នៅមួយថ្ងៃមុនពេលតុលាការកំពូល បើកសវនាការលើសំណុំរឿងសុំរម្លាយគណបក្សសង្គ្រោះជាតិ ក្រុមមេធាវីតំណាងក្រសួងមហាផ្ទៃ នៅថ្ងៃទី១៥ ខែវិច្ឆិកា នេះ បានដាក់បន្ថែមបញ្ជីឈ្មោះអ្នកនយោបាយជើងចាស់មួយរូបទៀត គឺលោក គង់ គាំ ដើម្បីស្នើឲ្យតុលាការហាមប្រាមមិនឲ្យលោកធ្វើនយោបាយរយៈពេល ៥ឆ្នាំ។
ការដាក់បន្ថែមឈ្មោះលោក គង់ គាំ ទៅក្នុងបញ្ជីឈ្មោះថ្នាក់ដឹកនាំគណបក្សសង្គ្រោះជាតិ ចំនួន ១១៧នាក់ ដែលត្រូវប្រឈមនឹងការហាមប្រាមធ្វើនយោបាយរយៈពេល ៥ឆ្នាំនេះ ធ្វើឡើងដោយសារតែក្រុមមេធាវីតំណាងក្រសួងមហាផ្ទៃ ទាំងនេះជឿថា លោក គង់ គាំ នៅមានតួនាទីជាទីប្រឹក្សាជាន់ខ្ពស់របស់គណបក្សសង្គ្រោះជាតិ បន្ទាប់ពីលាលែងតំណែងជាប្រធានគណបក្ស សម រង្ស៊ី។
លោក គង់ គាំ បដិសេធថា លោកមិនបានជាប់ពាក់ព័ន្ធ ឬមានមុខតំណែងជាន់ខ្ពស់ណាមួយឡើយក្នុងជួរគណបក្សសង្គ្រោះជាតិ។ លោក គង់ គាំ ដាក់ជាចម្ងល់ថា តើមេធាវីក្រសួងមហាផ្ទៃ ទាំងនោះសម្រេចស្នើតុលាការយ៉ាងដូច្នេះ ដោយផ្អែកលើមូលដ្ឋាន ឬហេតុផលអ្វី?៖ «ខ្ញុំបានលាបញ្ចប់តួនាទីខ្ញុំជាសមាជិកគណបក្សសម រង្ស៊ី និងប្រធានគណបក្ស សម រង្ស៊ី រួចរាល់អស់ហើយ។ ហើយបើសិនជាថា ខ្ញុំជាឧត្តមទីប្រឹក្សារបស់គណបក្សសង្គ្រោះជាតិ មែនទែនទៅ វាទាល់តែជាប្រធានគណបក្ស សម រង្ស៊ី ទើបប្រអប់ហ្នឹងជាឧត្ដមទីប្រឹក្សាគណបក្ស សង្គ្រោះជាតិ ដែលខ្ញុំអស់តួនាទីជាប្រធានគណបក្ស សម រង្ស៊ី ហើយវាអស់តួនាទីជាឧត្ដមទីប្រឹក្សារបស់គណបក្ស សង្គ្រោះជាតិ ទាំងអស់ហើយ ដូច្នេះ ខ្ញុំមិនដឹងថាអ្នកដែលគេបញ្ចូលឈ្មោះខ្ញុំហ្នឹង មានលក្ខណៈវិនិច្ឆ័យយ៉ាងណានោះទេ បាទ!»។
អ្នកនយោបាយជើងចាស់រូបនេះជឿថា ករណីបណ្ដឹងសុំរម្លាយគណបក្សសង្គ្រោះជាតិ គឺជារឿងនយោបាយសុទ្ធសាធ ហើយតុលាការដែលកំពុងស្ថិតក្រោមសម្ពាធនយោបាយនេះ នឹងសម្រេចតាមការបង្គាប់បញ្ជារបស់លោក ហ៊ុន សែន។ យ៉ាងណាក៏ដោយ លោក គង់ គាំ បង្ហាញក្តីសង្ឃឹមយ៉ាងមុតមាំថា បញ្ហានេះមិនយូរមិនឆាប់នឹងមានដំណោះស្រាយតាមផ្លូវនយោបាយ ដោយសារតែការបោះឆ្នោតជាតិ ឆ្នាំ២០១៨ ខាងមុខនេះ មិនអាចខ្វះវត្តមានគណបក្សប្រកួតប្រជែងដែលមានកម្លាំងខ្លាំងពិតប្រាកដ ដូចគណបក្សសង្គ្រោះជាតិ នោះទេ។
លោក គង់ គាំ មើលឃើញថា ទាំងមជ្ឈដ្ឋានជាតិ និងអន្តរជាតិ នឹងទាមទារឲ្យមានវត្តមានក្រុមអ្នកនយោបាយ និងអ្នកប្រជាធិបតេយ្យពិតប្រាកដដូចជារូបលោក រួមទាំងអ្នកនយោបាយប្រឆាំងដទៃទៀ អាចបន្តចូលរួមធ្វើនយោបាយប្រកួតប្រជែងក្នុងការបោះឆ្នោតនៅពេលខាងមុខដើម្បីបុព្វហេតុនៃលទ្ធិប្រជាធិបតេយ្យនៅកម្ពុជា៕