Clik here to view.
មន្ត្រីកងរាជអាវុធហត្ថម្នាក់នៅស្រុកស្នូល ខែត្រក្រចេះ រងការចោទថា ធ្វើទារុណកម្មបុរសម្នាក់ឲ្យរបួសធ្ងន់ធ្ងរ។ ការចោទប្រកាន់នេះធ្វើឡើង បន្ទាប់ពីមន្ត្រីអាវុធហត្ថស្រុកស្នូល ១០នាក់ បានដេញចាប់បុរសឈ្មោះ ប៉ូ ភីរុណ ដោយចោទថា ប្រើប្រាស់គ្រឿងញៀនខុសច្បាប់ ហើយបន្ទាប់ពីឃាត់ខ្លួនបុរសនោះបាន មន្ត្រីអាវុធហត្ថម្នាក់ឈ្មោះ រ៉ុង បានវាយទាត់ធាក់លើជនសង្ស័យម្នាក់បណ្ដាលឲ្យរបួសធ្ងន់។
ពលរដ្ឋមួយគ្រួសាររស់នៅ ឃុំស្នូល ស្រុកស្នូលខែត្រក្រចេះ បានស្វែងរកកិច្ចអន្តរាគមន៍ផ្នែកច្បាប់ទៅសមាគមការពារសិទ្ធិមនុស្សអាដហុកខែត្រក្រចេះ ដើម្បីប្ដឹងមន្ត្រីអាវុធហត្ថស្រុកស្នូលម្នាក់ ឈ្មោះ រ៉ុង បានប្រើអំពើហិង្សាលើបុរសម្នាក់ឈ្មោះ ប៉ូ ភីរុណ ឲ្យរបួសធ្ងន់ធ្ងរកាលពីថ្ងៃទី១៥ វិច្ឆិកា។
ស្ត្រីដែលត្រូវជាម្ដាយជនរងគ្រោះរស់នៅស្រុកស្នួល ខែត្រក្រចេះ លោកស្រី ហយ ស៊ីគុណ វ័យ ៧២ ឆ្នាំ ឲ្យដឹងនៅថ្ងៃទី២៤ វិច្ឆិកា ថា មន្ត្រីអាវុធហត្ថឈ្មោះ រ៉ុង បានប្រើអំពើហិង្សានៅចំពោះមុខលោកស្រី បណ្ដាលឲ្យកូនប្រុសរបស់លោកស្រីរបួសធ្ងន់ គ្រាំក្នុង និងស្លាកស្នាមច្រើនកន្លែង។ លោកស្រីថា ប្រសិនបើកូនប្រុសរបស់លោកស្រីប្រព្រឹត្តអំពើខុសច្បាប់ អាជ្ញាធរមានសមត្ថកិច្ចត្រូវឃាត់ខ្លួន បញ្ជូនទៅសាលាជំនុំជម្រះក្តី ដើម្បីអនុវត្តនីតិវិធី ដោយមិនគួរប្រើហិង្សានោះទេ។ លោកស្រីសង្ស័យថា ការប្រើអំពើហិង្សាលើកូនរបស់លោកស្រី ហាក់ជារឿងគំនុំច្រើនជាងការអនុវត្តច្បាប់ ព្រោះកូនប្រុសលោកស្រីពុំមានអាវុធតបតជាមួយសមត្ថកិច្ចនោះទេ៖ «វាយខ្លាំងណាស់ យកជើងអុកក្បាលពោះ លើកឡើងទះ នៅមុខខ្ញុំតែម្តង ហើយខ្ញុំចេះតែប្រាប់ថា កុំវ៉ៃ តែគេមិនព្រមដូចមានសត្រូវអីចឹង»។
កាលពីថ្ងៃទី១៥ វិច្ឆិកា មន្ត្រីអាវុធហត្ថខែត្រក្រចេះ ១០នាក់ បានដេញចាប់ក្រុមយុវជនដែលសង្ស័យថា ប្រើប្រាស់គ្រឿងញៀននៅក្បែរផ្សារស្នូល ខែត្រក្រចេះ។ ប្រតិបត្តិការបង្ក្រាបនោះ មន្ត្រីអាវុធហត្ថបាញ់គ្រាប់កាំភ្លើងពីរគ្រាប់ឡើងលើ។ រីឯមន្ត្រីអាវុធហត្ថម្នាក់ឈ្មោះ រ៉ុង ពាក់ឯកសណ្ឋានស៊ីវិល និងខោខ្លី បានប្រើហិង្សាលើបុរសម្នាក់ឈ្មោះ ប៉ូ ភីរុណ និងអូសបុរសនោះដាក់រថយន្តបញ្ជូនទៅតុលាការ។ បញ្ហានេះអ្នកប្រើប្រាស់បណ្ដាញសង្គមមួយចំនួនបានថតវីដេអូបង្ហោះ និងរិះគន់សមត្ថកិច្ចដែលប្រើហិង្សានោះ។
អាស៊ីសេរីមិនអាចរកប្រភពទាក់ទងមន្ត្រីអាវុធហត្ថឈ្មោះ រ៉ុង ដើម្បីសុំការបំភ្លឺពីការចោទប្រកាន់នេះបានទេនៅថ្ងៃទី២៤ វិច្ឆិកា។
មន្ត្រីស៊ើបអង្កេតសមាគមអាដហុក ខែត្រក្រចេះ លោក ប៊ី វាន់នី ចាត់ទុកការប្រើហិង្សារបស់សមត្ថកិច្ចលើជនសង្ស័យ ដោយជនសង្ស័យមិនតបត គឺជាករណីខុសច្បាប់ និងរំលោភសិទ្ធិមនុស្ស។ លោកថា ក្រុមគ្រួសារជនរងគ្រោះមានវីដេអូ ករណីអំពើហិង្សានោះ ដែលជាភស្តុងតាងជាក់លាក់ បង្ហាញថាមន្ត្រីអាវុធហត្ថនោះ ប្រើហិង្សាលើជនសង្ស័យ។ លោកថា មកទល់ពេលនេះ ជនសង្ស័យ ដែលមន្ត្រីអាវុធហត្ថប្រើហិង្សានោះ ត្រូវតុលាការបញ្ជូនឃុំខ្លួនក្នុងពន្ធនាគាររួចហើយក្នុងស្ថានភាពរបួសធ្ងន់៖ «ជនសង្ស័យគ្មានកម្លាំងតបតទេ គ្រាន់តែគាត់រត់គេចពីប៉ូលិស ហើយពេលនោះសមត្ថកិច្ចវាយគាត់រំលោភលើសិទ្ធិជនជាប់ចោទ។ យើងមើលទៅរំលោភតួនាទីជាមន្ត្រីនគរបាលយុត្តិធម៌»។
ច្បាប់ព្រហ្មទណ្ឌមាត្រា២១០ ចែងថា ទារុណកម្ម ឬអំពើឃោរឃៅ ដែលប្រព្រឹត្តទៅលើបុគ្គលណាមួយ ត្រូវផ្ដន្ទាទោសដាក់ពន្ធនាគារ ៧ ទៅ១៥ឆ្នាំ៕
