អ្នកនាំពាក្យអយ្យការអមសាលាដំបូងរាជធានីភ្នំពេញ លោក លី សុផាណា អះអាងថា តុលាការមានមូលដ្ឋានគ្រប់គ្រាន់ ក្នុងការចោទប្រកាន់អតីតបុគ្គលិកវិទ្យុអាស៊ីសេរី ២នាក់ គឺលោក យាង សុជាមេត្តា និងលោក អ៊ួន ឈិន។
លោក លី សុផាណា ឲ្យដឹងតាមបណ្ដាញទំនាក់ទំនងសង្គមតេឡេក្រាម នៅថ្ងៃទី១៨ វិច្ឆិកា ថា បន្ទាប់ពីបានពិនិត្យសំណុំរឿង រួមទាំងឆ្លងកាត់ការស្រាវជ្រាវស៊ើបអង្កេត ដោយបានពិនិត្យភស្តុតាង និងផ្ទៀងផ្ទាត់ចម្លើយជនសង្ស័យរួចមក ព្រមទាំងយល់ឃើញថា មានមូលដ្ឋានគ្រប់គ្រាន់ឲ្យតំណាងអយ្យការអមសាលាដំបូងរាជធានីភ្នំពេញ ធ្វើការចោទប្រកាន់ដោយបើកការស៊ើបសួរ ពីបទ ប្រគល់ឲ្យរដ្ឋបរទេសនូវព័ត៌មានជាអាទិ ដែលបង្កអោយមានការអន្តរាយដល់ការការពារជាតិ តាមបញ្ញត្តិមាត្រា ៤៤៥ នៃក្រមព្រហ្មទណ្ឌ។
លោកបន្តថា អ្នកទាំងពីរត្រូវបានបញ្ជូនទៅចៅក្រមស៊ើបសួរ នៃសាលាដំបូងរាជធានីភ្នំពេញដើម្បីចាត់ការបន្តតាមនីតិវិធី។
លោក អ៊ួន ឈិន និងលោក សុជាមេត្តា ត្រូវបានឃាត់ខ្លួនពួកគេកាលពីថ្ងៃទី១៤ ខែវិច្ឆិកា នៅក្នុងបន្ទប់ជួលនៃសណ្ឋាគារ ម៉ារ៉ាឌី ស្ថិតក្នុងខណ្ឌមានជ័យ ជិតគល់ស្ទឹងមានជ័យ ក្រុងភ្នំពេញ។
អ្នកច្បាប់ និងអ្នកឃ្លាំមើលសិទ្ធិមនុស្ស ចាត់ទុកការចោទប្រកាន់អតីតអ្នកយកព័ត៌មានអាស៊ីសេរី ទាំងពីររូបនេះថា ជារឿងប្រឌិត និងអយុត្តិធម៌បំផុត។
សូមរង់ចាំអាន និងស្ដាប់បន្ថែមទៀតក្នុងកម្មវិធីផ្សាយនៅយប់នេះ...