ក្រុមប្រឹក្សាភិបាលនៃផ្នែកផ្សព្វផ្សាយរបស់សហរដ្ឋអាមេរិក (BBG) ជាស្ថាប័នគ្រប់គ្រងអាស៊ីសេរី និងសំឡេងសហរដ្ឋអាមេរិក (VOA) កាលពីថ្ងៃទី១៧ ខែវិច្ឆិកា ជំរុញឱ្យសមត្ថកិច្ចទីក្រុងភ្នំពេញ ដោះលែងអតីតអ្នករាយការណ៍ព័ត៌មាន របស់អាស៊ីសេរីពីររូបគឺលោក អួន ឈិន និងលោក យាង សុធារិន្ទ ហៅ យាង សុជាមេត្តា ឱ្យមានសេរីភាពជាបន្ទាន់ ដើម្បីឲ្យពួកគេទៅជួបជុំក្រុមគ្រួសារវិញ។
សេចក្ដីប្រកាសព័ត៌មានរបស់ BBGឲ្យដឹងថាការឃាត់ខ្លួនអ្នកទាំងពីរនាក់ ដោយសារតែចង់បង្កើតមានបរិយាសភ័យខ្លាច ប៉ុន្តែផ្ទុយទៅវិញការឃាត់ខ្លួនអតីតអ្នករាយការណ៍ព័ត៌មាន នឹងធ្វើឲ្យ BBG ប្ដេជ្ញាចិត្តបន្តគាំទ្រដល់អ្នកសារព័ត៌មានអាស៊ីសេរី និង VOA ក្នុងការផ្ដល់ព័ត៌មានពិត និងឥតលំអៀង។
BBG បន្តទៀតថា សេរីភាពសារព័ត៌មាន គឺជាមូលដ្ឋានគ្រឹះនៃសិទ្ធិមនុស្ស ហើយជាទូទៅ ត្រូវបានគេចាត់ទុកជាអាទិភាព។ នៅពេលដែលមនុស្សបាត់បង់សំឡេងឯករាជ្យ ពួកគេក៏នឹងធ្លាក់ខ្លួនពី ពិភពមួយដែលគ្មានព័ត៌មាន ទៅរបបមួយដែលមានភាពវឹកវរ របបជ្រុលនិយម និងរបបសាហាវព្រៃផ្សៃ៕