ទីប្រឹក្សាសម្ដេចព្រះសង្ឃរាជ ទេព វង្ស និងជាតំណាងព្រះសង្ឃទូទាំងប្រទេស គឺព្រះតេជព្រះគុណ ហោ សុខុន មានថេរដីកាទៅកាន់អ្នកសារព័ត៌មានក្រោយពេលដាក់ពាក្យបណ្ដឹងនៅខាងមុខក្រសួងមហាផ្ទៃ នៅរសៀលថ្ងៃទី២៧ ខែវិច្ឆិកា ថា មន្ត្រីនៃក្រសួងមហាផ្ទៃ បានទទួលពាក្យបណ្ដឹងរបស់ព្រះអង្គហើយ។
ព្រះតេជព្រះគុណមានថេរដីកាបន្ថែមថា ខាងក្រសួងនឹងចាត់ការលើសំណុំរឿងនេះទៅតាមផ្លូវច្បាប់៖ «លោក ខឹម វាសនា ជាបុគ្គលមួយដែលមានតួនាទីជាប្រធានគណបក្សនយោបាយ។ ដូចគេថា ទៅរវល់អីជាមួយ ខឹម វាសនា អាហ្នឹងឆ្កួតណាស់ ប្រជាពលរដ្ឋភាគច្រើនគេនិយាយអ៊ីចឹង តែបើមនុស្សឆ្កួត ក្រសួងនឹងអាចបើកឲ្យធ្វើប្រធានគណបក្សបានទេ? ហើយបើទោះបីវាឆ្កួតមែន ក៏វាច្បាស់គ្រប់គ្រាន់ដែរ»។
ខ្លឹមសារក្នុងពាក្យបណ្ដឹងឲ្យដឹងថា ព្រះសង្ឃប្ដឹងលោក ខឹម វាសនា ប្រធានគណបក្សសម្ព័ន្ធប្រជាធិបតេយ្យ (LDP) ពីបទសាបព្រោះវប្បធម៌ជេរប្រមាថជាសាធារណៈ ប្រមាថអង្គព្រះមហាក្សត្រ ញុះញង់បំបែកបំបាក់ជាតិខ្មែរ ប្រមាថស្ថាប័នព្រះសង្ឃ ចោទរដ្ឋាភិបាលលោកនាយករដ្ឋមន្ត្រី ហ៊ុន សែន ថា ធ្វើឲ្យបាត់បង់កោះត្រល់ ញុះញង់ឲ្យមានបដិវត្តន៍ផ្ដួលរំលំរដ្ឋាភិបាល ប្រមាថជាតិសាសន៍ពូជខ្មែរ និងមានចេតនាបំផ្លាញព្រះពុទ្ធសាសនានៅកម្ពុជា។ ក្នុងការប្ដឹងនេះមានតំណាងព្រះសង្ឃទូទាំងប្រទេសប្រមាណ ១០អង្គ ចូលរួមហែហមនាំពាក្យបណ្ដឹងទៅក្រសួងមហាផ្ទៃ។ តំណាងព្រះសង្ឃមានជំនឿថា ក្រសួងមហាផ្ទៃ នឹងចាត់វិធានការលើសំណុំរឿងនេះឲ្យមានប្រសិទ្ធភាព និងប្រកបដោយអព្យាក្រឹត និងយុត្តិធម៌ជាពុំខាន។
ការដាក់ពាក្យបណ្ដឹងរបស់ទីប្រឹក្សាសម្ដេចព្រះសង្ឃរាជ ទេព វង្ស ប្ដឹងលោក ខឹម វាសនា ប្រធានគណបក្សសម្ព័ន្ធប្រជាធិបតេយ្យទៅក្រសួងមហាផ្ទៃ នៅពេលនេះ ធ្វើឡើងប៉ុន្មានថ្ងៃបន្ទាប់ពីគណបក្សសម្ព័ន្ធប្រជាធិបតេយ្យ របស់លោក ខឹម វាសនា បដិសេធមិនទទួលយកអាសនៈសភារបស់គណបក្សសង្គ្រោះជាតិ៕