Clik here to view.
ប្រជាពលរដ្ឋសហគមន៍ដីធ្លី ជនជាតិដើមភាគតិច និងព្រះសង្ឃមួយនៅចំនួនយល់ឃើញដូចៗគ្នា ថា ករណីចំណាត់របស់តុលាការក្រុងភ្នំពេញ ដែលសម្រេចចោទប្រកាន់មកលើអតីតអ្នកយកព័ត៌មានវិទ្យុអាស៊ីសេរី ២រូប គឺលោក អួន ឈិន និងលោក យាង សុជាមេត្តា ពីបទប្រគល់ឲ្យរដ្ឋបរទេសនូវព័ត៌មានជាអាទិ៍ដែលអាចធ្វើឲ្យអន្តរាយដល់ការពារជាតិថា ជារឿងអយុត្តិធម៌ធ្ងន់ធ្ងរ ដើម្បីបំបិទសិទ្ធសេរីភាពក្នុងការបញ្ចេញមតិរបស់ពលរដ្ឋ។
ទាំងព្រះសង្ឃ និងប្រជាពលរដ្ឋលើកឡើងថា អ្នកយកព័ត៌មានវិទ្យុអាស៊ីសេរីទាំងអស់ជាមនុស្សមានគុណធម៌ និងគោរពវិជ្ជាជីវៈខ្ជាប់ខ្ជួន ក្នុងការបំពេញការងារ ដោយនាំពីភាពអសកម្ម និងការរំលោភសិទ្ធរបស់ប្រជាពលរដ្ឋរដ្ឋអំណាចកម្ពុជា។
ជនជាតិដើមភាគតិចនៅខេត្តស្ទឹងត្រែង និងស្រុកសំឡូត ខេត្តបាត់ដំបងបានប្រតិកម្មយ៉ាងខ្លាំងចំពោះតុលាការក្រុងភ្នំពេញដែលចោទប្រកាន់មកលើអ្នកសារព័ត៌មានទាំងរូបនេះ ថាជាការប៉ះពាល់ធ្ងន់ធ្ងរដល់ការបញ្ចេញមតិរបស់ប្រជាពលរដ្ឋ៖ «ខ្ញុំស្ដាប់អាស៊ីសេរីរហូត គាត់មិនដែលផ្សាយណាខុសច្បាប់ទេ ផ្សាយតែនៅក្នុងក្របខ័ណ្ឌច្បាប់ ដែលអាជ្ញាធរមិនអនុវត្ត តុលាការក៏ដូចគ្នាដែរគឺមិនឯករាជ្យទេ ធ្វើបាបអ្នកទន់ខ្សោយតាមអំពើចិត្តនោះ។ ខ្ញុំសំណូមពរឲ្យរាជរដ្ឋាភិបាលគិតឡើងវិញថាគាត់ធ្វើអីផ្នែកណាហើយពិនិត្យមើលឡើងវិញ ដើម្បីកុំឲ្យមានភាពអយុត្តិធម៌មកលើពួកគាត់»។
ចំណែកសហគមន៍ដីធ្លី និងប្រជាពលរដ្ឋមួយចំនួននិយមស្ដាប់ព័ត៌មានវិទ្យុអាស៊ីសេរី អះអាងថា ការចាប់ខ្លួនអតីតអ្នកយកព័ត៌មានវិជ្ជាជីវៈទាំង ២នាក់ គឺជាការបិទផ្លូវតវ៉ារបស់ប្រជាពលរដ្ឋដែលរងគ្រោះដោយការរំលោភបំពាន ដោយអ្នកមានលុយ និងមន្ត្រីមានអំណាច៖ «មានតែពួកគាត់ទេក្លាហានចុះយកព័ត៌មាន ទៅផ្សព្វផ្សាយឲ្យពលរដ្ឋបានដឹងលឺ ព្រោះស្ថាប័នព័ត៌មានមួយចំនួនទៀតផ្សាយព័ត៌មានកាន់ជើងរដ្ឋាភិបាល ផ្សាយព័ត៌មានមិនពិតដូចអ្នកយកព័ត៌មានអាស៊ីសេរីទេ។ ខ្ញុំគិតថា ការចាប់នេះ វាជារឿងអយុត្តិធម៌មកលើអ្នកសារព័ត៌មាន ព្រោះគាត់មិនកំហុសទេ»។
រីឯព្រះសង្ឃមួយចំនួនដែលតាមដានស្ថានការណ៍នយោបាយនៅកម្ពុជា មានថេរៈដីកាថា តុលាការចោទប្រកាន់អតីតអ្នកយកព័ត៌មានអាស៊ីសេរីទាំង២រូបនេះ ថា ជាការចោទប្រកាន់ក្នុងចេតនានយោបាយ ដើម្បីបំបិទសិទ្ធមិនឲ្យអ្នកយកព័ត៌មានវិជ្ជាជីវៈ ហ៊ានសរសេរព័ត៌មានរិះគន់ពីអសកម្មរបស់រដ្ឋាភិបាលផ្សព្វផ្សាយទៅកាន់ពិភពលោកឲ្យបានដឹង៖ «វាហាក់បីដូចជា ការគំរាមកំហែងធ្ងន់ធ្ងរមកលើអ្នកសារព័ត៌មានអាស៊ីសេរី ហើយបើទោះបីជា ពួកគាត់បានលាលែងពីអាស៊ីសេរីហើយក៏ដោយ ក៏ប៉ុន្តែជាការបំភិតបំភ័យធ្វើឲ្យអ្នកសារព័ត៌មានដទៃភ័យខ្លាច។ សម្រាប់អាត្មាគឺសោកស្ដាយមែនទែន ព្រោះយើងនឹងបាត់បង់មនុស្សដែលមានវិជ្ជាជីវៈមួយដ៏ល្អ ដែលអាចធ្វើឲ្យពលរដ្ឋខ្មែរយើងបានឆ្លុះបញ្ចាំងពីសង្គមពិតប្រាកដ»។
ទាំងព្រះសង្ឃ ប្រជាពលរដ្ឋព្រមទាំងសហគមន៍ដីធ្លី ប្រកាន់ជំហរថា នឹងតាមដានពីការចាប់ខ្លួនអ្នកយកព័ត៌មានទាំង២នាក់នេះ យ៉ាងយកចិត្តទុកដាក់បំផុត ហើយទទូចឲ្យតុលាការទម្លាក់ការចោទប្រកាន់ជាបន្ទាន់ និងដោយគ្មានលក្ខខណ្ឌ ហើយប្រសិនបើគ្មានដំណោះស្រាយទេ ពួកគាត់នឹងមិននៅស្ងៀមឈរអោបដៃមើលអ្នកទាំង២ជាដាច់ខាត ព្រោះពួកគាត់ជាមនុស្សគ្មានកំហុស ហើយបំពេញការងារដើម្បីប្រយោជន៍របស់ប្រជាពលរដ្ឋ ជាពិសេសអ្នករងទុក្ខដោយសារការធ្វើទុក្ខបុកម្នេញពីអ្នកមានលុយ និងមានអំណាច៕
