មន្ត្រីជាន់ខ្ពស់គណបក្សសង្គ្រោះជាតិ ប្រកាសពីខាងក្រៅប្រទេស នៅថ្ងៃទី២៨ ខែវិច្ឆិកា ដោយប្រកាន់ជំហរថា គណបក្សខ្លួននៅតែរឹងមាំដដែល ហើយត្រៀមបន្តសកម្មភាពរបស់ខ្លួនទៅមុខទៀត បើទោះបីជាគណបក្សត្រូវបានអាជ្ញាធររបស់រដ្ឋាភិបាលលោកនាយករដ្ឋមន្ត្រី ហ៊ុន សែន រុះរើកម្ទេចស្លាកគណបក្សអស់ហើយក៏ដោយ។ ទន្ទឹមគ្នានេះ មន្ត្រីដឹកនាំគណបក្សប្រឆាំងរូបនេះអះអាងថា ថ្នាក់ដឹកនាំគណបក្សក៏កំពុងរកវិធីដើម្បីទាក់ទងជាមួយសកម្មជននៅខាងក្នុងប្រទេសឲ្យបានងាយស្រួល ដើម្បីពង្រឹងសាមគ្គីភាពឆ្ពោះទៅរកការបោះឆ្នោតដោយសេរី ត្រឹមត្រូវ និងយុត្តិធម៌នៅពេលខាងមុខ។
មន្ត្រីថ្នាក់គណបក្សសង្គ្រោះជាតិ ដែលកំពុងគេចខ្លួននៅក្រៅប្រទេស សម្ដែងការកោតសរសើរចំពោះសកម្មជនគណបក្សនៅខាងក្នុងប្រទេស ដែលមានឆន្ទៈស្មោះស្ម័គ្ររួមរស់ជាមួយគណបក្សដោយមិនចុះចូលតាមការអូសទាញរបស់អាជ្ញាធរគណបក្សកាន់អំណាចនោះ។
អនុប្រធានគណបក្សសង្គ្រោះជាតិ អ្នកស្រី មូរ សុខហួរ ដែលបានបង្ហោះវីដេអូឃ្លិបតាមហ្វេសប៊ុក (Facebook) របស់លោក សម រង្ស៊ី នៅថ្ងៃទី២៨ ខែវិច្ឆិកា ឲ្យដឹងថា លោក កឹម សុខា នៅតែជាប្រធានគណបក្សសង្គ្រោះជាតិ ដដែល ហើយគណបក្សប្រឆាំងដ៏ធំមួយនេះនៅតែបន្តសកម្មភាពនយោបាយដ៏ឥតងាករេដើម្បីឆ្ពោះទៅការផ្លាស់ប្ដូរជាវិជ្ជមានតាមរយៈការបោះឆ្នោតដោយសេរី ត្រឹមត្រូវ និងយុត្តិធម៌។
អ្នកស្រី មូរ សុខហួរ អះអាងទៀតថា នៅក្នុងស្ថានភាពដែលសកម្មជនកំពុងតែជួបការលំបាកក្នុងការទំនាក់ទំនងជាមួយថ្នាក់ដឹកនាំនៅខាងក្រៅប្រទេសកន្លងមកក្ដី ក៏ប៉ុន្តែក្នុងពេលឆាប់ៗខាងមុខនេះ ថ្នាក់ដឹកនាំគណបក្សនឹងរៀបចំឲ្យមានការទាក់ទងជាមួយសកម្មជនគណបក្សទាំងខាងក្នុង និងក្រៅប្រទេសឲ្យបានងាយស្រួលជាងមុន ដើម្បីបន្តការងារនយោបាយរបស់គណបក្សទៅមុខទៀត៖ «លើសពីនេះទៅទៀត គណៈកម្មការអចិន្ត្រៃយ៍គណបក្ស មានជំនឿច្បាស់ណាស់ថា បងប្អូននឹងតស៊ូរក្សាតទៅនូវមនសិការស្នេហាជាតិ យើងនឹងបន្តរស់នៅក្រោមដំបូលគណបក្សសង្គ្រោះជាតិ យើងនឹងតស៊ូទៅទៀត ដើម្បីទាមទារមកវិញនូវរបបប្រជាធិបតេយ្យសេរីពហុបក្ស ការគោរពសិទ្ធិមនុស្សជូនដល់ប្រទេសកម្ពុជា វិញ ឲ្យទាល់តែបាន នៅពេលឆាប់ៗនេះ»។
ចំណែកឯថ្នាក់ដឹកនាំគណបក្សសង្គ្រោះជាតិ ខេត្តកំពង់ចាម លោក ថាន សុរិទ្ធ អះអាងថា សមាជិកគណបក្សលោកនៅខេត្តកំពង់ចាម សម្ដែងការត្រេកអរយ៉ាងខ្លាំងដែលថ្នាក់ដឹកនាំគណបក្សប្រកាសរួមសាមគ្គីគ្នាដើម្បីបន្តយុទ្ធនាការនយោបាយឆ្ពោះទៅរកការបោះឆ្នោតជ្រើសរើសតំណាងរាស្ត្រនៅឆ្នាំ២០១៨ នោះ។ លោកអះអាងទៀតថា សកម្មជនថ្នាក់មូលដ្ឋានរបស់គណបក្សលោកបានត្រៀមរួចជាស្រេចហើយ ដើម្បីបន្តជីវិតនយោបាយឲ្យរស់រវើកជាមួយមន្ត្រីថ្នាក់ដឹកនាំគណបក្សដោយឥតរុញរាឡើយ៖ «បើបានគណបក្សសង្គ្រោះជាតិ មកវិញ អ្នកដែលសប្បាយជាងគេគឺបងប្អូនប្រជាពលរដ្ឋហ្នឹងហើយដែលសប្បាយជាងគេ ហើយកន្លងមកឃើញមានការចុះជាមួយគណបក្សកាន់អំណាចនោះ មិនមែនមានន័យថា ប្រជាពលរដ្ឋទៅតាមទេ ប្រជាពលរដ្ឋគាត់យល់ច្បាស់ណាស់អំពីស្ថានភាពនយោបាយ។ គាត់សប្បាយចិត្តណាស់នៅពេលឮដំណឹងធ្វើឲ្យសមាជិកគណបក្សរឹងមាំឡើងវិញ ទាក់ទងនឹងគោលជំហរ គឺកុំបារម្ភឲ្យសោះ ដោយថ្នាក់ក្រោយមានភាពរឹងមាំណាស់ ដោយរង់ចាំតែព័ត៌មានពីថ្នាក់ដឹកនាំនៅក្រៅតែប៉ុណ្ណឹងទេ»។
អាស៊ីសេរី ពុំអាចទាក់ទងអ្នកនាំពាក្យគណបក្សប្រជាជនកម្ពុជា លោក សុខ ឥសាន ដើម្បីឆ្លើយតបជុំវិញការប្រកាសពង្រឹងសាមគ្គីភាពរបស់ថ្នាក់ដឹកនាំគណបក្សប្រឆាំងបានទេ នៅថ្ងៃទី២៨ ខែវិច្ឆិកា ដោយទូរស័ព្ទពុំមានអ្នកទទួល។ ប៉ុន្តែលោក សុខ ឥសាន ធ្លាប់បានអះអាងថា សកម្មជនគណបក្សប្រឆាំងរាប់ពាន់នាក់បានមកសុំចុះចូលជាមួយគណបក្សលោក ហើយលោកថា ការចុះចូលនេះទំនងដោយសារពួកគេមិនពេញចិត្តនឹងមេដឹកនាំគណបក្សប្រឆាំង ដែលប្រព្រឹត្តអំពើក្បត់ជាតិ៖ «អ៊ីចឹងទេយើងមិនអាចងើយបងប្អូនធ្លាក់ខ្លួនទទួលរងដោយអយុត្តិធម៌ដោយមេបក្សប្រឆាំង និងក្រុមមេបក្សប្រឆាំងនោះទេ ត្រូវតែអូសទាញអប់រំបងប្អូនឲ្យមានការគិតគូរ ហើយមានការភ្ញាក់រលឹក ដោយឆន្ទៈផ្ទាល់ខ្លួនដើម្បីមករួមរស់ជាមួយគណបក្សប្រជាជនកម្ពុជា»។
គណបក្សសង្គ្រោះជាតិ ត្រូវតុលាការកំពូលជម្រះក្ដីរំលាយគណបក្សកាលពីថ្ងៃទី១៦ ខែវិច្ឆិកា គឺបន្ទាប់ពីក្រសួងមហាផ្ទៃ បានបញ្ជូនសំណុំរឿងរំលាយគណបក្សដែលប្ដឹងដោយគណបក្សនយោបាយ២ កាលពីពេលថ្មីៗនេះ។
ទោះជាយ៉ាងណា មន្ត្រីថ្នាក់ដឹកនាំគណបក្សសង្គ្រោះជាតិ ឲ្យដឹងថា សកម្មជនដែលចុះចូលគណបក្សកាន់អំណាចគិតត្រឹមថ្ងៃទី២៦ ខែវិច្ឆិកា ដែលជាថ្ងៃឱសានវាទរបស់លោកនាយករដ្ឋមន្ត្រី ហ៊ុន សែន បើកឱកាសឲ្យសកម្មជនគណបក្សសង្គ្រោះជាតិ ចុះចូល គឺមានសមាជិកក្រុមប្រឹក្សាប្រហែលជាង ២០០នាក់ដែលបានចុះចូលគណបក្សកាន់អំណាចនោះ។
អ្នកវិភាគស្ថានការណ៍នយោបាយលោកបណ្ឌិត មាស នី លើកឡើងថា ស្របពេលស្ថានការណ៍នយោបាយឡើងកម្ដៅកាន់តែខ្លាំង រីឯចំនួនសកម្មជនគណបក្សសង្គ្រោះជាតិ ទៅចុះចូលគណបក្សប្រជាជនកម្ពុជា តិចតួចនោះ លោកថា ជាចំណុចខ្លាំងរបស់គណបក្សប្រឆាំង ដើម្បីបង្ហាញទៅដៃគូប្រកួតដែលសបញ្ជាក់ថា គណបក្សមួយនេះ មានភាពរឹងមាំនៅថ្នាក់មូលដ្ឋាន គឺធ្វើឲ្យគណបក្សនេះមិនអាចបំបែកបានដោយងាយស្រួលឡើយ៕