Clik here to view.
មន្ត្រីប៉ូលិសនៃអធិការនគរបាលស្រុកសំឡូត ខេត្តបាត់ដំបង ឃាត់ខ្លួនមន្ត្រីគណបក្សសង្គ្រោះជាតិ ឃុំស៊ុង ម្នាក់យកទៅឃុំខ្លួនដោយគ្មានដីកាពីតុលាការ។ មន្ត្រីគណបក្សប្រឆាំងរូបនេះត្រូវបានសមត្ថកិច្ចចោទប្រកាន់ពីបទគ្រប់គ្រងអាវុធខុសច្បាប់។ ប៉ុន្តែមន្ត្រីអង្គការសង្គមស៊ីវិលអះអាងថា ការចាប់បុគ្គលណាម្នាក់ដែលពុំមានភស្តុតាងបញ្ជាក់គឺជាអំពើខុសច្បាប់។
មន្ត្រីគណបក្សប្រឆាំងនៅស្រុកសំឡូត បានប្រតិកម្មនឹងការចាប់ខ្លួនដោយសមត្ថកិច្ចនេះ ថាជាការបំភិតបំភ័យមកលើសមាជិកគណបក្សខ្លួនក្នុងចេតនានយោបាយ។
ប្រធានគណបក្សសង្គ្រោះជាតិ ស្រុកសំឡូត លោក អ៊ុំ ពេជ្រ ឲ្យដឹងនៅថ្ងៃទី១៤ ខែវិច្ឆិកាថា សកម្មជនរបស់គណបក្សដែលមន្ត្រីប៉ូលិសប៉ុស្តិ៍នគរបាលរដ្ឋបាលស៊ុង ចាប់ខ្លួននោះ ឈ្មោះ អ៊ូច សាវ ជាជនពិការដៃឆ្វេង អាយុ ៦០ឆ្នាំ ជាបេក្ខជនក្រុមប្រឹក្សាឃុំស៊ុង លេខរៀងទី១០ របស់គណបក្សលោក។ លោកអះអាងថា មុនពេលចាប់ខ្លួនកាលពីប្រមាណម៉ោង ១១ព្រឹក ថ្ងៃទី១៣ ខែវិច្ឆិកា សមត្ថកិច្ចបានទៅឆែកឆេរផ្ទះរបស់ជនត្រូវចោទ ប៉ុន្តែរកមិនឃើញវត្ថុតាងនោះទេ។
លោក អ៊ុំ ពេជ្រ អះអាងទៀតថា ការចាប់ខ្លួននេះ ប៉ូលិសក៏ពុំមានដីកាពីតុលាការដែរ ដោយគ្រាន់តែមានការចង្អុលបង្ហាញពីពលរដ្ឋម្នាក់ដែលប៉ូលិសបានហៅទៅសាកសួរអំពីរឿងជម្លោះក្នុងគ្រួសារ កាលពីពេលថ្មីៗនេះ៖ «ធម្មតាការចាប់មួយៗគេមានភស្តុតាងគេមានឯកសារអីច្បាស់លាស់ណាស់ ប៉ុន្តែនេះវាអត់មាន មកចោទគ្នានៅនឹងផ្ទះ ដូចថាការគំរាមកំហែងមកលើពួកខ្ញុំនឹងធ្វើឲ្យប្រជាពលរដ្ឋនៅក្នុងភូមិគេខ្លបខ្លាច។ ការធ្វើទង្វើបែបនេះ សម្រាប់ពលរដ្ឋនៅក្បែរៗផ្ទះគាត់គេអត់ពេញចិត្ត បើសិនជាដីកាគេមិនថាអីទេ»។
Image may be NSFW.
Clik here to view.
ឆ្លើយតបនឹងបញ្ហានេះនាយប៉ុស្តិ៍នគរបាលរដ្ឋបាលឃុំស៊ុង លោក កែវ វិបុល មានប្រសាសន៍ថា មូលហេតុដែលសមត្ថកិច្ចឃាត់ខ្លួនជនពិការសកម្មជនគណបក្សប្រឆាំងនេះ ដោយសារមានការចង្អុលបង្ហាញពីប្រជាពលរដ្ឋដែលអះអាងថា អ្នកនយោបាយពិការរូបនេះ បានលាក់ទុកកាំភ្លើង អេ.ខេ (A.K) មួយដើម នៅក្នុងផ្ទះដោយគ្មានច្បាប់អនុញ្ញាត។
លោកអះអាងទៀតថា ការចាប់ខ្លួននេះ ធ្វើឡើងដោយមានដីកាពីតុលាការត្រឹមត្រូវ៖ «ដំបូងមានការពាក់ព័ន្ធដូចខ្ញុំឆ្លើយខាងដើម ដោយមានការឆ្លើយដាក់គឺគេបានឃើញគាត់មានកាន់អាវុធ។ ដូច្នេះខាងស្នងការរងទទួលបន្ទុកព្រហ្មទណ្ឌមកគាត់គោលការណ៍ព្រះរាជអាជ្ញាសុំឆែកឆេរផ្ទះតែរកអត់ឃើញ តែវានៅមានជាប់ពាក់ព័ន្ធនឹងការឆ្លើយដាក់»។
ទោះជាយ៉ាងណាប្រធានគណបក្សសង្គ្រោះជាតិ ស្រុកសំឡូត លោក អ៊ុំ ពេជ្រ អះអាងថា អំឡុងសមត្ថកិច្ចចុះឆែកឆេរនៅផ្ទះជនត្រូវចោទនោះ គឺប៉ូលិសបានធ្វើលិខិតចាប់ខ្លួននៅទីនោះតែម្ដង។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង លោក យិន ម៉េងលី លើកឡើងថា សមត្ថកិច្ចអាចចាប់ជនណាម្នាក់បានលុះត្រាតែករណីបទល្មើសជាក់ស្ដែងដែលជននោះកំពុងប្រព្រឹត្ត។
ចំណែកករណីនេះ លោក យិន ម៉េងលី អះអាងថា ជនត្រូវចោទពុំមែនជាបទល្មើសជាក់ស្ដែងទេ ហើយលោកថា ការចាប់ខ្លួននេះជាអំពើខុសច្បាប់៖ «អ៊ីចឹងខ្ញុំចង់បញ្ជាក់សាជាថ្មីថា ការប្រើប្រាស់និងគ្រប់គ្រងអាវុធខុសច្បាប់នេះ ទាល់តែមានការឆែកឆេរឃើញ ឬក៏ជននឹងកំពុងតែកាន់កាប់នោះ ទើបចោទបទល្មើសបាន។ បើមិនដូច្នេះទេ វាជាវិមតិសង្ស័យទៅតាមផ្លូវច្បាប់វិមតិសង្ស័យជាប្រយោជន៍ដល់ជនជាប់ចោទគឺសមត្ថកិច្ចមិនត្រូវទៅឃាត់ខ្លួនពួកគាត់ទេ ត្រូវធ្វើការតាមដាន ឬកសាងសំណុំរឿងដើម្បីរកភស្តុតាង និងរកសាក្សីដាក់បន្ទុកថែមទៀត»។
គិតត្រឹមម៉ោង ១០កន្លះព្រឹកថ្ងៃទី១៤ វិច្ឆិកា មន្ត្រីគណបក្សសង្គ្រោះជាតិ ដែលចាប់ខ្លួន ត្រូវបានសមត្ថកិច្ចឃុំខ្លួននៅអធិការនគរបាលស្រុកសំឡូត នៅឡើយ។ នាយប៉ុស្តិ៍នគរបាលរដ្ឋឃុំស៊ុង លោក កែវ វិបុល ឲ្យដឹងថា សមត្ថកិច្ចនឹងបញ្ជូនសង្ស័យទៅសាកសួរបន្តនៅស្នងការនគរបាលខេត្តបាត់ដំបង នៅរសៀលថ្ងៃទី១៤ វិច្ឆិកា ដដែល៕