Clik here to view.
អតីតប្រធានស្ដីទីគណបក្សបក្សសង្គ្រោះជាតិ នៅខែត្រស្ទឹងត្រែង មួយរូប ចុះចូលជាមួយគណបក្សកាន់អំណាចដោយទទួលបានតួនាទីជាអភិបាលរងខែត្រ និងអត្ថប្រយោជន៍មួយចំនួនទៀត។ មន្ត្រីគណបក្សសង្គ្រោះជាតិ ខែត្រស្ទឹងត្រែង ឲ្យដឹងថា ការសម្រេចចុះចូលនេះ គឺដោយមានការចែចូវដោយអាជ្ញាធរមួយចំនួនមកពីបក្សប្រជាជនកម្ពុជា។
គិតត្រឹមថ្ងៃទី២៥ វិច្ឆិកា អតីតមន្ត្រីបក្សសង្គ្រោះជាតិ ចំនួន ៨នាក់ហើយនៅខែត្រស្ទឹងត្រែង ចុះចូលជាមួយបក្សកាន់អំណាចនៅគ្រាដែលបក្សសង្គ្រោះជាតិ ត្រូវបានតុលាការកំពូលប្រកាសរំលាយកាលពីថ្ងៃទី១៦ វិច្ឆិកា ស្របពេលដែលលោកនាយករដ្ឋមន្ត្រី ហ៊ុន សែន បានទូងស្គរម្ដងហើយម្ដងទៀត ប្រកាសឲ្យសមាជិកក្រុមប្រឹក្សាឃុំ/សង្កាត់មកពីបក្សជំទាស់ទាំងអស់ ចុះចូលជាមួយបក្សកាន់អំណាចដោយសន្យារក្សាតំណែង និងប្រាក់ខែដដែល។
អតីតអនុប្រធានក្រុមការងារបក្សសង្គ្រោះជាតិ ខែត្រស្ទឹងត្រែង លោក សុខ វាសនា ឲ្យដឹងថា ប្រធានស្ដីទីគណបក្សសង្គ្រោះជាតិ នៅខែត្រស្ទឹងត្រែង លោក សាធ ស៊ិន បានចុះចូលជាមួយបក្សកាន់អំណាចដោយមានការចែចូវច្រើនសាពីអាជ្ញាធរមកពីបក្សប្រជាជនកម្ពុជា ដោយសន្យាផ្ដល់តួនាទីជាសមាជិកក្រុមប្រឹក្សាខែត្រ ឬអភិបាលរងខែត្រ។ លោកថា គ្រប់ឃុំ/សង្កាត់ទាំងអស់នៅខែត្រស្ទឹងត្រែង ត្រូវអាជ្ញាធរបក្សកាន់អំណាចចែចូវដោយសន្យារក្សាប្រាក់ខែ និងតួនាទី។ លើសពីនេះ អាជ្ញាធរមកពីបក្សប្រជាជនកម្ពុជា ធ្លាប់មកចែចូវលោកដែរ ដោយសន្យាផ្ដល់តួនាទីជាអនុប្រធានមន្ទីរ និងប្រធានការិយាល័យ ក៏ប៉ុន្តែលោកបដិសេធ។
លោកសង្កត់ធ្ងន់ថា អតីតមន្ត្រីជាន់ខ្ពស់បក្សសង្គ្រោះជាតិ ចុះចូលជាមួយបក្សកាន់អំណាចដោយសារលាភសក្ការៈ ពុំមែនដោយសារការគំរាមកំហែងនោះទេ ៖ «តាមខ្ញុំបានដឹង គឺគេនឹងផ្តល់តួនាទីឲ្យគាត់ដដែល គឺជាសមាជិកក្រុមប្រឹក្សាខែត្រ។ បើសិនចង់ធ្វើជាអភិបាលរងខែត្រក៏បាន និងមានលាភសក្ការៈផ្សេងទៀត ដូចជាថវិកា និងមធ្យោបាយធ្វើដំណើរ ដូចជារថយន្តជាដើម»។
លោក សុខ វាសនា រំឭកថា កាលពីឆ្នាំ២០១៦ រដ្ឋាភិបាលបានដកលោកចេញពីមន្ត្រីក្របខ័ណ្ឌរដ្ឋទាំងបំពានច្បាប់ ខណៈលោកមានតួនាទីជាប្រធានការិយាល័យនៃមន្ទីរអភិវឌ្ឍន៍ជនបទ ខែត្រស្ទឹងត្រែង។ លោកថា មូលហេតុដែលរដ្ឋាភិបាលធ្វើទុក្ខបុកម្នេញលោក ដោយសារតែលោកគាំទ្រគណបក្សសង្គ្រោះជាតិ ដោយបើកចំហ។ លោកចាត់ទុកទង្វើនេះជាការរើសអើងនិន្នាការនយោបាយ៖ «ហេតុផលដែលគេដកខ្ញុំ គឺហេតុផលតែមួយគត់គឺដោយសាររឿងនយោបាយ។ ពេលនោះគឺខ្ញុំ ធ្វើការជាមួយបក្សសង្គ្រោះជាតិ ជាមនុស្សមានប្រជាប្រិយម្នាក់ អ៊ីចឹងហើយគេចាត់ទុកខ្ញុំអ្នកផ្សេង និងតម្រូវបំពានខ្ញុំ»។
កាលពីថ្ងៃទី២៣ ខែវិច្ឆិកា ឆ្នាំ២០១៧ ប្រធានស្តីទីបក្សសង្គ្រោះជាតិ និងជាអតីតសមាជិកក្រុមប្រឹក្សាខែត្រស្ទឹងត្រែង មកពីគណបក្ស សម រង្ស៊ី បានសរសេរលិខិតស្នើសុំប្រធានគណៈកម្មការគណបក្សប្រជាជនកម្ពុជា ខែត្រស្ទឹងត្រែង ក្នុងបំណងចូលរួមជីវភាពនយោបាយ ដោយយល់ឃើញថា បក្សប្រជាជនកម្ពុជា មានគុណចំពោះមាតុភូមិ។
ថ្មីៗនេះ លោកនាយករដ្ឋមន្ត្រី ហ៊ុន សែន បានលើកពេលពីរថ្ងៃទៀត ពោលគឺត្រឹមថ្ងៃទី២៦ វិច្ឆិកា ដើម្បីបើកឱកាសឲ្យមន្ត្រីបក្សសង្គ្រោះជាតិ ចុះចូលជាមួយបក្សកាន់អំណាច។ ក៏ប៉ុន្តែពលរដ្ឋមានមន្ទិលថា លោក ហ៊ុន សែន បានចោទមេដឹកនាំបក្សប្រឆាំងលោក កឹម សុខា ថាជាជនក្បត់ជាតិ និងរំលាយបក្សសង្គ្រោះជាតិ ថែមទៀត ចុះហេតុអ្វីបានចង់បានកូនចៅអ្នកក្បត់ជាតិទៅវិញ?
អតីតមេឃុំស្រែគរ ដែលជាប់ឆ្នោតជាមេឃុំ២អាណត្តិ លោក សៀក មេគង្គ ឲ្យដឹងថា មេដឹកនាំបក្សសង្គ្រោះជាតិ ខែត្រស្ទឹងត្រែង ចុះចូលជាមួយបក្សកាន់អំណាច ពុំមានឥទ្ធិពលជាវិជ្ជមានដើម្បីឲ្យលោកផ្លាស់ប្ដូរឥរិយាបថនោះទេ ហើយតំណែងរបស់លោកគឺពលរដ្ឋជាជ្រើសរើសដោយអំណាចសន្លឹកឆ្នោត ក៏ប៉ុន្តែបែរជាគេប្លន់តំណែងរបស់លោក នាំឲ្យពលរដ្ឋមិនសប្បាយចិត្ត។
លោកថា ពលរដ្ឋអន់ចិត្តចំពោះការផ្លាស់ប្ដូរតំណែងរបស់លោក ហើយពួកគាត់បារម្ភថា ការដាក់មេឃុំថ្មីដែលពលរដ្ឋមិនបានបោះឆ្នោតឲ្យនឹងប៉ះពាល់ការផ្ដល់សេវាសាធារណៈ និងការដោះស្រាយបញ្ហាប្រឈមនៅមូលដ្ឋាន៖ «ពលរដ្ឋមានការអស់សង្ឃឹមមែនទែន និងការប្រកបមុខរបរ។ បញ្ហាប្រឈមមួយទៀត គឺការផ្លាស់ប្ដូរភូមិថ្មី និងភូមិចាស់ មិនដឹងជាយ៉ាងម៉េច។ អ៊ីចឹងទៅគាត់មានការសោកស្ដាយ។ គាត់ថាមិនគួរបោះឆ្នោតជាងពាក់កណ្តាលនគរ ហើយរំលាយ ហើយគាត់មានការសោកស្ដាយ»។
ទោះយ៉ាងណា មន្ត្រីអង្កេតជាន់ខ្ពស់អង្គការខុមហ្វ្រែល (Comfrel) លោក កន សាវាង្ស មានប្រសាសន៍ថា ប្រសិនបើការអូសទាញលក្ខណៈទិញទឹកចិត្តតាមរយៈផ្ដល់តំណែង និងតួនាទី គឺជាការប្រកួតប្រជែងផ្នែកនយោបាយមិនស្មោះត្រង់ និងមិនត្រឹមត្រូវ។ លោកថា ការបោះឆ្នោតគឺជាការជ្រើសរើសដោយពលរដ្ឋ ក៏ប៉ុន្តែការឡើងកាន់អំណាចណាមួយដែលពលរដ្ឋមិនបានបោះឲ្យគឺជារឿងមិនត្រឹមត្រូវតាមច្បាប់នោះទេ៖ «គេហៅបញ្ចុះបញ្ចូល ក៏ប៉ុន្តែបើយើងមើលពីផ្លូវធម្មតាវិញគេថា ពិសពុល ដែលការសន្យាមួយដែលឲ្យជាថ្នូរអ៊ីចឹង គឺកិច្ចការនយោបាយមួយដែលមិនត្រឹមត្រូវ និងមិនស្មោះត្រង់»។
កន្លងទៅ លោកនាយករដ្ឋមន្ត្រី ហ៊ុន សែន ថ្លែងថា ការទទួលយកមន្ត្រីបក្សប្រឆាំងនៅគ្រប់ឃុំ-សង្កាត់ទាំងអស់នេះ ជាការអនុវត្តនយោបាយឈ្នះឈ្នះ ដែលលោកធ្លាប់ធ្វើជាមួយខ្មែរក្រហម ប៉ុន្តែអ្នកវិភាគថា រឿងញុះញង់ឲ្យមេឃុំ/ចៅសង្កាត់គណបក្សសង្គ្រោះជាតិ រត់ទៅចុះចូលជាមួយបក្សប្រជាជនកម្ពុជា និងរឿងខ្មែរក្រហមមិនដូចគ្នាទេ។ រឿងខ្មែរក្រហមគេមើលឃើញថា ជារឿងផ្សះផ្សាជាតិ ប៉ុន្តែរឿងញុះញង់ឲ្យសមាជិកគណបក្សសង្គ្រោះជាតិ ចាកចេញពីបក្សភ្ជាប់ជាមួយរឿងរំលាយគណបក្សសង្គ្រោះជាតិ ជារឿងបំបែកបំបាក់ឯកភាពជាតិ ដែលនាំឲ្យការអនុវត្តប្រជាធិបតេយ្យនៅកម្ពុជា ដួលរលំ៕