នៃក្រមព្រហ្មទណ្ឌ។ អ្នកទាំងពីរអាចប្រឈមមុខជាប់ពន្ធនាគារពី ៧ ទៅ ១៥ឆ្នាំ។
លោក អ៊ួន ឈិន និងលោក យាង សុធារិន បានបដិសេធការចោទប្រកាន់ ពីព្រោះលោកបានលាឈប់ពីការងារហើយចាប់តាំងពីខែកញ្ញា មក៕